قانات يسلام: ماعان اتاعى جوق قارسىلاستار قىزىق ەمەس
- قازاقستاندىق جانكۇيەرلەر قاناتتىڭ كەزەكتى باسەكەسىن اسىعا كۇتۋدە. قارسىلاس بەلگىلى مە؟ قانات كىممەن قولعاپ ءتۇيىستىرۋدى جوسپارلاپ وتىر؟
- جانكۇيەرلەرىم سياقتى مەن دە ءوز جەكپە-جەگىمدى اسىعا كۇتىپ ءجۇرمىن. شارشى الاڭعا شىقپاعانىما 6-ايدان اسىپ كەتىپتى. سەبەبى دە جوق ەمەس. بۇرىنعى پروموۋتەرىم نەلسون لوپەزبەن كەلىسىمشارت اياقتالىپ، باسقا بىلىكتى ماماندارمەن جۇمىستى ارى قاراي جالعاستىرۋ كەرەك بولدى. كوپ پروموۋتەرلەردەن ءارتۇرلى ۇسىنىستار كەلىپ ءتۇستى. سونىڭ بارلىعىن قاراپ، ويلانىپ شەشىم قابىلداۋ ءۇشىن ءبىراز ۋاقىتىمىز كەتكەنى راس. جاقىندا عانا جاڭا مەنەدجەرمەن كەلىسىمشارتقا وتىردىم. بۇيىرتسا جازعا دەيىن امەريكادا ءبىر جەكپە-جەك وتكىزۋدى جوسپارلاپ وتىرمىز. قارسىلاس پەن جەكپە-جەك ۋاقىتى الداعى ءبىر اپتادا بەلگىلى بولادى.
- 2017-جىلدىڭ ەڭ ۇزدىك مەنەدجەرى اتانعان ەگيس كليماسپەن جۇمىس باستاعانىڭدى بىلەمىز؟ اتاقتى مەنەدجەرمەن كەلىسىم قالاي جاسالدى؟ ونى تاڭداۋدىڭ باستى سەبەبى نەدە؟
- ەگيس كليماس ءۇش بىردەي الەم چەمپيونى لوماچەنكو، كوۆاليەۆ پەن ۋسيكتىڭ مەنەدجەرى. وسىنىڭ وزىمەن-اق ونىڭ دەڭگەيىن ولشەي بەرۋگە بولادى. كوۆاليەۆ اندرە ۋوردتان جەڭىلىپ، بارلىق بەلبەۋلەرىنەن ايىرىلىپ قالعان كەزدە ەگيس وعان قايتا چەمپيوندىق جەكپە-جەك ۇيىمداستىرىپ بەردى. كوۆاليەۆ قايتا چەمپيون بولدى. مۇنى ەكىنىڭ ءبىرى ىستەي المايدى. مەنىڭ ماقساتىم - الەم چەمپيونى بولۋ. ال ۇلكەن بوكس كەشتەرىندە چەمپيوندىق جەكپە-جەك ۇيىمداستىرۋدى، كەلىسسوزدەر جاساۋدى ەگيس وتە جاقسى بىلەدى. ويىمىز ءبىر جەردەن شىعىپ، ەكەۋمىزدىڭ دە ماقساتىمىز چەمپيوندىق بەلبەۋ بولعان سوڭ تەز ءتىل تابىسىپ كەتتىك. بۇيىرتسا بيىل الەم چەمپيونى اتاعى ءۇشىن جەكپە-جەك وتكىزۋدى جوسپارلاپ وتىرمىز.
- قانات يسلام كىمدەرمەن قولعاپ تۇيىستىرگىسى كەلەدى، كىمدەرمەن رينگكە شىعۋعا ءازىر؟
- مەن كەز كەلگەن چەمپيونمەن جۇدىرىقتاسۋعا كەشە دايىن بولعانمىن، بۇگىن دە دايىنمىن، ەرتەڭ دە دايىن بولامىن. ماعان اتاعى جوق نە بەلبەۋى جوق قارسىلاستار قىزىق ەمەس. الەمگە ءوزىن مويىنداتقان مىقتىلارمەن عانا كەزدەسكىم كەلەدى. مەنەدجەرىمە دە وسى ءسوزدى ايتتىم. مىقتىنى جەڭسەڭ عانا مىقتى بولاسىڭ. چەمپيوندى ۇتساڭ عانا چەمپيون بولاسىڭ.
- امەريكادا پروموۋتەرلىك كومپانيا اشقانىڭىز تۋرالى ەستىدىك. بۇل اقشا تابۋدىڭ كوزى مە الدە بىزگە بەيمالىم باسقا دا قاجەتتىلىگى بار ما؟
- 10 كۇن بۇرىن عانا امەريكادا QAZAQ promotions پروموۋتەرلىك كومپانياسىن اشتىق. قازاقستاندا بۇل كومپانيا ەكى جىلدان بەرى جۇمىس ىستەپ كەلەدى. ەكى بىردەي بوكس كەشىن وتكىزدىك. ءبىرى 2016-جىلى الماتى قالاسىندا، الماتى ارەنا سپورت كەشەنىندە ۇيىمداستىرىلسا، 2017-جىلى ەكسپو كورمەسى اياسىنداعى بوكس كەشىنىڭ كۋاسى بولدىڭىزدار. قانشاما قازاق بوكسشىلارى جارقىراپ ەل الدىنا شىعىپ، ونەرىن كورسەتتى. مىنە، مەنىڭ ماقساتىم وسى. امەريكادا وزىممەن بەرگە، ءبىر بوكس كەشىندە ىنىلەرىمنىڭ دە جۇدىرىقتاسىپ، تانىلىپ، بەلەس باعىندىرۋىن قالايمىن. پروموۋتەرلىك كومپانيامدى دا وسى ماقساتتا اشتىم. مۇمكىندىك باردا، قولدا تۇرعاندا نەگە جاساماسقا؟! امەريكادا ۋكرايندىقتار، مەكسيكالىقتار وزدەرىنىڭ بوكسشىلارىنا بارلىق جاعدايدى جاساپ قويعان. قايدا جاتتىعامىن، قاي شوۋدا جۇدىرىقتاسامىن دەپ باس قاتىرمايدى. ال ءبىزدىڭ كەي جىگىتتەر الاياق پروموۋتەرلەرگە الدانىپ، ءالى جەكپە-جەككە شىعا الماي ءجۇر. ولارعا قارايلاساتىن، جول كورسەتەتىن بىرەۋ كەرەك قوي. ونى مەن ىستەمەسەم، كىم ىستەيدى؟ ىنىلەرىمە جول كورسەتۋ مەنىڭ مىندەتىم دەپ ەسەپتەيمىن. الدىمەن ءوزىمدى جارىلقاپ الايىن، كارەرام اياقتالعان سوڭ كىرىسەمىن دەپ تاستاپ قويسام، ولارعا كىم باعىت كورسەتەدى؟ تاعى دا الاياق پروموۋتەرلەرگە الدانىپ جەم بولادى ەمەس پە؟ قازىر سوزبەن ەمەس، ىسپەن كومەك كورسەتۋدىڭ زامانى.
- الەمدىك دەڭگەيدەگى بوكس كەشتەرى ۇلكەن قاراجاتتى تالاپ ەتەدى. ۇيىمداستىرۋ، جارناماعا، ترانسلياتسيا ت. ب. قاراجات ماسەلەسى قالاي قاراستىرىلادى؟ دەمەۋشىلەر بار ما؟
- قازىر الەمدەگى ەڭ ءىرى پروموۋتەرلىك كومپانيالارمەن سەرىكتەستىك ورناتىپ جاتىرمىز. ايتا كەتسەم، QAZAQ promotions پەن Main event پروموۋتەرلىك كومپانياسى بىرىگىپ ۇلكەن شوۋلار وتكىزەمىز دەپ، كەفي دۋۆامەن كەلىستىك. سونداي-اق TOP RANK پروموۋتەرلىك كومپانياسىنىڭ يەسى، اتاقتى پروموۋتەر بوب ارۋممەن جۇزدەسىپ، بوكس كەشتەرىن بىرلەسە وتكىزۋدى جوسپارلادىق. HBO تەلەارناسىنىڭ ديرەكتورى پيتەر نەلسونمەن سويلەستىك. ءبىزدىڭ ەلدە بوكس ءبىرىنشى ورىنداعى سپورت. ونى شەتەلدىكتەر جاقسى بىلەدى. قىزىعۋشىلىقتارى دا وتە جوعارى دەڭگەيدە. بۇيىرتسا، الدا اتقارىلار جۇمىس كوپ. كوماندامىزعا دا كىل بىلىكتى ماماندار جينالعان. ال دەمەۋشىلەر جاعىن مەن ۋايىمدامايمىن. ەلىمىزدە ۇلتتىق مۇددەنى ءبىرىنشى ورىنعا قوياتىن اعالارىم كوپ. امەريكادا دا بوكس كەشىن وتكىزۋگە، QAZAQ promotions قا قارجىلاي قولداۋ كورسەتەتىن مۇددەلەس دەمەۋشىلەر تابىلارىنا كۇمانىم جوق.
- جالپى قاناتتىڭ بوكستان تاپقان تابىسى قانداي، قارجىسىن قايدا ينۆەستيتسيالايدى؟
- شىنىمدى ايتسام، كاسىپقوي بوكستا ءالى ءبىر جەرگە ينۆەستيتسيالايتىنداي اقشا تاپقانىم جوق. وسى ۋاقىتقا دەيىن جەكپە-جەكتەرىمدى دەمەۋشىلەردىڭ قولداۋىمەن وتكىزدىم. كاسىپقوي بوكستا شىعىن وتە كوپ. جەكپە-جەككە 3 اي بۇرىن دايىندالامىز. امەريكادا تۇرۋ، جاتتىعۋ، سپاررينگ قارسىلاستار مەن جاتتىقتىرۋشى قارجىسى، دارىگەرلەر مەن ارنايى ۆيتاميندەرگە كوپ قاراجات كەتەدى. چەمپيوندىق تيتۋلدان سوڭ بالكىم، بۇل سۇراعىڭىزعا باسقاشا جاۋاپ بەرەرمىن. سول كۇنگە جەتەيىك.
- قازىر جاتتىعۋ قالاي ءجۇرىپ جاتىر؟ قايدا ءجۇرىپ جاتىر؟ قازىرگى كۇن ءتارتىبى قانداي؟
- قازىر امەريكانىڭ كاليفورنيا شتاتىنداعى وكسنارد قالاسىندامىن. مەنەدجەرىم ەگيس كليماستىڭ Boxing Laboratory بوكس زالىندا ءبىر مەزگىل جاتتىعىپ ءجۇرمىن. قارسىلاسىم ناقتىلانعان سوڭ ەكى مەزگىل جاتتىعۋعا كىرىسەمىن. جەڭىستى كۇندەرىمىز كوپ بولسىن!
