تابيعاتتى قورعاۋ پروكۋرورلارى قايرات قوجامجاروۆتىڭ سىنىنا ىلىكتى
باس پروكۋرور تابيعاتتى قورعاۋ پروكۋرورلارىنىڭ قىزمەتىن سىناپ، ولاردىڭ ەنجارلىعىن، جۇمىس تيىمدىلىگىنىڭ تومەندىگىن، ەكولوگيالىق زاڭناما بۇزۋشىلىقتارىنا دەر ۋاقىتىندا قارسى ارەكەت ەتپەۋلەرىن سىنادى.
«كۇن سايىن دەرلىك ب ا ق- تا، الەۋمەتتىك جەلىلەردە قوعام قورشاعان ورتاعا زياندى اسەرلەردىڭ سالدارىنان دەنساۋلىقتى قورعاۋ ماسەلەلەرىن جاريا تالقىلاپ جاتادى. وكىلەتتى مەملەكەتتىك ورگاندارعا اتموسفەرا اۋاسىنىڭ لاستانۋىنا قارسى ارەكەتسىزدىك، اۋىزسۋدىڭ جوقتىعى، تۇرمىستىق حالدىقتاردىڭ بەي-بەرەكەت ساقتالۋى، سۋ تاسقىنى ماسەلەلەرىنە قاتىستى سىن بار. مۇنىڭ بارلىعى دا ەكولوگيا سالاسىنداعى جاعدايدى جاقسارتۋ بويىنشا ناقتى ۇسىنىستار ازىرلەۋدى تالاپ ەتەدى»، - دەدى قايرات قوجامجاروۆ.
باس پروكۋرور وڭتۇستىك قازاقستان وبلىسى پروكۋرورلارىنىڭ نازارىن سۋ قورعاۋ ايماقتارىندا جەر تەلىمدەرىن ءبولۋ، تۇرمىستىق قاتتى قالدىقتاردى جويۋ ماسەلەلەرىنە اۋداردى. ال شىعىس قازاقستان وبلىسى پروكۋرورلارىنا اتموسفەرا اۋاسىنىڭ لاستانۋى، جەكەلەگەن ەلدى مەكەندەردى تازا اۋىز سۋمەن قامتاماسىز ەتۋ ماسەلەسىن ءجىتى نازاردا ۇستاۋ تاپسىرىلدى. اقمولالىق پروكۋرورلارعا شۋچە-بۋراباي كۋرورتتى ايماعىن دامىتۋعا بولىنگەن بيۋجەت قاراجاتىنىڭ ءتيىمدى پايدالانۋىن باقىلاۋعا الۋ جۇكتەلدى. ماڭعىستاۋ وبلىسىنىڭ پروكۋرورلارى بورتىندا مۇناي ونىمدەرى بار تەڭىز كەمەلەرىن ۋتيليزاتسيالاۋ پروبلەمالارى مەن وندىرىستىك قالدىقتارمەن جەردىڭ لاستانۋى ماسەلەسىن قاپەردە ۇستايتىن بولادى.
سونىمەن قاتار قايرات قوجامجاروۆ اعىمداعى جىلعا ارنالعان قورشاعان ورتانى قورعاۋ سالاسىنداعى زاڭدىلىققا پروكۋرورلىق قاداعالاۋ تيىمدىلىگىن ارتتىرۋ شارالارىنىڭ كەشەندى جوسپارىن ازىرلەۋدى تاپسىردى.
مۇنان بولەك، باس پروكۋرور قورشاعان ورتانى قورعاۋ ءۇشىن «نۇرلى جول» ، «2020-جىلعا دەيىن وڭىرلەردى دامىتۋ»، «2021-جىلعا دەيىن اگروونەركاسىپ كەشەنىن دامىتۋ» مەملەكەتتىك باعدارلامالارىن جۇزەگە اسىرۋعا بولىنگەن بيۋجەت قاراجاتتارىنىڭ ءتيىمدى جۇمسالۋىن قاداعالاۋدى تاپسىردى.
كەڭەس قورىتىندىسىندا ءبىرقاتار ناقتى تاپسىرما بەرىلدى.
