نازاربايەۆ وزبەكستان پرەزيدەنتىن «دوستىق» وردەنىمەن ماراپاتتادى

مەملەكەت باسشىسى نۇرسۇلتان نازاربايەۆ ەكى ەلدىڭ اراسىنداعى باۋىرلاستىق ءارى دوستىق بايلانىستاردى ەرەكشە اتاپ ءوتتى. «قازاقستانداعى وزبەكستان جىلى ەكى حالىقتىڭ اراسىنداعى باۋىرلاستىقتىڭ ايقىن كورىنىسى بولسا كەرەك. بىزدە ورتاق دۇنيەتانىم، ورتاق كوزقاراس، ورتاق مادەنيەت، ورتاق ءدىن مەن ورتاق سالت- ءداستۇر بار. ال ءتىل مەن ءداستۇر قاشاندا حالىقتاردىڭ ءوزارا جاقىنداسۋىنا نەگىز بولعان. بۇگىن باۋىرلاس ەلدىڭ ۇزدىك ونەر ۇجىمدارى استاناعا وزبەك مادەنيەتىنىڭ وزىق شەديەۆرلەرىن كورسەتەدى»، - دەپ اتاپ كورسەتتى ن. نازاربايەۆ.

پرەزيدەنت ەكى ەلدىڭ ساۋدا- ەكونوميكالىق بايلانىستاردىڭ ءساتتى دامىپ جاتقانىن دا جەتكىزدى. وتكەن جىلى ءبىرقاتار ماڭىزدى كەلىسىمدەر جاسالدى. سونىڭ ءبىرى - 2018 -جىلدى قازاقستانداعى وزبەكستان جىلى دەپ جاريالاۋ. ال كەلەسى جىلى وزبەكستاندا قازاقستان جىلى وتەتىن بولادى. «اتالعان ەكى ۇلكەن باستامانىڭ ارقاسىندا ەلدەر اراسىنداعى بايلانىستار رۋحاني جاعىنان بايىپ، كۇشەيە تۇسەدى. مادەنيەت، ءبىلىم مەن عىلىم سالاسىنداعى ىنتىماقتاستىق نىعايادى دەپ سەنەمىز»، - دەدى ەلباسى.

وسىدان كەيىن مەملەكەت باسشىسى وزبەكستان پرەزيدەنتى شاۆكات ميرزييەۆكە I دارەجەلى «دوستىق» وردەنىن تاقتى. ءوز كەزەگىندە كورشى ەلدىڭ باسشىسى ريزاشىلىعىن ءبىلدىردى.

«بۇگىن مەن ەڭ باقىتتى اداممىن. سەبەبى وسىنداي ۇلكەن ماراپاتتى نۇرسۇلتان نازاربايەۆتىڭ قولىنان الىپ وتىرمىن. بۇل - مەن ءۇشىن ۇلكەن ابىروي ءارى باقىت. بۇل وردەن - ەكى ەلدىڭ وردەنى، بۇل وردەن - ۇلكەن دوستىقتىڭ كورىنىسى. ماراپات جاساپ وتىرعانىڭىزعا شەكسىز العىسىمدى ايتامىن»، - دەدى ش. ميرزييەۆ.

 ايتا كەتەيىك، بۇگىن وزبەكستان پرەزيدەنتى شاۆكات ميرزييەۆ ورتالىق ازيا ەلدەرى باسشىلارىنىڭ جۇمىس كەزدەسۋىنە قاتىسۋ ءۇشىن استاناعا كەلدى. اتالعان شارا اقوردادا ءوتتى.

كەڭەسكە قىرعىزستان رەسپۋبليكاسىنىڭ پرەزيدەنتى سوورونباي جەەنبەكوۆ، تاجىكستان باسشىسى ەمومالي راحمون، وزبەكستان رەسپۋبليكاسىنىڭ پرەزيدەنتى شاۆكات ميرزييەۆ جانە تۇرىكمەنستان مەدجليسى ءتورايىمى اكدجا نۋربەردىيەۆا حانىم قاتىستى.

ق ر پرەزيدەنتى نۇرسۇلتان نازاربايەۆتىڭ ايتۋىنشا، ورتالىق ازيا ەلدەرى باسشىلارىنىڭ بايلانىسى جاندانا ءتۇستى.

سونداي- اق ورتالىق ازيا مەملەكەتتەرىنىڭ باسشىلارى ناۋرىز مەرەكەسىنە وراي بىرلەسكەن مالىمدەمە جاسادى.

 كەڭەستىڭ كەلەسى كەزدەسۋى تاشكەنتتە وتەدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى