الماتىلىقتارعا يراننىڭ ساتىلمايتىن قۇندى جادىگەرلەرى كورسەتىلدى - فوتو
بۇگىن الماتىداعى قازاقستان مەملەكەتتىك ورتالىق مۋزەيىندە يران يسلام رەسپۋبليكاسىنىڭ مادەني وكىلدىگى ناۋرىز مەيرامىنا ارنالعان «شاحنامە» قولونەر بۇيىمدارىنى مەن كوركەم تۋىندىلار كورمەسىن اشتى.
كورمە ەكى ەلگە دە ورتاق ءاز- ناۋرىز مەرەكەسىنىڭ قۇرمەتىنە وراي ۇيىمداستىرىلىپ وتىر.
ورتالىق مۋزەي ديرەكتورىنىڭ عىلىمي جۇمىستار جونىندەگى ورىنباسارى عاليا تەمىرتوننىڭ ايتۋىنشا، يران مادەنيەتىنە قاتىستى كورمە وسىمەن 5- رەت ۇيىمداستىرىلىپ وتىر.
«ق ر مەملەكەتتىك ورتالىق مۋزەيى يران يسلام رەسپۋبليكاسىنىڭ الماتى قالاسىنداعى باس كونسۋلدىعى جانىنداعى مادەني وكىلدىگىمەن بەلسەندى تۇردە قارىم- قاتىناس ورناتىپ كەلەدى. ومار حايام، ساعدي، حافيز سىندى شايىرلاردىڭ جىرلارى پارسى تىلىندە. بۇگىنگى كورمەدە فيرداۋسيدىڭ «شاحنامە» داستانىنىڭ جەلىسى بويىنشا كوركەم بەزەندىرىلگەن سۋرەتتەر قويىلعان»، - دەدى عاليا تەمىرتون.
يران مادەني وكىلدىگىنىڭ جەتەكشىسى سەيىد جاۆاد جالەليدىڭ ايتۋىنشا، بۇگىنگى كورمەدە 50-دەن استام قۇندى جادىگەرلەر ۇسىنىلعان.
«كورمەگە «شاحناما» داستانىنان الىنعان ۇزىندىلەر قويىلدى. شاحنامە داستانىندا باتىرلىق قاسيەت جىرلانعاندىقتان قازاق ادەبيەتىنىڭ ليرو- ەپوستىق جىرلارىنا دا اسەر ەتكەن. ونى ءبىرىنشى تۇرماعامبەت ىزتىلەۋوۆ قازاقشا جىرلاپ شىققان. جادىگەرلەر وتە قۇندى بولعاندىقتان ساتىلمايدى. ونىڭ قۇنى وتە جوعارى. بۇل جەردە يراننىڭ بارلىق وڭىرىنەن شىققان قولونەرشىلەردىڭ تۋىندىلارى توپتاستىرىلعان. جادىگەرلەر اعاشتان، تەمىردەن، مىستان ويىلىپ جاسالعان. بىلتىر تالدىقورعان قالاسىندا وتكىزدىك، كەلەسى جىلى شىمكەنتتە وتكىزۋ جوسپاردا بار»، - دەدى ول.
كورمەدە يراننىڭ «حاتام»، «مينيكاري» سىندى ءداستۇرلى ونەر ۇلگىلەرى بويىنشا ازىرلەنگەن بۇيىمداردى تاماشالاۋعا بولادى.
اۆتور: الماس مۇقاش ۇلى
