استاناعا كوگىلدىر وتىن قاشان جەتەدى؟
بۇل تۋرالى بۇگىن ۇكىمەت وتىرىسىندا پرەزيدەنتتىڭ 5 الەۋمەتتىك باستاماسىن جۇزەگە اسىرۋ جول كارتاسىنىڭ جوباسىن تانىستىرعان ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات.
ونىڭ ايتۋىنشا، ەلباسىنىڭ 5 الەۋمەتتىك باستاماسىنىڭ ەلدى گازبەن قامتاماسىز ەتۋدى جالعاستىرۋ باعىتىنىڭ ورىندالۋىنا ەنەرگەتيكا مينيسترلىگى جاۋاپتى بولادى. اتالعان باعىت «سارىارقا» ماگيسترالدىق گاز قۇبىرىنىڭ ءبىرىنشى كەزەڭىنىڭ قۇرىلىسىنا شوعىرلانعان.
«جوبانى قارجىلاندىرۋ سحەمالارى مەن شارتتارى ماۋسىمعا قاراي ايقىندالاتىن بولادى. ەۋروپا قايتا قۇرۋ جانە دامۋ بانكى، ەۋرازيا دامۋ بانكى جانە باسقا دا حالىقارالىق قارجى ۇيىمدارىنىڭ قاراجاتىن تارتۋ جوسپارلانۋدا. اكىمدەر ماۋسىم ايىندا ماگيسترالدىق گاز قۇبىرى جەلىسى بويىنشا جەر ۋچاسكەلەرىن بولەتىن بولادى»، - دەدى ول.
ءمينيستردىڭ سوزىنە قاراعاندا، جوبانىڭ باستالۋ سالتاناتىنىڭ كۇنى اعىمداعى جىلعى شىلدەگە بەلگىلەنگەن. «گاز قۇبىرىنىڭ قۇرىلىسىن اياقتاۋ كەلەسى جىلعى جەلتوقسانعا جوسپارلانعان»، - دەدى تيمۋر سۇلەيمەنوۆ.
جالپى، ونىڭ دەرەگىنشە، جول كارتاسى 35 ءىس-شارادان تۇرادى. 3 كودەكسكە، 12 زاڭعا، ۇكىمەتتىڭ 6 قاۋلىسىنا جانە ۇلتتىق بانك باسقارماسىنىڭ 3 قاۋلىسىنا زاڭنامالىق قامتاماسىز ەتۋ بولىگىندە وزگەرىستەر ەنگىزۋ كوزدەلگەن. سونداي-اق ءبىرقاتار مينيسترلەردىڭ بۇيرىقتارى مەن اكىمدىكتەر قاۋلىلارىن قابىلداۋ جوسپارلانۋدا.
