جەتى پايىزدىق يپوتەكانىڭ اي سايىنعى تولەماقىسى ەكى ەسەگە تومەن بولادى

ەكونوميست ساپارباي جۋبايەۆتىڭ ويىنشا، بۇگىندە ينفلياتسيانىڭ دەڭگەيى 7 پروتسەنت، ال ۇلتتىق بانكتىڭ بازالىق ستاۆكاسى 9,5 پروتسەنت بولىپ تۇرعاندا ەكىنشى دەڭگەيلى بانكتەرگە ارزان يپوتەكانى بەرگەن ءتيىمسىز.

«مەنىڭشە، «7-20-25» باعدارلاماسى اياسىندا ءبىر تريلليون تەڭگەنىڭ يپوتەكالىق قورى قۇرىلادى. ول تۇرعىن ءۇي قۇرىلىس جيناق بانكى سياقتى مەملەكەتتىك قارجى ۇيىمى رەتىندە جۇمىس ىستەيدى. يپوتەكالىق كومپانيا دەيمىز بە، يپوتەكالىق دامۋ قورى دەيمىز بە، اتالعان ۇيىم كەز كەلگەن بانكپەن جۇمىس ىستەي بەرەدى. ءبىراق بانكتەر تەك ورىنداۋشى قىزمەتىن، ياعني مەملەكەتتىڭ ءبولىپ بەرگەن قارجىسىن تاراتۋدى عانا ىسكە اسىرادى. سول ءۇشىن ازعانداي وتەماقىسىن الۋى مۇمكىن»، - دەدى س. جۋبايەۆ قازاقپارات ءتىلشىسىن بەرگەن سۇحباتىندا.

ونىڭ ايتۋىنشا، بۇگىندە ورتاشا ەسەپپەن ءبىر يپوتەكانىڭ ايلىق تولەماقىسى 100-120 مىڭ تەڭگەنى قۇراپ وتىر. ونداي اقشا ءبارىنىڭ قالتاسىنا شاق كەلە بەرمەيدى.

«7-20-25» باعدارلاماسى اياسىندا اي سايىنعى تولەم ەكى ەسەگە تومەن بولادى. مەن ءوزىم ەسەپتەپ كوردىم. ماسەلەن، 15 ميلليون تەڭگەنىڭ يپوتەكاسى بولسا، اي سايىن بار بولعانى 55-65 تەڭگەنى عانا تولەيسىڭ. ەندى، 7 پروتسەنتپەن تولەگەندە العاشقى ونجىلدىقتا نەسيەنىڭ ءوزى وتەلسە، كەيىنگى ونجىلدىقتا ول ەكى ەسەلەنەدى. ءبىراق يپوتەكانىڭ مەرزىمى 25 جىل بولعاننان كەيىن ول ونشا بىلىنبەيدى. سوسىن الدىن الا تولەۋ دە بولاتىن شىعار»، - دەپ اتاپ كورسەتتى س. جۋبايەۆ.

 ايتا كەتەيىك، وتكەن اپتادا ق ر پرەمەر- ءمينيسترى باقىتجان ساعىنتايەۆ «7-20-25» باعدارلاماسىن ىسكە اسىرۋ تەتىكتەرىن ازىرلەۋدى تاپسىرعان بولاتىن. ق ر ينۆەستيتسيالار جانە دامۋ ءمينيسترى جەڭىس قاسىمبەكتىڭ ايتۋىنشا، ارزان يپوتەكا بارلىعىنا جەتەدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى