ساعاديەۆ وقۋ گرانتتارى مەن ستۋدەنتتىك جاتاقحانانى قارجىلاندىرۋ تەتىكتەرىن اتادى

ەسكە سالا كەتەيىك، بۇنداي تاپسىرما «پرەزيدەنتتىڭ بەس الەۋمەتتىك باستاماسى» اياسىندا بەرىلگەن بولاتىن. وسىعان بايلانىستى بۇگىن «حابار» ارناسىندا «ءوسىمنىڭ بەس قادامى» اتتى ارنايى باعدارلاما ءوتتى، دەپ حابارلايدى قازاقپارات.

ءمينيستردىڭ ايتۋىنشا، جوعارى وقۋ ورىندارىنا قوسىمشا بولىنەتىن 20 مىڭ گرانت رەسپۋبليكالىق بيۋجەت ەسەبىنەن قامتامسىز ەتىلەدى. بۇل قاراجات 2018-جىلدىڭ قىركۇيەگىنەن باستاپ جىل سايىن بولىنەتىن بولادى. سونىڭ ىشىندە 11 مىڭ گرانت تەحنيكالىق ماماندىقتاردىڭ باكالاۆرياتىنا، 5 مىڭى - باسقا ماماندىقتار باكالاۆرياتىنا، 3 مىڭ گرانت - ماگيستراتۋراعا، 1 مىڭى - دوكتورانتۋراعا بولىنەدى. «ەندىگى كەزەكتە ءبىز وسى جوبانى جوعارى وقۋ ورىندارىمەن، قوعامدىق ۇيىمدارمەن، ۇلتتىق كاسىپكەرلەر پالاتاسىمەن كەلىسۋىمىز كەرەك»، - دەدى مينيستر «ءوسىمنىڭ باس قادامى» باعدارلاماسىندا.

بۇدان بولەك، ۆەدومستۆو باسشىسى جاتاقحانا قۇرىلىسىن قارجىلاندىرۋدىڭ الدىن الا ازىرلەنگەن تەتىكتەرى دايىن ەكەنىن دە اتاپ ءوتتى. سوعان سايكەس جوعارى وقۋ ورىندارى نەمەسە جەر ۋچاسكەلەرىن يەلەنگەن قۇرىلىس كومپانيالارى جاتاقحانا جوباسىن وزدەرى دايىنداپ، ونى بەكىتىپ، كەيىننەن ءبىلىم جانە عىلىم مينيسترلىگىنىڭ قارجى ورتالىعىمەن كەلىسىمشارتقا وتىرۋى كەرەك. وسى كەلىسىمشارت ارقىلى جوو نەمەسە قۇرىلىس كومپانياسى ەكىنشى دەڭگەيلى بانكتەن كرەديت الا الادى. «جاتاقحانا سالىنىپ، قولدانىسقا بەرىلگەن سوڭ ءبىلىم جانە عىلىم مينيسترلىگى ونداعى ءاربىر ورىن بويىنشا قاراجات بولەتىن بولادى. ۇسىنىلعان جوبا بويىنشا مەملەكەت تاراپىنان بولىنەتىن سۋبسيديا 8 جىلعا بەلگىلەنىپ، ءبىر ورىنعا 200 مىڭ تەڭگەنى قۇرايتىن بولادى. وسىلايشا جيىنتىق سوما ءبىر ورىنعا - ءبىر ميلليون 600 مىڭ تەڭگەنى قۇرايدى. بۇل سحەما بارىنشا اشىق، تاراپتاردىڭ ءبارى وسىنى قولدايدى، سونى نەگىزگە الا وتىرىپ، بارلىق مەملەكەتتىك ورگاندارمەن كەلىسىم جۇمىستارىن باستاماقپىز»، - دەدى ەرلان ساعاديەۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى