گازداندىرۋدان سوڭ كومىردىڭ جايى نە بولماق - بوزىمبايەۆتىڭ بولجامى

ءمينيستردىڭ سوزىنشە، استانادا جىل سايىن قورشاعان ورتاعا شامامەن 100 مىڭ توننا لاستاۋشى زات شىعارىلادى. ونىڭ %50 دان استامى - اۆتوكولىك قالدىق گازدارىنىڭ ۇلەسىندە، ال %35  جىلۋ-ەنەرگەتيكالىق كەشەنگە، ياعني 192 جەكە ءۇي، 48 كوممۋنالدىق قازاندىق، بىرنەشە ج ە و- نا تيەسىلى. لاستاۋشى زاتتاردىڭ شامامەن %10 جەكە سەكتورلاردان بولادى.

«ەگەر بۇلاردىڭ بارلىعىن گازعا اۋىستىرساق، شىعىندىلار ازايادى. وسىلايشا، 30 مىڭ توننا لاستاۋشى زاتتى قورشاعان ورتاعا جولاتپايمىز. سونىمەن قاتار، اۆتوكولىكتەردى سىعىمدالعان تابيعي گازعا كوشىرۋگە بولادى. بۇل بەنزين جانە ديزەل وتىنىن ايتپاعاننىڭ وزىندە، سۇيىتىلعان گازبەن سالىستىرعاندا الدەقايدا ارزان»، - دەدى قانات بوزىمبايەۆ «حابار» تەلەارناسىنداعى ەلباسىنىڭ بەس الەۋمەتتىك باستاماسىنا ارنالعان «دامۋدىڭ بەس قادامى» اتتى ارنايى باعدارلامادا.

سونداي-اق، قانات بوزىمبايەۆ ەلدە ءوندىرىلىپ جاتقان كومىردىڭ جاعدايى تۋرالى پىكىرىن ءبىلدىردى.

«كومىرگە قاتىستى احۋال تۋرالى مەنەن كوپ سۇرايدى. نەگىزى، ارنايى ستراتەگيا بار. كومىر حيمياسىنا، كومىردى بايىتۋعا قاراي كوشۋ كەرەك. بۇعان قوسا ءبىرقاتار ەلدەر كومىر جاعۋدى جالعاستىرىپ كەلەدى. وتكەن جىلى ەكسپورت گەوگرافياسى تۇبەگەيلى ۇلعايدى. ءبىز رەسەيمەن پورتتارعا شىعۋ ءۇشىن ارنايى رۇقساتناما ارقىلى جۇمىس ىستەدىك. مەملەكەت ميلليوننان استام توننا كومىردى ەۋروپاعا ساتتى، فينلياندياعا، جاپونياعا ەكسپورتتاۋدى باستادىق، الايدا ورتالىق ازيا مەن رەسەيگە شىعۋ تۇرالاپ تۇر»، - دەدى مينيستر.

ايتا كەتەيىك، مۇنىڭ الدىندا ق. بوزىمبايەۆ « قىزىلوردا-جەزقازعان-قاراعاندى-تەمىرتاۋ-استانا» باعىتى بويىنشا ماگيسترالدى گاز قۇبىرىنىڭ قۇرىلىسى تۋرالى بايانداما جاساعان ەدى. بەلگىلى بولعانداي، گاز قۇبىرىنىڭ قۇرىلىسى ۇستىمىزدەگى جىلدىڭ شىلدە ايىندا باستالىپ، 2019-جىلدىڭ سوڭىنا دەيىن اياقتالماق.

اۆتور: قاسقىرباي قويشىمانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى