تيمۋر قۇلىبايەۆ شاڭعىشى كولياديندى جەڭىسىمەن قۇتتىقتادى
وندا «قۇرمەتتى الەكساندر! قازاقستاننىڭ ۇلتتىق وليمپيادالىق كوميتەتى جانە ەلىمىزدىڭ سپورت قوعامداستىعى اتىنان ءسىزدى پحەنچحانداعى XІI قىسقى پاراليمپيادا ويىندارىنداعى جەڭىسىڭىزبەن شىن جۇرەكتەن قۇتتىقتايمىن. ءسىزدىڭ التىن مەدالىڭىز قازاقستان ءۇشىن تاريحي جەڭىس جانە بۇل جەتىستىگىڭىز ەلىمىزدىڭ پاراليمپيادا سپورتىنىڭ تاريحىندا ەرەكشە ورىن الاتىنى ءسوزسىز. ءسىزدىڭ ماقساتقا جەتۋ جولىندا تانىتقان قايراتتىلىق پەن قايسارلىعىڭىز كوپكە ۇلگى. شىن جۇرەكتەن ءسىزدى، جاتتىقتىرۋشىلار قۇرامىن جانە قازاقستاننىڭ پاراليمپيادا كوميتەتىن وسىنداي جەتىستىكپەن قۇتتىقتايمىز!» دەپ جازىلعان.
سونداي-اق، ق ر ۇ و ك پرەزيدەنتى تيمۋر قۇلىبايەۆ جاقىن كۇندەرى پحەنچحاندا حالىقارالىق وليمپيادالىق جانە پاراليمپيادالىق كوميتەتتەرى اراسىندا ءوزارا ارىپتەستىك تۋرالى ۇزاق مەرزىمگە ارنالعان جاڭا كەلىسىمگە قول قويىلعانىن دا اتاپ ءوتتى.
«بۇل سپورت قاعيدالارى مەن يدەالدارىن ناسيحاتتاۋ ىسىندە قوس ۇيىمنىڭ باعدارى ءبىر ەكەنىن دالەلدەيدى. قازاقستاننىڭ ۇلتتىق وليمپيادالىق كوميتەتى ەلىمىزدە پاراليمپيادالىق قوزعالىستى جانە ونى دامىتۋعا باعىتتالعان بارلىق شارالاردى قولدايدى»، - دەدى ت. قۇلىبايەۆ.
اۆتور: كۇنسۇلتان وتارباي
