ەلىمىزدەگى ەڭ تانىمال جۇرگىزۋشى ەلۆيرا ەرعالينا ايگىلى بولۋدىڭ قۇپياسىمەن ءبولىستى - فوتو
باتىل ءارى ەشكىمنىڭ سىنىنا سىنبايتىن جۋرناليست تىلشىگە بەرگەن سۇحباتىندا وزىنە قويىلعان سۇراقتاردىڭ بارلىعىنا اشىق جاۋاپ بەردى.
- ەڭ الدىمەن، جاڭا باستاما قۇتتى بولسىن دەگىم كەلەدى.
- راحمەت!
- ەلۆيرا ءۇشىن بۇل العاشقى تەلەجوبا ەمەس، بۇعان دەيىن دە ءسىز كوگىلدىر ەكراننان جۋرناليس رەتىندە سيۋجەت ءتۇسىرىپ، سۇحباتتار الىپ شىعىپ ءجۇردىڭىز. دەگەنمەن، تەلەجۇرگىزۋشى رەتىندە، ءوزىڭىزدى العاش رەت سىناپ جاتسىز، سولاي ەمەس پە؟ قالاي بولىپ جاتىر؟
- وسى سۇراققا تەلەگرامداعى كانالىما جازعىم كەلىپ جۇرگەن ەدى، نەگىزى. ادام وتىرىپ الىپ، الەۋمەتتىك جەلىدە سايراي بەرەدى. وسى ۋاقىتقا دەيىن بلوگەر رەتىندە، ساحنادا بولسىن، تەلەۆيدەنيە سالاسىندا بولسىن جۇرگىزۋشىلەردى سىناپ، وزىمىزشە، پىكىرلەر جازىپ قالدىراتىنبىز. ءبىراق، قارسى الدىڭدا ون كامەرانىڭ وبەكتيۆى جانىپ، قوناقتاردىڭ قوبالجىعانىن سەزگەندە، ستۋدياداعى دايىندىق جۇمىستارىن كورىپ-سەزىنگەندە، كادىمگىدەي ادام ويىن شاشىراتىپ الادى ەكەن. بۇل جوبا - مەنىڭ دەبيۋتىم. سوندىقتان، قوبالجۋ بولدى. ءبىر سوزبەن ايتقاندا، سىرت كوزگە ءبارى ادەمى كورىنۋى مۇمكىن، ايتارىم، تەلەجۇرگىزۋشى بولۋ - وڭاي شارۋا ەمەس.
- جوباعا قالاي كەلدىڭىز؟ قاراپايىم بلوگ جۇرگىزىپ جۇرگەن ەلۆيرانى تەلەجۇرگىزۋشى رەتىندە كورە العان قاي پروديۋسەر؟
- نەگىزى مەن بۇل جوباعا دەيىن «تاڭشولپان» باعدارلاماسىندا پروديۋسەرلىك قىزمەتتە بولدىم. سونىمەن، ۋاقىتشا دەمالىس الىپ، الماتىعا كەتىپ بارا جاتقان بولاتىنمىن. اۋەجايعا كەلىپ، تىركەۋدەن وتكەنىم سول، ماعان اسحات سادىرباي قوڭىراۋ شالدى. «تۇنگى ستۋديا» باعدارلاماسىن قولعا الىپ جاتىرمىز. سەنى قايراتتىڭ جانىنا ەكىنشى جۇرگىزۋشى رەتىندە ۇسىنىپ جاتىرمىن. كەلەسىڭ بە؟»، - دەدى. ادەتتە، جۇرگىزۋشىلەردى كاستينگ ارقىلى ىرىكتەپ الادى. ونىڭ جاۋابىن، ءبىراز كۇتەسىڭ دەگەندەي.... ەگەر، جاعداي سونداي بولسا، مەنى جولىمنان قالدىرما دەدىم. سوندا اسحاتتىڭ مىنا ءسوزى ماعان قاتتى اسەر ەتتى. ول «يا سەن وتىراسىڭ ول جەردە، نە قايرات جالعىز جۇرگىزەدى»، - دەدى. مۇمكىن، «بۇل ماعان بۇيىرىپ تۇرعان باق شىعار» دەپ مەن كەلىسىم بەردىم.
- وسىعان دەيىن وسىنداي ۇسىنىستار بولدى ما؟
- بولدى. جالپى، تەلەجۇرگىزۋشى تاڭدار الدىندا الدىن-الا «پيلوت نۇسقا» تۇسىرىلەدى. سوسىن جوباعا قانشالىقتى سايكەس ەكەنىن انىقتايدى. ونداي مۇمكىندىكتەر بولعان. كەيبىرەۋىندە مەنىڭ ءوز-ءوزىمدى ۇستاۋىم كەلمەي جاتسا، ال، كەيبىر جوبالارعا مەنىڭ جاسىم سايكەس بولمادى.
- وسى جولعا ءسىز ۇزاق جىلعى دايىندىقپەن كەلگەن سياقتىسىز؟! قازىر yotube جەلىسىندە ءتۇرلى بلوك جۇرگىزىپ، ونىڭ ىشىندە جۇلدىزداردان سۇقبات الىپ جۇرگەن جۇرگىزۋشىلەردىڭ قاراسى كوبەيىپ كەتتى. دەگەنمەن، بۇل باستامانى العاش قولعا العان ءسىز.
كامەرا قوسىپ، جۇلدىزداردى جۇرگەن جەرىنەن ۇستاپ الىپ، اشىق سۇحبات الاڭىنا شاقىرعان، ءبىرشاما ۆيدەولارىڭىز كوپ كورسەتىلىم جينادى. قازىرگى جۇمىسىڭىزدى سول كەزدە كوزدەپ، وسىعان قاراي الىستان ۇمتىلعان سياقتىسىز.
- مەن نەگىزى، سوڭعى كەزدە ومىرىمدە ورىن العان وقيعالارعا قاراپ، «مەنىڭ جوسپارلارىم، قۇدايدىڭ جوسپارلارىنىڭ الدىندا بولماي قالدى» دەپ كۇلەمىن.
جاقىندا ءبىر وقىرمانىم «ەلۆيرا نەگە جۇمىستا تۇراقسىز؟» دەپ سۇراپ جاتىر. راس، وسى ۋاقىتقا دەيىن مەن ءبىر-بىرىمەن مۇلدەم سايكەس ەمەس سالالاردا جۇمىس ىستەپ كوردىم. شاش ارلەپ ءجۇرىپ، جۇلدىزدارمەن تىلدەستىم. قولونەرمەن دە اينالىستىم. پروديۋسەرلىكتى اتقارىپ ءجۇرىپ، باعدارلاما ءتۇسىرۋدىڭ ىشكى قۇرىلىسىمەن جاقىن تانىستىم. قازىر قاراپ وتىرسام، مۇنىڭ ءبارى بەكەر ەمەس. وسى كۇنگە جەتۋ ءۇشىن جاراتۋشى يەم، سونداي جولمەن الىپ كەلگەن شىعار دەپ ويلاپ قويامىن؟! كەلىسەم، بۇل جولعا جەتۋ ءۇشىن - ۇزاق جول ءجۇردىم. ءبىر قۋانتارلىعى - ناتيجەسىز ەمەس. بۇل ساندىراق ەمەس، سوعان سەندىم.
- وسى جوباعا بەكىتىلگەننەن كەيىن ەلۆيرا ستيلىن وزگەرتە باستادى. بۇعان دەيىن، بەتىڭىزگە قالىڭ كورەرمەننىڭ الدىندا، كوپ قىزداردىڭ باتىلى جەتپەيتىن وتا جاساتتىڭىز.
