استانانى گازداندىرۋعا بريتاندىقتار قىزىعۋشىلىق تانىتۋدا - قايرات ءابدىراحمانوۆ

«سىرتقى ىستەر مينيسترلىگى ءبىرقاتار يندۋستريالىق ورتالىق پەن ەلوردانى گازبەن جابدىقتاۋعا قوساتىن جاڭا گاز قۇبىرى جوباسىنا ينۆەستيتسيا تارتۋعا كومەكتەسەتىن بولادى. قازىرگى ۋاقىتتا بريتاندىق ينۆەستورلاردان ناقتى ۇسىنىس بار»، - دەپ جازادى مينيستر «كازاحستانسكايا پراۆدا» گازەتىنىڭ بۇگىنگى نومىرىندە جارىق كورگەن باعدارلامالىق ماقالاسىندا.

 قايرات ءابدىراحمانوۆتىڭ اتاپ وتۋىنشە، قازاقستاندا ينفراقۇرىلىمدىق جوبالاردىڭ باستى كۇردەلىلىگى جەر شالعايلىعىمەن بايلانىستى. سوندىقتان ولار ناقتى تەحنيكالىق ەسەپتەۋلەر مەن حالىقارالىق تەڭ قارجىلاندىرۋدى قاجەت ەتەدى.

سونىمەن قاتار ونىڭ ايتۋىنشا، مۋنيتسيپالدى، ونەركاسىپتىك جانە جەكە سەكتورلاردى گازعا كوشىرۋ ەنەرگيا تيىمدىلىگىن ارتتىرۋعا جانە كليمات وزگەرۋىنىڭ تۇراقتىلىعىن قامتاماسىز ەتۋگە سەپتىگىن تيگىزەدى. بۇل قازاقستاننىڭ ءبىرقاتار حالىقارالىق قارجى ينستيتۋتتارىمەن ىنتىماقتاستىعىنىڭ باسىمدىعى سانالادى.

«استانا، قاراعاندى، تەمىرتاۋ جانە جەزقازعان قالالارىنىڭ تۇرعىندارى مەملەكەت باسشىسىنىڭ باستاماسىن زور قۋانىشپەن قابىلداعانىنا سەنىمىم مول»، - دەپ اتاپ وتەدى سىرتقى ىستەر ءمينيسترى.

 5 - ناۋرىزدا قازاقستان پرەزيدەنتى نۇرسۇلتان نازاربايەۆ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىن جاريا ەتتى. بەسىنشى باستاما ەلدى گازبەن قامتاماسىز ەتۋدى جالعاستىرۋدى كوزدەيدى. اتاپ ايتقاندا قاراوزەك ( قىزىلوردا وبلىسى) - جەزقازعان- قاراعاندى- تەمىرتاۋ- استانا باعىتىندا ماگيسترالدى گاز قۇبىرىن سالۋ جوباسىن جۇزەگە اسىرۋدى قاراستىرادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى