قىزىلوردادا العاش رەت كورىسۋ كۇنى وتەدى
بۇل شارا وبلىس اكىمدىگىنىڭ قولداۋىمەن قىزىلوردا وبلىسىندا العاش رەت تويلانباقشى، دەپ حابارلايدى قازاقپارات ءتىلشىسى.
ول جونىندە قازاقپارات تىلشىسىنە وبلىستىق «رۋحاني جاڭعىرۋ» ورتالىعىنىڭ باسشىسى نۇرلىبەك مىڭجاس ءمالىم ەتتى. ونىڭ ايتۋىنشا، 14- ناۋرىزدا قىزىلوردا قالاسىنىڭ «سىر سۇلەيلەرى» اللەياسىندا كورىسۋ كۇنى اتاپ وتىلەدى. اتالمىش شارانى يگى داستۇرگە اينالدىرعان ەلىمىزدىڭ باتىس وڭىرىندەگى وبلىس تۇرعىندارىنىڭ تاجىريبەسىنە سۇيەنە وتىرىپ، قىزىلوردا وبلىسىندا دا كەڭ اۋقىمدا تويلاناتىن بولادى.
«ناۋرىز مەرەكەسى اياسىندا تويلاناتىن كورىسۋ داستۇرىنە اقساقالدارمەن بىرگە جاستار دا قاتىسادى. ءتوس قاعىستىرىپ، قول الىسۋ، ۇلكەندەردەن باتا الۋ، ادامدار اراسىنداعى سىيلاستىق، قاۋىشۋ مەرەكەسى - كورىسۋ كۇنىنىڭ كەيىنگى ۇرپاققا ونەگەسى مول. جالپى، بۇل كۇننىڭ نەگىزگى شارتتارى - ۇلكەندى سىيلاۋ، كىشىگە قامقورلىق، ءالسىزدى دەمەۋ، جارلىنى جارىلقاۋ. وسىنىڭ ناتيجەسىندە حالىقتى ىنتىماققا، ۇيىمشىلدىققا، بەرەكە- بىرلىككە باستايتىن عيبراتتى ءداستۇرىن دارىپتەي الامىز»، - دەيدى ن. مىڭجاس.
بۇگىنگى تاڭدا بۇل ءداستۇر ەلىمىزدىڭ باتىس ايماعىندا كەڭىنەن ناسيحاتتالىپ كەلەدى. دەگەنمەن، كەيبىر ەتنوگراف عىلىمداردىڭ ايتۋىنشا، ول ەرتەرەكتە ەلىمىزدىڭ كوپتەگەن وڭىرلەرىندە ءتان ءداستۇر بولعان ەكەن.
بۇل جونىندە فيلولوگيا عىلىمدارىنىڭ كانديداتى سەرىكباي قوسان «ەتنوگراف عالىمدار بۇل ءداستۇر بۇرىنعى ۋاقىتتا ناۋرىزدىڭ العاشقى كۇنىنەن باستاپ تويلانعانىن العا تارتادى. ول ەلىمىزدىڭ باتىس وڭىرىمەن قوسا سىر بويىندا، قوستاناي، تورعاي ايماعىندا، رەسەيلىك استراحان، ساراتوۆ، سامار، ورىنبور وبلىستارىندا تۇراتىن قازاقتار اراسىندا اتاپ وتىلگەن ەكەن. ءبىراق، ونى امال نەمەسە كورىسۋ دەگەن دە اتاۋى بولماعان. جالپىلاي ايتقاندا «ناۋرىز» دەگەن اتاۋ بەرگەن. امال دەگەن اتاۋ 1988-جىلدان باستاپ ەلىمىزدە مەرەكەنىڭ 21-22- ناۋرىزعا رەسميلەنۋىنە بايلانىستى شىققان. حالىق جىل باسى سانالعان كۇننەن اجىراعاسى كەلمەۋىنە بايلانىستى 14- ناۋرىزدى امال دەپ اتاۋعا ءماجبۇر بولدى» دەيدى.
وسىلايشا بيىل سىر ءوڭىرى تۇرعىندارى ۇلىستىڭ ۇلى كۇنىن بىرنەشە كۇن بويى اتاپ وتۋگە نازار اۋدارىپ وتىر. ونىڭ ءاربىر كۇنىندە تاعىلىمى مول سان الۋان شارالار وتكىزىلەدى.