- مەن بۇرىننان ءوزىمنىڭ تومپاقتىعىما، بويىمنىڭ كىشكەنتايلىعىنا كوڭىلىم تولمايتىن. ءتىپتى، اناما جىلايتىن كەزدەرىم بولاتىن. «نەگە مەنىڭ بويىم كىشكەنتاي؟»، «نەگە مەنىڭ بەتىم تومپاق؟» دەگەن كومپلەكس بار ەدى. قازىر، سول تومپاقتىق، جاستىقتىڭ بەلگىسى ەكەندىگىن ءتۇسىندىم. دەسە دە، مەن بەتىمە بىلتىر وتا جاساتقان بولاتىنمىن. ول كەزدە مۇنداي جوبادا جۇمىس ىستەيمىن دەگەن وي جوق بولاتىن، مادەنيەت باسقارماسىندا جۇرگەن كەزىم. جاي، ءوزىمنىڭ ىشكى كومپلەكسىمدى جويىپ، ءوزىمدى سابىرعا كەلتىرەيىن دەگەن قادامىم بولاتىن. سونشالىقتى، ايتاتىنداي، تەرىمدى الىپ تاستاپ، باسقا بىرەۋدىڭ بەتىن سالىپ العان جوقپىن، بار بولعانى، بەتتى تومپايتىپ تۇراتىن مايلاردى الدىرتۋعا تىرىستىم. وكىنىشكە قاراي، ولار مەندە وتە از ەكەن. تاعى دا ايتامىن، ول كەزدە جۇرگىزۋشى بولامىن دەگەن وي مۇلدەم بولعان جوق. سوعان قاراعاندا، قۇداي مەنى الدىن-الا دايىنداعان سياقتى، بەتىمدى تۇزەپ، وتا جاساتقانىم راس. ول ءبىر سونداي قورقىنىشتى زات ەمەس.
- ال، ۇزىن شاشىڭىزدى قيۋ - جوبا جەتەكشىلەرىنىڭ تالابى ەمەس پە؟
- «تۇنگى ستۋديا» باعدارلاماسىنىڭ جۇرگىزۋشىسى رەتىندە تولىق بەكىتىلگەننەن كەيىن، مەن ۇلتتىق ارنانىڭ وزگە باعدارلاما جۇرگىزۋشىلەرىنەن قالايدا ەرەكشەلەنۋ كەرەك دەپ شەشتىم. بارىندە ۇزىن شاش بار، ءبارى ەفيرگە شاشتارىن بۇيرالاپ، ءتۇيىپ شىعادى. ال، مەن ولارعا ۇقساعىم كەلمەدى. وسىلايشا، دينارا دەگەن ستيليستپەن اقىلداسىپ، بەتىمنىڭ فورماسىنا ساي شاشىمدى قىسقا ەتىپ قيامىن دەپ شەشىم قابىلدادىم. سوڭعى شەشىم وزىمنەن بولدى، ەگەر قيمايمىن دەسەڭ، وندا ءبىز سەنى قينامايمىز دەدى. الەۋمەتتىك جەلىگە «ناعىز كارى قىز بولدىڭ»، «جاس قوسىپ كورسەتەدى» دەگەندەرمەن كەلىسپەيمىن، ماعان ۇنايدى. وسى وبرازىم ماعان ۇلكەن سەنىمدىلىك سىيلادى دەسەم دە بولادى.
- فرانسۋزدىق ەر ازاماتتار «ايەل شاشىن قيىپ، وزگەرە باستاسا، جەكە ومىرىندە جاڭالىق بار» دەپ بولجايدى ەكەن. شاش قيعالى، ءسىزدىڭ جەكە ومىرىڭىزدە نە جاڭالىق؟
- جاڭالىق دەيسىز بە؟ ەڭ الدىمەن، وسى جوباعا دەگەن ۇلكەن جاۋاپكەرشىلىكتى سەزىنەمىن. سول ءۇشىن كامەرا قانشا دەگەنمەن 5 كەلىدەي سالماق قوسىپ تۇرادى. تومپاق ەلۆيرا قازىر ارىقتاپ جاتىر. دۇرىس تاماقتانۋى بار، فيتنەسى بار، تاعىسىن تاعى. وسىنىڭ بارلىعىنا ۋاقىت تابۋعا تىرىسىپ جۇرگەن جايىم بار.
