مينيستر قاسىموۆ مۇگەدەك ورالمانعا كومەكتەسۋگە ۋادە ەتتى
ولاردىڭ ىشىندە كوشى-قون ماسەلەسى بويىنشا كەلگەن قانداستارىمىز دا بولدى، دەپ حابارلايدى قازاقپارات ءتىلشىسى.
قىتاي ازاماتى سارقىت جەتپىسحان قازاقستانعا تۋريستىك ۆيزامەن كەلگەن ەكەن. الايدا ۋاقىتىن وتكىزىپ الىپ، كوشى-قون ورگاندارىنا دەر كەزىندە تىركەۋگە تۇرماعان. سول ءۇشىن ايىپپۇل تولەۋگە مىندەتتەلگەن. ەندى، 15 كۇننىڭ ىشىندە قىتايعا كەتۋى ءتيىس.
«ءبىراق مەن ول جاققا بارسام، قايتىپ كەلە المايمىن... كەشىرىم سۇرايمىن. وسى جاقتا قالعىم كەلەدى. ازاماتتىق الۋعا رۇقسات بەرسەڭىزدەر»، - دەيدى س. جەتپىسحان.
مينيستر ول ءوتىنىشتى ورىنداي المايتىنىن جەتكىزدى. «ازاماتتىق الۋعا ءوتىنىشتى قازاقستانعا كەلگەن بويدا جازۋ كەرەك. ءسىز ءۇش ايدى وتكىزىپ الىپ، ازاماتتىقتى سۇراپ وتىرسىز. زاڭدى بۇزدىڭىز. ءسىزدى قالدىرا المايمىز»، - دەدى ق. قاسىموۆ.
وسىدان كەيىن ءمينيستردىڭ قابىلداۋىنا ارباعا تاڭىلعان سابىرعالي سولتانشارىپ كىردى. ونىڭ سەنىمدى وكىلى ۇلاربەك دالەي ۇلى مۇگەدەك ورالماننىڭ ماسەلەسىن جان-جاقتى ءتۇسىندىرىپ بەردى. «بۇل كىسى 2016-جىلى ءساۋىر ايىندا وتباسىمەن بىرگە كوشىپ كەلگەن. اقمولا وبلىسى ەرەيمەنتاۋ اۋدانىنىڭ كۇنشالعان اۋىلىنان ءۇي الىپ، سول جەردە تۇراقتاعان. باسىندا ودان سوتتالماعانى تۋرالى انىقتاما سۇراتقان. ونى وزدەرى تۇرعان اۋىلدان اپاردى. جارامايدى دەپ، قايتارىپ جىبەردى. سودان اۋداندىق پوليتسيادان الدىرتتى، ونى دا جاراتپادى. وبلىستان الدىرتتى، وعان دا قارامادى. ءۇرىمجىنىڭ دە قاعازىنا قارامادى. بەيجىڭنەن الىپ كەلۋ كەرەكتىگىن ايتتى. سول ەكى ارادا ۋاقىت تا ءوتىپ كەتكەن. تىركەۋدىڭ مەرزىمى بىتەدى. جاڭا زاڭ بويىنشا سوتتالعانى تۋرالى قاعازدى الىپ تاستادى. ءبىراق تىركەۋدىڭ مەرزىمى ءوتىپ كەتتى عوي. ەندى، مىنە، جاعدايى وسى. دالاعا شىعا المايدى. ەكى قۇلاعى ەستىمەيدى»، - دەدى ۇ. دالەي ۇلى.
ونىڭ ايتۋىنشا، قازىرگى كەزدە سابىرعالي سولتانشارىپ قىتايدا كوشىپ كەتكەن ازامات رەتىندە تىركەلىپ تۇر. سوندىقتان ۆيزا الۋعا قايتادان بارسا، تۇرمەگە قامالۋى ابدەن مۇمكىن.
مينيستر اتالعان ماسەلەنى پىسىقتاپ، شەشۋگە كۇش سالاتىنىن جەتكىزدى. «ءبىز بۇل سۇراقتى قالاي شەشەتىنىمىزدى اقىلداسىپ كورەمىز. ءبىراق زاڭ بويىنشا بۇل كىسى قازاقستاننان شىعۋى ءتيىس. ءبىز سىرتقى ىستەر مينيسترلىگىمەن اقىلداسامىز. پوليتسيانىڭ ءوزى شەشە المايدى. بۇنى تەك سىرتقى ىستەر مينيسترلىگى نەمەسە كونسۋلدىق قىزمەت قانا شەشەدى. اقىلداسامىز»، - دەپ اتاپ كورسەتتى ق. قاسىموۆ.
بۇدان بولەك، تاعى ءبىر وتباسى مينيستردەن ۆيزا ماسەلەسى بويىنشا كومەك بەرۋدى سۇرادى. ءۇيدىڭ اكەسى مەن ەكى بالاسى ازاماتتىقتى الىپ، قازاقستاندا تۇرىپ جاتىر. ال اناسى تىركەۋ مەرزىمىن وتكىزىپ الدى. سول ءۇشىن ايىپپۇل تولەۋگە دە مىندەتتەلدى. ەندى، زاڭ بويىنشا قايتادان قىتايعا بارۋى ءتيىس. الايدا ول جاقتا قاماۋعا الىنۋدان قورقادى. «مەن تاپسىرما بەرىپ كورەيىن. ءبىراق زاڭ بويىنشا ەشتەڭە ىستەي المايمىز. سىرتقى ىستەر مينيسترلىگىمەن كەلىسۋىمىز كەرەك. قازىر زاڭ بويىنشا شىعۋىڭىز كەرەك. سوسىن ۆيزا الىپ، قايتادان كەلەسىز. سىزگە كوشى-قوننىڭ باسشىلىعى حابارلاسادى»، - دەپ اتاپ كورسەتتى ق. قاسىموۆ.
اۆتور: ارمان اسقاروۆ
