ەلباسى شاۆكات ميرزييەۆكە: دوستىق بايلانىسىمىز جاڭا بەيىنگە كوشىپ كەلەدى

«كەزدەسپەگەنىمىزگە ءبىراز ۋاقىت بولدى. كوپ شارۋا جاساپ جاتىرسىز، كورشىلەرىڭىزدىڭ بارلىعىنا باردىڭىز. ەكى ەلدىڭ اراسىنداعى ساۋدا- ساتتىقتى ءسىز ايتقان 2 ميلليارد دوللارعا جەتكىزدىك»، - دەپ اتاپ ءوتتى ەلباسى كەزدەسۋ بارىسىندا.

مەملەكەت باسشىسىنىڭ اتاپ وتۋىنشە، وزبەكستان پرەزيدەنتى وسى جىلدىڭ ىشىندە كورشىلەرمەن قارىم- قاتىناستى جولعا قويىپ، ونداعان جىلدار بويى شەشىمى تابىلماي كەلگەن شەكارا ماسەلەسىن جونگە كەلتىردى.

«مەملەكەت باسشىلارىنىڭ جۇمىس كەزدەسۋى يدەياسىن ءسىز كوتەرىپ، مەن ونى جۇزەگە اسىردىم. يدەيا سىزگە تيەسىلى. قۇداي قالاسا، بۇگىن بارلىق ارىپتەستەرىمىزبەن، باۋىرلارىمىزبەن كەزدەسەمىز. بىزدە باسقا ەشقانداي ماقسات، ساياسي استار جوق. ءبىز كورشىلەردىڭ پروبلەمالارىن، ەكونوميكالىق ماسەلەلەرىن، كۇندەلىكتى ماسەلەلەرىن، ءوزارا قارىم- قاتىناسىن، ساۋدا، بايلانىس، كولىك ماسەلەلەرىن شەشكىمىز كەلەدى»، - دەدى نۇرسۇلتان نازاربايەۆ.

«ءوزىڭىز اتاپ وتكەندەي، سوڭعى 1,5 جىلدىڭ ىشىندە باۋىرلاس ەكى حالىقتىڭ اراسىنداعى دوستىق بايلانىستار مۇلدەم جاڭا بەيىنگە كوشىپ كەلەدى. اسىرەسە، ەكونوميكا سالاسىندا ەلدەرىمىز اراسىنداعى ساۋدا- ساتتىق كولەمى ءبىر جىلدىڭ ىشىندە- اق 2 ميلليارد دوللارعا جەتىپ وتىر»، - دەدى ءوز كەزەگىندە شاۆكات ميرزييەۆ.

ايتا كەتەيىك، بۇگىن اقوردادا ورتالىق ازيا ەلدەرى، سونىڭ ىشىندە قازاقستان، قىرعىزستان، تاجىكستان، تۇرىكمەنستان جانە وزبەكستان رەسپۋبليكاسى باسشىلارىنىڭ جۇمىس (كونسۋلتاتيۆتىك) كەزدەسۋى وتەدى. تۇرىكمەنستاندا جوعارى دەڭگەيدەگى ءىس- شارالاردىڭ الدىن الا جوسپارلانۋىنا بايلانىستى بۇل ەلدەن اتالعان جيىنعا مەدجليس ءتورايىمى ا. ت. نۋربەردىيەۆا حانىم قاتىسادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى