قايرات پەن جۇلدىز كەلەسى فيلمگە بالالارىمەن بىرگە ءتۇسۋى مۇمكىن
ءانشى مەن ونىڭ جۇبايىنىڭ ءار باسقان قادامى حالىق نازارىندا. ءدال وسى سەبەپتى قايرات تا، جۇلدىز دا كورەرمەندەردى قۋانتۋعا اسىق.
جۇلدىزدى جۇپ الداعى ۋاقىتتا تاعى ءبىر كينوعا ءتۇسۋدى جوسپارلاپ وتىر. بۇل تۋرالى گۇلزيرا ايداربەكوۆا Hit-Tv ارناسىنا بەرگەن سۇحباتىندا ايتىپ بەردى، دەپ جازادى Stan.kz اقپاراتتىق اگەنتتىگى.
«ەكىنشى كينونىڭ تۇسىرىلىمىنە تاپسىرىس بەرىلدى. اللا قالاسا، سەناري ءبىزدىڭ كوڭىلىمىزدەن شىعىپ جاتسا، كۇزگە قاراي تاعى ءبىر جاقسى كينو تۇسىرەمىز دەگەن ۇمىتتەمىز»، - دەپ ءبولىستى گۇلزيرا ۇسەن قىزى.
العاشقى فيلمدە تاعدىر تالكەگىنە ۇشىراعان قىزدىڭ بەينەسىن سومداعان جۇلدىز بۇل جولى باسقا قىرىنان تانىلماق.
«ەندى دراما جاعىن كوردىك قوي، مۇمكىن كومەديا بولىپ قالار. ويتكەنى ولاردىڭ وتباسىندا كۇلكىلى وقيعالار، قىزىقتى اڭگىمەلەردى كەزىكتىرىپ جاتامىن. سوندىقتان دا تابيعاتىنا كومەديا دا كەلىپ قالار دەپ ويلادىم. ءوزىنىڭ اكتريسالىق قابىلەتىن تاعى دا ءبىر جاعىنان سىناپ كورسىن دەگەن ويمەن سول كومەديا جانرىن تاڭداپ وتىرمىز»، - دەيدى ايداربەكوۆا.
سونداي- اق، قايرات نۇرتاستىڭ اناسى ۇلى مەن كەلىنىنەن بولەك، نەمەرەلەرىن دە كينو الەمىنە ارالاستىرۋدى ءجون كورىپ وتىر.
«ارينە، قايرات پەن جۇلدىز بىرگە تۇسەدى. سەناري جازىلىپ بىتكەننەن كەيىن كورە جاتارمىز. ال ەندى ءتورت بالاسىندا بىردەي اكتەرلىك قابىلەت بولا قويماس. قايسىسىنىڭ بويىنان كورىپ جاتساق، سونىسىن تارتىپ كورەمىز. ەگەر كينونىڭ اراسىنا بالا قاجەت بولسا، ارينە»، - دەپ اعىنان جارىلدى ايداربەكوۆا.
