ءماشھۇر ءجۇسىپتىڭ قولجازبالارى مەن جەكە زاتتارى كورمەگە قويىلدى
سالتاناتتى اشىلۋعا كەلگەن وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆ بۇل عۇلامانىڭ مەرەيتويىنا ارنالعان شارالاردىڭ باستاۋى ەكەنىن اتاپ ءوتتى.
«اتالمىش كورمە ءماشھۇر ءجۇسىپتىڭ 160 جىلدىعىنا ارنالىپ وتىر، - دەدى ارداق رايىمبەكوۆ. - بۇدان دا باسقا وسى جىلى تامىز ايىندا رەسپۋبليكالىق عىلىمي-پراكتيكالىق كونفەرەنسيا ۇيىمداستىرىلادى. باياناۋىلدىڭ وزىندە ايتىس، كونفەرەنسيا، ءماشھۇر وقۋلارى جانە تاعى باسقا شارالار وتكىزىلەدى».
ق ر ب ع م ع ك «عىلىم ورداسى» عىلىمي كىتاپحانا مەڭگەرۋشىسى قارلىعاش قايماقبايەۆا كورمەگە اكەلىنگەن جادىگەرلەر جونىندە باياندادى.
«ءوز كوزدەرىڭىزبەن كورسىن دەپ كونە 25 قولجازباسىن اكەلىپ وتىرمىز، - دەدى قارلىعاش قايماقبايەۆا. - كەيبىر جازبالار 500 بەتتەن اسادى. 1907-جىلى قازان قالاسىندا شىققان، الايدا، تسەنزۋرادان وتپەي قالعان جانە سول ءۇشىن ءماشھۇر ءجۇسىپ قازاقستاننىڭ باتىس جاعىنا كەتۋگە تۋرا كەلگەن ءۇش كىتابى بار. «حال احۋال»، «سارىارقانىڭ كىمدىكى ەكەنى» جانە «تىرشىلىك» دەپ اتالاتىن سول كىتاپتاردى دا الا كەلدىك. تاۋەلسىزدىك جىلدارىندا دا جارىق كورگەن كىتاپتار اكەلىندى. وسى ەڭبەكتەردىڭ ەلەكتروندى نۇسقاسىن مۋزەي قورىنا سىيعا تارتپاقپىز».
ايتا كەتەيىك، كونە قولجازبالارمەن بىرگە ەسكەلدى شاتقالىنداعى مەموريالدىق مۋزەيىنەن اكەلىنگەن اقىننىڭ جەكە زاتتارى - قۇران، مۇستەك قوبديشاسىمەن، جەز لەگەن، كىسە بەلبەۋ، ءاميان، شاقشالارى، كوزىلدىرىگى كورمەگە قويىلعان.
