ەلباسى استانا پروتسەسى تۋرالى: كەلىسسوزدەر سيرياداعى شيەلەنىستەردى رەتتەۋگە جول اشتى

بۇل تۋرالى ەلباسى رەسەيلىك «ءبىرىنشى ارنادا» «ۆوسكرەسنوە ۆرەميا» باعدارلاماسىنا بەرگەن سۇحباتىندا مالىمدەدى، دەپ حابارلايدى قازاقپارات.

«قازاقستان جىلدار بويى ءوزىن بارلىق مەملەكەتتەردىڭ سەنىمىنە يە، بەيبىت ەل رەتىندە كورسەتتى. وسىعان وراي ۆلاديمير ۆلاديميروۆيچ (پۋتين، ر ف پرەزيدەنتى - رەد.) يران جانە تۇركيا پرەزيدەنتتەرىمەن استانانى ۇكىمەتتىك دەلەگاتسيا مەن سيريا وپپوزيتسياسىنىڭ كەلىسسوزدەرىنە ارنالعان الاڭعا اينالدىرۋدى ۇسىندى جانە ءبىز كەلىسىم بەردىك»، - دەدى نۇرسۇلتان نازاربايەۆ.

ەلباسى استانادا سيرياارالىق كەلىسسوزدەردىڭ سەگىز راۋندى وتكەنىن ەسكە سالدى.

«ولار جوعارى باعالاندى، سەبەبى مۇندا جەنيەۆا كەلىسسوزدەرىنە قاتىسپاعاندار دا كەلدى. ءدال وسى كەلىسسوزدەر شيەلەنىستەردى دەەسكالاتسيالاۋعا، كەي جەرلەردەگى سوعىستاردى توقتاتۋعا اكەلدى جانە سوچيدە وتكەن فورۋمدى ۇيىمداستىرۋعا مۇمكىندىك بەردى. ياعني، پۋتين ايتقانداي، شەشىمدەردىڭ ديپلوماتيالىق بولۋى ءۇشىن جۇمىستار اتقارىلىپ جاتىر»، - دەدى قازاقستان پرەزيدەنتى.

سونداي-اق، ن. نازاربايەۆ الەمدەگى بەيبىتشىلىك ءۇشىن ءوزارا سەنىمنىڭ ماڭىزدى ءرول اتقاراتىنىن باسا ايتتى.

«وكىنىشكە قاراي، بۇگىندە الەمدىك ساياساتتىڭ نەگىزگى ويىنشىلارى ءتىل تابىسا الماي وتىر. ءباتۋا جوق، سەنىم جوق. ءبارىبىر كەلەشەكتە ونى قالپىنا كەلتىرۋ قاجەت بولادى، ونسىز الەم تىنىش كۇن كەشپەيدى جانە بارىمىزگە قاجەت ۋاعدالاستىقتار بولمايدى. مەنىڭ ويىمشا، بولاشاق الەمنىڭ ءتۇرلى كوزقاراستارىنا جانە كوپتىڭ پىكىرلەرىن ەسكەرۋگە نەگىزدەلگەن»، - دەپ اتاپ ءوتتى نۇرسۇلتان نازاربايەۆ.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى