تىرناعىنىڭ بوياۋىن كەتىرمەك بولعان الماتىلىق ايەلدىڭ ساۋساقتارى كۇيىپ قالدى
قالالىق قوعام دەنساۋلىعىن قورعاۋ دەپارتامەنتى اتالعان وقيعاعا قاتىستى تۇسىنىكتەمە بەردى.
«بىزدە مۇنداي جاعداي ءبىرىنشى رەت كەزدەسىپ وتىر. ەڭ الدىمەن، قۇتىنىڭ ىشىندە ۋلى زاتتار بار ما، جوق پا سونى تەكسەرۋ كەرەك. ەكىنشى جاعىنان ايەلدىڭ بۇل زاتقا اللەرگياسى بولۋى مۇمكىن. زەرتحانادا بۇل سۇيىقتىقتىڭ قۇرامى تەكسەرىلىپ جاتىر. كەيىن سۇيىقتىقتاعى ۋلى زاتتاردىڭ مولشەرى قالىپتان اسىپ كەتكەنى انىقتالعان بولسا، وندا وقيعا ءىسىن سوتقا بەرۋگە بولادى»، - دەدى دەپارتامەنت باسشىسى ايزات مولداقاسىموۆا.
ايتا كەتۋ كەرەك، بۇل وقيعا 6 ناۋرىزدا بولعان. گۇلجيحان ماۋتوۆا ساين كوشەسىندەگى دۇكەندەردىڭ بىرىنەن تىرناق بوياۋىن كەتىرەتىن سۇيىقتىق ساتىپ العان.
«كەشكى ساعات 10 شاماسىندا بارلىق دۇكەندەر جابىق بولدى. تەك «دانا» دۇكەنى جۇمىس ىستەپ تۇرعان. 100 تەڭگەگە سۇيىقتىق ساتىپ الدىم. جارتى ساعات بويى بوياۋدى ىسقىلادىم، كەتپەدى. بۇرىن مەن وسىنداي قۇتىنى پايدالاناتىنمىن، ەشقانداي پروبلەما بولعان ەمەس. سوسىن قولىم اشي باستادى، كەيىن قولىم كۇيىپ، تەرىم ءتۇسىپ قالدى. سىرتىندا اتسەتون جوق دەپ جازىلعان جانە ونىڭ ءيىسى شىعىپ تۇردى»، - دەدى كەلىنشەك.
گۇلجيحان ماۋتوۆا دۇكەنگە بارعاندا دۇكەن يەسى سۇيىقتىقتى كوتەرمە بازاردان ساتىپ العانىن ايتقان.
«دۇكەنشى وسى پارتيادان مۇلدەم شاعىم بولماعانىن ايتتى»، - دەدى گ. ماۋتوۆا.
