نۇرسۇلتان نازاربايەۆ اۋەجايىندا «ۋاقىتشا ايالدايتىن كولىكتەر جولاعى» پايدا بولادى
ەلوردا باسشىسى بارىپ كورگەن نىسانداردىڭ ءبىرى «نۇرلى جول» تەمىرجول ۆوكزالى بولدى. ونىڭ ينفراقۇرىلىمى تۋرالى اكىم ورىنباسارى سەرگەي حوروشۋن باياندادى.
اتاپ وتىلگەندەي، جولاۋشىلاردى وتىرعىزىپ- تۇسىرۋدە قولايلى جاعداي جاساۋ ءۇشىن تەمىرجول ۆوكزالىنا جاقىن جۇرەتىن اۆتوبۋستاردىڭ كەلۋ-كەتۋ باعىتى وزگەرتىلدى. قازىرگى تاڭدا «نۇرلى جول» ۆوكزالى ايماعىنا 11 باعدار قاتىنايدى. بۇل جۇمىستار «قازاقستان تەمىر جولى» ا ق- مەن بىرلەسىپ ورىندالدى.
سونىمەن قاتار، تەمىرجول ۆوكزالىنا كەلگەن جولاۋشىلار مەن اۆتوبۋس كۇتۋشىلەردىڭ ايالداماعا دەيىن جولى ايتارلىقتاي قىسقاردى. وعان قوسا، ەسكالاتورلاردىڭ سانى كوبەيتىلىپ، جولاۋشىلار مەن جۇك تاسىمالدايتىن ليفتىلەر ىسكە قوسىلدى.
ياعني، قولدانىستاعى 52 ەسكالاتورعا 12 ەسكالاتور قوسىلدى، بۇل ادامداردىڭ ءبىرىنشى قاباتتان بىردەن ءۇشىنشى قاباتقا شىعىپ، تۇسۋىنە مۇمكىندىك بەرەدى. جاڭا تەمىرجول ۆوكزالىنىڭ عيماراتىندا قازىر 26 ليفت جۇمىس ىستەپ تۇر، ونىڭ 6 ۋى - جولاۋشىلارعا، 4 ۋى سىيىمدىلىعى ۇلكەن جۇكتەرگە ارنالعان.
بۇدان كەيىن اكىم نۇرسۇلتان نازاربايەۆ حالىقارالىق اۋەجايىنىڭ الاڭىن بارىپ كوردى. سەبەبى، قالا تۇرعىندارى استانا اۋەجايىنا بارار جولدىڭ قولايسىزدىعىنا بىرنەشە رەت شاعىمدانعان بولاتىن. اۋەجاي باسشىلىعىنا جولاۋشىلار كولىگى باسقارماسىمەن بىرلەسىپ، ۋاقىتشا ايالدايتىن اۆتوكولىكتەر ءۇشىن ارنايى جولاعى بار الاڭ ءبولۋ تاپسىرىلدى. اتالمىش جۇمىستار تاياۋ ۋاقىتتا جۇزەگە اسىرىلاتىن بولادى.
