شىعىس قازاقستان وبلىسىنىڭ ۋنيۆەرسيتەتى دروندار قۇراستىرماقشى

اتالمىش ۋنيۆەرسيتەت زاماناۋي يندۋستريا تالاپتارىنا ساي جەتى وقىتۋ باعدارلاماسىن قولعا الىپ وتىر.

 «روبوتتالعان پيلوتسىز جۇيەلەر» باعدارلاماسى - سونىڭ بىرەۋى عانا. باعدارلامانى ۇيلەستىرۋشى تامار سەگەدا وسى جوبا اياسىندا ۆەنگريانىڭ وبۋدا ۋنيۆەرسيتەتىمەن، رەسەيدىڭ نوۆوءسىبىر مەملەكەتتىك تەحنيكالىق ۋنيۆەرسيتەتىمەن بايلانىس ورناتقاندارىن ايتادى.

«باعدارلاما پيلوتسىز تەحنيكانى ءوندىرۋ جانە پايدالانۋ، ازىرلەۋ بويىنشا قۇزىرەتتەردى الۋعا باعدارلانعان. وقىتۋ پروتسەسى جۇيەلىك ينجينيرينگتەن باستاپ اۆتوماتتى باسقارۋدىڭ الگوريتمدەرىن جازۋعا دەيىنگى كەزەڭدەرىن قامتيدى» - دەيدى ول.

اتالمىش باعدارلاما بويىنشا ءبىلىم العان تۇلەكتەر وڭىردەگى گەولوگيالىق كومپانيالارعا جۇمىسقا ورنالاسادى دەپ كۇتىلۋدە.

بۇگىندە گەولوگيالىق بارلاۋ، توپوگرافيالاۋ، اۋماقتىڭ ساندىق مودەلىن الۋ، مۇناي- گاز كەنىشتەرى مەن قۇرىلىس الاڭدارىنا مونيتورينگ جۇرگىزۋ، تەحنوگەندى جانە تابيعي اپات قاتەرلەرىن باقىلاۋ جۇمىستارىنا دروندار كەڭىنەن قولدانىلۋدا. باعدارلاما شاكىرتتەرى وسى درونداردى ءار سالاعا قاراي باعدارلامالاۋ ىسىمەن شۇعىلداناتىن بولادى.

بۇل سالاعا مامانداناتىن ماگيسترلەر «قازسينك» ج ش س مەن توتەنشە جاعدايلار كوميتەتىنىڭ تاپسىرىسى بويىنشا وقىتىلاتىن بولادى.

ءدال وسىنداي ەكىجاقتى كەلىسىمشارت اياسىندا «ناقتى جەر وڭدەۋ»، «مەديتسينالىق تەحنيكا»، «ءادديتيۆتى تەحنولوگيالار»، «جەردى زەرتتەۋدىڭ ساندىق ادىستەرى»، «تولىقتىرىلعان ۆيرتۋالدى شىندىق»، «ءومىردى قامتاماسىز ەتۋدىڭ زياتكەرلىك جۇيەسىن باسقارۋ» سياقتى جاڭا تەحنولگيالارعا نەگىزدەلگەن ماماندىقتار بويىنشا ءبىلىم بەرۋ قولعا الىنباق. بۇل جەتى باعدارلاما دا ءبىلىم جانە عىلىم مينيسترلىگىنىڭ ماقۇلداۋىندا جاتىر. سونىمەن بىرگە ۋنيۆەرسيتەت قابىرعاسىندا وقىتۋعا قاجەت ماتەريالدىق- تەحنيكالىق بازا دايىندالۋدا.

ايتا كەتەيىك، اتالمىش ۋنيۆەرسيتەت عالىمدارى جەرگىلىكتى زاۋىتتارمەن بىرلەسىپ تانتال مەن تيتاننان يمپلانتتار ازىرلەۋ جوباسىن ىسكە اسىرۋدا.

فوتو: wsgz.ru

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى