اتىراۋدا بۇرىمدى قىزدار بايقاۋى ءوتتى

ۇيىمداستىرىلعان بايقاۋدىڭ باس جۇلدەسىن ارايلىم سماعۇلوۆا جەڭىپ الدى. كاسپي ءوڭىرىنىڭ قازىرگى زامانعى كوللەدجىندە وقيتىن ارايلىمنىڭ شاشىنىڭ ۇزىندىعى 100 س م. بۇرىمدى قىزدار تانىستىرۋ، شاش ءورۋ ۇلگىلەرىن كورسەتۋ، مۋزەي قورىنداعى زەرگەرلىك بۇيىمداردى تاعىپ، ەرەكشەلىكتەرىن ايتۋ، ماقال- ماتەلدى جالعاستىرۋ سەكىلدى بايقاۋ تالاپتارىنان سۇرىنبەدى.

 ولاردىڭ ونەرلەرىن پەداگوگيكا عىلىمدارىنىڭ كانديداتى، ءبىلىم بەرۋ سالاسىنىڭ ارداگەرى نۇرزيلا سارسەن قىزى باستاعان قازىلار القاسى باعالادى. د. نۇرپەيىسوۆا اتىنداعى اتىراۋ مۋزىكا كوللەدجىنىڭ ستۋدەنتتەرى روزا مايرانوۆا، ايمەكەن قۇرمەت قىزى، ارۋجان ارتۋر قىزى، كاسپي ءوڭىرىنىڭ قازىرگى زامانعى كوللەدجىنىڭ ستۋدەنتى نۇرساۋلە قادىرجانوۆا، بيزنەس جانە قۇقىق كوللەدجىنىڭ ستۋدەنتى قۇرالاي ورازعاليەۆا، مۇناي جانە گاز ۋنيۆەرسيتەتىنىڭ ستۋدەنتى گۇلناز عاسىربەك قىزى، ق. دۇتبايەۆا اتىنداعى گۋمانيتارلىق كوللەدج ستۋدەنتى جاڭىلسىن ەرعالي قىزى ارنايى اتالىمدارمەن ماراپاتتالدى. -  قازاق قىزىنىڭ قاشاندا اقىلىنا كوركى ساي بولعان. ۇلتتىق سالت- ءداستۇردى تانىپ، ءبىلىپ، كۇندەلىكتى ومىردە قولدانۋدى ناسيحاتتاۋ وسىنداي شارالاردان باستالادى. بايقاۋعا قاتىسقان ارۋ قىزداردىڭ يبا، ۇيات، يمان سەكىلدى اسىل قاسيەتتەردى بويلارىنا جيناعاندارىن كورىپ، ريزا بولدىق، -  دەيدى مۋزەي ديرەكتورىنىڭ ورىنباسارى سايا عازيموۆا.

باقىتگۇل باباش، «ەگەمەن قازاقستان» اتىراۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى