شىلدەدە يپوتەكالىق كرەديتتەردى ساتىپ الاتىن ارنايى ەنشىلەس ۇيىم قۇرىلادى
«وتكەن ۇكىمەت وتىرىسىندا ۇلتتىق ەكونوميكا مينيسترلىگىنە مەملەكەتتىك ورگاندارمەن جانە ۇلتتىق بانكپەن بىرلەسىپ، ەلباسىنىڭ بەس الەۋمەتتىك باستاماسىن ىسكە اسىرۋ بويىنشا جول كارتاسىن دايىنداۋ تاپسىرىلعان بولاتىن. بۇل جول كارتاسىندا ناقتى ءىس-شارالار جانە ولاردىڭ ورىندالۋ مەرزىمدەرى مەن ناتيجەلەرى قامتىلۋى ءتيىس. سول جول كارتاسىنىڭ جوباسى دايىندالدى»، - دەپ وتىرىستى اشقان پرەمەر-مينيستر باقىتجان ساعىنتايەۆ جوبانى تانىستىرۋ ءۇشىن العاشقى ءسوزدى ۇلتتىق ەكونوميكا ءمينيسترى تيمۋر سۇلەيمەنوۆكە بەردى.
ءمينيستردىڭ ايتۋىنشا، ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ باستاماسىنىڭ ورىندالۋىنا ۇلتتىق بانك، ال ۇكىمەت تاراپىنان ينۆەستيتسيالار جانە دامۋ مينيسترلىگى جاۋاپتى بولادى.
«نەگىزگى شارالار «7-20-25» باعدارلاماسىن بەكىتۋگە جانە ونى ىسكە اسىرۋ ءۇشىن نورماتيۆتىك-قۇقىقتىق اكتىلەرگە وزگەرىستەر ەنگىزۋگە قاتىستى بولىپ وتىر. شىلدە ايىنا دەيىن يپوتەكالىق كرەديتتەردى ساتىپ الاتىن ارنايى ەنشىلەس ۇيىم قۇرىلاتىن بولادى. سونىمەن قاتار «نۇرلى جەر» باعدارلاماسى بويىنشا ينفراقۇرىلىمدى جىلىنا 20 ميلليارد تەڭگەگە دەيىن قارجىلاندىرۋعا، ونى ۇلعايتۋ جانە «7-20-25» باعدارلاماسىنىڭ نورمالارىن ەسكەرە وتىرىپ، وعان تۇزەتۋلەردى ەنگىزۋ قاراستىرىپ وتىر»، - دەدى تيمۋر سۇلەيمەنوۆ.
