قازاقستاندىقتار بىلىمگە قانشا اقشا جينادى؟

«قارجى ورتالىعى» ا ق پرەزيدەنتى اسقار يبرايموۆتىڭ ايتۋىنشا، بۇگىندە قازاقستان حالقىنىڭ بىلىمگە جيناپ جاتقان اقشاسى 18 ميلليارد تەڭگەگە جەتتى.

«نەگىزى، ونداي جۇيە كورشى ت م د ەلدەرىندە دە، شەتەلدە دە جوق. قازىرگى كەزدە قازاقستاندىقتار مەملەكەتتىك جيناق جۇيەسىن ءجيى قولدانا باستادى. ولار اقشانى بىلىمگە جۇمساپ جاتىر. جيناق جۇيەسىنە سايكەس، دەپوزيتى بار ادام ەكىنشى دەڭگەيلى بانكتەردەن وقۋعا نەسيە الادى. كەپىلدىك بەرۋدىڭ قاجەتى جوق. سەبەبى قارجى ورتالىعى نەسيەنىڭ قايتارىلۋىنا ءوزى كەپىل بولادى. وقۋدان كەيىن التى اي بەرىلەدى. وسى ۋاقىتتىڭ ىشىندە ءبىلىم العان ادام جۇمىسقا تۇرۋى قاجەت. سودان كەيىن نەسيەنى قايتارۋدى باستايدى»، - دەدى ا. يبرايموۆ قازاقپارات تىلشىسىنە بەرگەن سۇحباتىندا.

ايتا كەتەيىك، مەملەكەتتىك ءبىلىم بەرۋ دەپوزيتىن اتالعان باعدارلاماعا قاتىساتىن كەز كەلگەن بانكتەن اشۋعا بولادى. ونداي سالىمدارعا بانكتىڭ 14 پروتسەنتتىك سىياقىسى تولەنەدى. بۇدان بولەك، مەملەكەتتىك سىياقى تاعى بار. الەۋمەتتىك جاعىنان از قامتىلعان ازاماتتاردىڭ مەملەكەتتىك سىياقىسى 7 پروتسەنتتى قۇرايدى. باسقا ازاماتتارعا 5 پروتسەنت تولەنەدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى