ەلىمىزدە اسكەرگە شاقىرتىلعان جىگىتتەردىڭ تورتتەن ءبىرىنىڭ دەنساۋلىعى جارامسىز
ەل قورعايدى دەگەن جاستاردىڭ اراسىندا ومىرتقاسى قيسايعان، جۇيكەسى توزعان نەمەسە كوزى كورمەيتىندەر كوپ. ال قورعانىس مينيسترلىگى اسكەرىمىز ساپالى، ەشكىم اسكەردەن قاشپايدى دەپ وزدەرىنە شاڭ جۋىتپايدى، دەپ حابارلايدى ك ت ك ارناسى.
جالپى بيىل اسكەر قاتارىنا شاقىرىلعان جاستاردىڭ سانى 35 مىڭنان اسادى. سونىڭ 17 مىڭنان استامى وسى كوكتەمدە اسكەرگە بارۋى كەرەك. ءبىراق، ولاردىڭ ناقتى سانى تەك مەديتسينالىق تەكسەرۋدەن كەيىن عانا بەلگىلى بولماق. ويتكەنى، دەنساۋلىق جاعدايىنا بايلانىستى قالىپ قوياتىندار از ەمەس ەكەن. مەديتسينالىق تەكسەرۋ قارۋ ۇستاۋعا جارايتىنداردىڭ سانىن عانا ەمەس، جاپى جاستاردىڭ دەنساۋلىعىن انىقتاۋعا مۇمكىندىك بەرەدى. ياعني، كوز-قۇلاعى مەن دەنە ءبىتىمىن تولىق تەكسەرىپ، بويى مەن سالماعىنا دەيىن ولشەپ بەرەدى.
وسىدان امان وتكەندەرى ءبىزدىڭ اسكەرىمىزدىڭ وتىز پايىزىن عانا تولتىرادى ەكەن. ويتكەنى، اسكەرىمىزدىڭ 70 پايىزى كاسىبي جاۋىنگەرلەرمەن جاساقتالىپ قويعان. ال ونداعى ءبىر ساربازدى جىلدىق قامتاماسىز ەتۋگە 1 ميلليون تەڭگەدەن استام جۇمسايدى. ال بيىلعا شامامەن 60 ميلليارد تەڭگە ارناپ وتىر ەكەن.
«سەرجانتتار مەن قاتارداعى جاۋىنگەرلەردىڭ قۇرامى 70 پايىزدان استامى كاسىبي، ناعىز اسكەري ماماندارمەن جاساقتالسا، قالعان 30 پايىزىنا دەيىن ءبىز مەرزىمدى اسكەري قىزمەتكە شاقىرىلاتىن جاستارمەن تولىقتىرۋ جۇمىستارىن جۇرگىزىپ وتىرامىز. دەمەك، ءبىزدىڭ اسكەرىمىز ناعىز كاسىبي، جوعارى دەڭگەيدە دايىندالعان جاقسى مامانداندىرىلعان اسكەر بولعاندىقتان، جىلداعى كەلەتىن جىلداعى كەلەتىن جاستارىمىز 30 پايىز»، - دەيدى استانا قالاسىنىڭ قورعانىس ىستەرى جونىندەگى دەپارتامەنتى باستىعىنىڭ ورىنباسارى، تاربيە جانە يدەولوگيالىق جۇمىستار ءبولىمىنىڭ باستىعى عاني ارتىقوۆ.
اسكەرگە شاقىرىلعانداردىڭ اراسىندا اۋرۋ- سىرقاۋلار تىم كوبەيىپ بارادى. دەنساۋلىعىن تەكسەرە كەلگەندە كەم دەگەندە تورتتەن ءبىرى اسكەر قاتارىنا جارامايتىن بولىپ شىعادى ەكەن. سولاردىڭ اراسىندا ەڭ كوپ كەزدەسەتىنى حيرۋرگيالىق اۋرۋلار بولىپ وتىر.
اتاپ ايتقاندا، ومىرتقالارى قيىق بولىپ شىعادى. نەمەسە سۇيەكتەرى سىنىپ، ونىسى دۇرىس بىتپەي قالعاندارى دا جەتەرلىك ەكەن. تەراپيالىق اۋرۋلار دا از ەمەس. قولىنا قارۋ الىپ، ەل قورعاعىسى كەلەتىندەردىڭ ءبىرازىنىڭ جۇيكەسى سىر بەرگەن، ميى شايقالعان. ونىسىن اسكەري بولىمشەدە مەديتسينالىق تەكسەرۋدەن وتكەندە ءبىر-اق ءبىلىپ جاتادى دەيدى ماماندار.
«ءجيى كەزدەسەتىن تەراپيالىق اۋرۋلار. ودان كەيىن بالالاردىڭ كوپ جاراقات الۋى. ميدىڭ شايقالۋى، كوپ كەزدەسەدى. كەيىنگى جىلدارى كوز اۋرۋلارى كوپ كەزدەسىپ جاتىر. كوبىسى دياگنوزدارىن وسى ۆوەنكوماتقا كەلىپ انىقتاپ جاتىر»، - دەيدى قاراعاندى وبلىستىق قورعانىس ىستەرى باسقارماسىنىڭ مەديتسينالىق قىزمەت باسشىسى تالعات سەيىتجانوۆ.
ايتسە دە اسكەرگە بارعىسى كەلەتىندەر سانى ازايماي وتىر ەكەن. ماسەلەن، ءبىر قاراعاندى وبلىسىنىڭ وزىنەن بيىل مىڭ جارىم جاس ءورىم اتتانعالى وتىر. بۇل مەجە جىل سايىن ساقتالىپ كەلەدى ەكەن. بارلىعىنىڭ دا تۋعان ەلىمە قىزمەت ەتسەم دەگەن ارمانى اسقاقتاپ تۇر. قاراعاندى وبلىسىندا اسكەرگە شاقىرتىلعانداردىڭ العاشقى لەگى 3 كۇننەن كەيىن اتتاناتىن بولادى. ال رەسپۋبليكا بويىنشا 1991 - 2000 - جىلدار ارالىعىندا تۋعان 18 مىڭعا جۋىق جاس ءوسپىرىم كۇزگى شاقىرىلىمعا قالادى.