- جىگىتتەر جاعى شە؟
- «كومپليمەنت» ايتاتىندار كوبەيدى. ەفيرگە شىعا باستاعان سوڭ با، باسقاشا سويلەپ، مەنى ەندى عانا قىز رەتىندە قابىلداپ جاتقانداي كورىنەدى ماعان. جەكە ومىردە، جالپى، تىنىش دەپ ايتا المايمىن. ءبىراق، مىنە، ەرتەڭ كەتىپ بارا جاتىرمىن، اق كويلەك تاڭداپ ءجۇرمىن دەپ تە ايتا المايمىن...
- بۇل جوبادا سىزگە دەيىن داۋلەت بيجانوۆ پەن دانيار بەكجانوۆ وتىردى. بەس جىل بويى جۇرگەن باعدارلامادا ولاردىڭ ءارقايسىسى وزىندىك ەرەكشەلىكتەرىمەن كوزگە ءتۇستى، ەستە قالدى. ءسىز شە، ەلدى نەمەن تاڭ قالدىرماق ويداسىز؟
- كەز-كەلگەن تاقىرىپتا ەر بالامەن قاتار، قىز بالانىڭ دا كوزقاراسى بار. مەنىڭ بۇل ورىنداعى ميسسيام دا سول. ءوز باسىم، ومىردە ازىلگە جاقىن اداممىن، ءبىراق ەلۆيرا يۋموريست ەمەس. ءيا، دانيار مەن داۋلەتپەن سالىستىرمالى تۇردە، مەنىڭ ازىلدەرىم وتپەۋى مۇمكىن. سول ءۇشىن بۇل جاعىن مەنەن گورى قايرات جاقسى الىپ شىعادى دەپ ويلايمىن. ال مەن قايرات قويا المايتىن «شىمشىما سۇراقتاردى»، تەك ايەلدەردىڭ ويىنا كەلەتىن سۇراقتاردى قويىپ، قوناقتاردى جان-جاقتى اشۋ مەنىڭ ەرەكشەلىگىم بولماق .
- وسى كۇنگە دەيىن جۋرناليست رەتىندە تانىمال ادامداردان ءسىز جاۋاپ الىپ كەلسەڭىز، قازىر ءسىزدى سۇقباتقا شاقىرادى. قانداي سۇراقتان قورقاسىز؟
- ءوز-ءوزىمدى ءالى جۇلدىز سەزىنىپ ۇلگەرمەي جاتىرمىن دەسەم دە بولادى. كۇن سايىن ءتۇسىرىلىم، تراكت، دايىندىق. الدا ەلدىڭ ىقىلاسىنا بولەنىپ جاتسام، بالكىم بۇل سۇراققا باسقاشا، جاۋاپ بەرەتىن شىعارمىن.
الەۋمەتتىك جەلىدەگى وقىرمانداردان وزىمە قاتىستى جاعىمسىز پىكىرلەر ءجيى كەلەدى، ولاردى وقىپ، قازىر كوپشىلىك پىكىرىن قابىلداۋدى ۇيرەندىم. سول ءۇشىن ماعان وزگەنىڭ الەۋمەتتىك جەلىدەگى پىكىرى قورقىنىشتى ەمەس. مەن ەشقانداي سۇراقتان قورىقپايمىن. كەز-كەلگەن سۇراققا دايىن سياقتىمىن.
- الەۋمەتتىك جەلىدە تاراپ كەتكەن «كۇيەۋ كەرەك!» دەگەن حايپ سۋرەتتەگى قىز - ءسىز بە؟
- ءيا، مەن. ءبىراق، مەن وسى سۋرەتىم، سونشالىقتى الەۋمەتتىك جەلىنى جاۋالاپ، تاراپ كەتەدى دەپ ويلاعان جوقپىن. جەتىنشى ارنادا جۇرگەن كەزىمدە، ءار باعدارلامادا نەشە ءتۇرلى ەكسپەريمەنت جاسايتىن جۋرناليست ەدىم. كۇيەۋگە شىعۋ تۋرالى تاقىرىپ بولدى.
ول كەزدە شاشىم قىسقا ءارى بويالعان. جۇمىس بارىسىندا تۇسكەن سۋرەت. كامەراعا پوستونوۆكا ويناپ، ونان كەيىن، وسى جازۋدى ۇستاپ سۋرەتكە تۇسە سالعانمىن. سوسىن facebook پاراقشاما جاريالاعان بولاتىنمىن. سونىمەن تاراپ كەتتى...
