ەلباسى: ورتالىق ازيا ەلدەرىنىڭ ارنايى قىزمەتتەرى ىنتىماقتاستىقتى جانداندىراتىن بولادى
«قازىرگى ۋاقىتتا ورىن الىپ وتىرعان ىشكى پروبلەمالاردى ءبىز ءۇشىن ەشكىم دە شەشىپ بەرمەيدى دەپ كەلىستىك. ەڭ الدىمەن، قاۋىپسىزدىكتى قارادىق. قازىر اۋعانستاندا ورىن الىپ جاتقان وقيعالار ءبىزدى قاتتى الاڭداتادى. ەگەر مەملەكەتتەرىمىزدىڭ ارنايى قىزمەتتەرى تىعىز ىنتىماقتاستىقتا بولسا، وندا ءبىز لاڭكەستەر، ەسىرتكى تاسىمالى، ءدىني يسلامشىلار جانە باسقالارى تۋرالى ءبارىن بىلەتىن بولامىز. ياعني، تەرروريزم، ءدىني ەكسترەميزم، زاڭسىز قارۋ- جاراق ساۋداسى، ۇيىمداسقان قىلمىس - مۇنىڭ بارلىعىنىڭ جولىن كەسۋ قاجەت»، - دەدى نۇرسۇلتان نازاربايەۆ.
ەلباسىنىڭ اتاپ وتۋىنشە، وسى ماقساتتا ناۋرىز ايىنىڭ سوڭىندا وزبەكستاندا جوعارى دەڭگەيدەگى كونفەرەنسيا وتكىزۋ جوسپارلانعان.
«ءبىزدىڭ بارلىق مەملەكەتتەرىمىز شەشىم قابىلدايتىن بولادى. وزدەرىڭىز دە بىلەتىندەي، بۇل ماسەلەلەرمەن ۇ ق ش ۇ اياسىندا دا اينالىسامىز. رەسەيمەن دە تىعىز بايلانىس بار. بۇل اتالعان جۇمىستاعى ماڭىزدى ءسات»، - دەدى ەلباسى.
مۇنان بولەك قازاقستان پرەزيدەنتى سيريادا جەڭىلىس تاپقان د ا ي ش (قازاقستان جانە ءبىرقاتار وزگە مەملەكەتتەر اۋماعىندا تىيىم سالىنعان) قازىرگى ۋاقىتتا «ۇيقىداعى» ۇيىمدار قۇرىپ جاتقانىن اتاپ ءوتتى.
«ال ول جاقتاعى سوعىسقا ءبىزدىڭ بارلىق ەلدەرىمىزدىڭ ازاماتتارى قاتىستى. ەندى ولار ورالىپ جاتىر. بىزگە بۇل ىستە بارىنشا قىراعى بولۋ قاجەت»، - دەدى نۇرسۇلتان نازاربايەۆ.
اۆتور: مارلان جيەمباي