- بەلگىلى ءبىر ۋاقىتتاردا الەۋمەتتىك پاراقشاڭىزعا «ماستەر كيت» جۇيەسى تۋرالى ءجيى جازىپ كەتتىڭىز. پسيحولوگيالىق قوسىمشا ءسىزدىڭ ومىرىڭىزگە اسەر ەتتى مە؟ بۇگىنگى جەتكەن جەتىستىكتەرىڭىزگە وسى قوسىمشانىڭ سەپتىگى بار ما؟
- بۇل قوسىمشا تۋرالى ءوزىم دەل-سال كۇيدە جۇرگەن كەزىمدە ەستىدىم. ولاي دەيتىن سەبەبىم، ءوزىمنىڭ «ىشكى تراۆما»، بالا كەزدەن قالعان وكپە-رەنىشتەرمەن جۇمىس جاساۋ جولدارىن قاراپ، ىزدەنىپ جۇرگەن كەزىم ەدى. جاڭا نارسەدەن مەن ەشقاشان باس تارتپايمىن.
كورگىم كەلدى، بايقاپ كوردىم. مۇمكىن، ونىڭ دا ءبىر سەپتىگى تيگەن شىعار... ءبىراق، تەك وسى قوسىمشامەن «تۇنگى ستۋديا» باعدارلاماسىنىڭ جۇرگىزۋشىسى بولدىم دەۋگە بولماس، ونان بولەك تە مەن كوپتەگەن پسيحولوگيالىق ىزدەنىستەر جۇرگىزىپ، كىتاپتار وقىدىم.
- سوڭعى كەزدە ينستاگرامم پاراقشاڭىزعا ايەلدىڭ نازىك جان دۇنيەسى تۋرالى، جالپى قىزدار مەن جىگىتتەرگە ارنالعان كەڭەستەر جازىپ جۇرگەنىڭىزدى بايقادىم. قوعامدا بويداقتاردىڭ سانى كوبەيىپ كەتكەندىگى ءسىزدى قاتتى مازالايتىن سياقتى؟!
- مەنى كوبىنە 25 جاسقا دەيىنگى قىزدار وقيتىن سياقتى. سول ءۇشىن پايداسىنا تيەر دەگەن ويمەن جازامىن. قازىر قىزدار مەن جىگىتتەردە مىناداي كومپلەكس بار. قىزدار، ادەتتە ءوزىن كۇتىپ جۇرگەندى جاقسى كورەدى، بويانعاندى، ادەمى كيىنگەندى جاقسى كورەدى.
ال، جىگىتتەر، سول ادەمى قىزدى كورسە، «وي، بولدى، ونىڭ جىگىتى بار»، «ول ماعان قارامايدى نەمەسە «اعاشكاسى بار» دەگەن سياقتى ويلاردى باستارىنا قۇيىپ العان. ياعني، جىگىتتەردىڭ دەنىندە وسىنداي قورقىنىش بار. سول ءۇشىن بۇل توپتاعى جىگىتتەر اقىماق، اڭعال، ۇندەمەيتىن قىزدارعا ۇيلەنىپ جاتادى.
بۇگىن ويلانعانمىن، وسى نەگە ادەمى قىزدار تۇرمىسقا شىقپاي قالىپ قويادى دەپ؟! شىنىندا دا، قوعامدا بار بۇل نارسە. مەن تەلەگرامداعى كانالىمدا جازعان ەدىم: قازاق دەگەن - ول تۇنىپ تۇرعان كومپلەكس. سەبەبى، ءبىزدى سونداي اتا-انا وسىرەدى، ونان تۋعان بالا دا الىس بارمايدى دەگەندەي ...
- ەلۆيرا سىزگە تەك شىعارماشىلىق تابىستار تىلەيمىن. كوپتىڭ العىسىن الىپ، رەيتينگى جوعارى تەلەجۇرگىزۋشى بولۋىڭىزعا تىلەكتەسپىن.
- راحمەت.
دەرەككوز Stan.kz
