توميريس فيلمىندە باستى رولدەگى اكتريسا ءبىرىنشى سۇحباتىن بەردى - فوتو
27 جاستاعى الماتىلىق ا. تۇرسىن وقىعان ماماندىعى بويىنشا پسيحولوگ. اقپان ايىندا ونىڭ اتالعان تاريحي فيلمدە باس كەيىپكەردى سومدايتىنى بەلگىلى بولدى. سول كەزدە پاتشايىم كيىمىندەگى اكتريسانىڭ فوتوسۋرەتتەرى ينتەرنەت جەلىسىندە كەڭىنەن تاراپ كەتكەن ەدى.
- الميرا، قول جەتكىزگەن باستى رولىڭىزبەن قۇتتىقتايمىن. ءسىز وسىعان دەيىن كينوعا ءتۇسىپ كورمەپسىز. وسى كاستينگ جايىندا قايدان ءبىلدىڭىز؟
- مەن بۇل جايىندا الەۋمەتتىك جەلىدەگى پاراقشامنان ءبىلدىم، ياعني وندا مەنى تاريحي كارتينادا كەيىپكەردى سومداۋ ءۇشىن سىناقتان وتكىزۋگە شاقىردى. باستاپقىدا بۇل ۇسىنىسقا قالاي ارەكەت ەتۋدى بىلمەي، ويلانىپ قالدىم. بۇعان دەيىن كينوعا جانە قازاقستاندىق ءىرى جوبالارعا دا شاقىرتۋ العان ەدىم، الايدا وسى ۇسىنىستارعا اسا ءمان بەرمەي كەلدىم. مەن ولاردان باس تارتتىم، ياعني كەيدە كەيىپكەرلەر ماعان سايكەس بولمادى نەمەسە جۇمىستان قولىم بوسامادى. توميريس تۇلعا رەتىندە ماعان قىزىق بولدى. سوندىقتان وسى رولدە ءوزىمدى سىناپ كورگىم كەلدى. وسى ورايدا كاسىبي مامانداردىڭ تالاپتارىنا سايكەس كەلگەنىمە قۋانىشتىمىن.
- ءسىزدى باستى رولگە بەكىتكەنى جايىندا اقپارات تاراعاننان كەيىن، 16 -اقپاندا جاريالانعان فوتوسۋرەتتەر جەلىدە ايتارلىقتاي تانىمالدىققا يە بولدى. بىرنەشە اپتا بويى ەلىمىزدە ءسىز جايىندا ايتىلىپ ءجۇردى. بۇل تۇرعىدا وسى جايت قالاي اسەر ەتتى؟
- مەنىڭ الەۋمەتتىك جەلىدەگى پاراقشامدى بۇعاتتاپ تاستاعان كەزدە عانا كوپشىلىكتىڭ نازارىنا ىلىككەنىمدى العاش ءتۇسىندىم. ماعان ادامدار تەلەفون شالىپ، حابارلامالار جىبەرىپ جاتتى. ءبىرىنشى بولىپ مەنى تۋىستارىم مەن دوستارىم قۇتتىقتادى. ولار ۇنەمى بارلىق باستامالارىمدى قولداپ جۇرەدى. قازىرگى كەزدە ءوزىمدى تولىقتاي «توميريس» جوباسىنا ارنادىم.
نازارىمدى باسقا شارالارعا اۋدارماس ءۇشىن سۇحباتتاردان دا باس تارتتىم. ءتۇسىرىلىم كەزىندە كوۋچينگتى دە توقتاتا تۇرۋعا تۋرا كەلدى. سوندىقتان وسىنداي قاربالاس ساتتە ايتارلىقتاي تانىمالدىقتى سەزىنىپ تۇرعانىم جوق. دەگەنمەن دە قۇتتىقتاۋلار جازىلعان حاتتار مەن حابارلامالار ءالى دە كەلىپ جاتىر.
- ءتۇسىرىلىم پروتسەسىنە بىردەن قوسىلىپ كەتتىڭىز بە؟ الدە اكتەرلىك تاجىريبەڭىز بولماعاندىقتان، باستاپقىدا قيىندىقتار تۋىندادى ما؟
- مەن ءۇشىن تاڭسىق سالالاردى زەرتتەۋ ۇنەمى قىزىق بولاتىن. ازىرگە ءوزىمنىڭ كينوداعى اسەرىم تۋرالى ايتۋ قيىنداۋ. ءبىراق تا بۇل جاڭاشىلدىقتار وتە قىزىق بولىپ تۇر. ىنتا مەن قىزىعۋشىلىق بولعان كەزدە، ءتۇسىرىلىم بارىسىندا بارلىق پروتسەستەن كوڭىل كوتەرەسىڭ. سايكەسىنشە، بارشا قويىلعان تالاپتاردى وڭاي ەڭسەرىپ كەلەمىن. ەندى وسى قۇلشىنىستىڭ ناتيجەسىنە كينونىڭ تۇساۋكەسەرىندە باعا بەرەرسىزدەر.
- ءسىزدىڭ وسىعان دەيىنگى كاسىبىڭىز اكتەرلىك ويىنعا كومەكتەسە الدى ما؟
- مەندە جاڭا كەيىپكەردى سومداۋدا ەرەكشە ءادىسىم جوق. وبرازعا كىرۋگە تاريحي كوستيۋمدەر كومەكتەسەدى، ياعني ولاردىڭ بارلىعى وتە تاماشا دايىندالعان. دۇرىس تاڭدالعان مۋزىكا مەن سەناريدى جەتە ءتۇسىنۋ ماڭىزدى دەپ بىلەمىن. پسيحولوگ رەتىندە توميريستىڭ جەكە تۇلعاسىن زەرتتەدىم. باستى كەيىپكەردىڭ امالدارى مەن ءىس-قيمىلى سەبەپتەرىن ءتۇسىنۋ ءۇشىن پسيحولوگيالىق ادىستەرگە سۇيەندىم. سوندىقتان پسيحولوگيانىڭ كومەگى بولدى.
- ءسىزدىڭ ۇستىڭىزدەگى جاۋىنگەر قىزدىڭ كيىمىن بايقاپ تۇرمىن. وزىڭىزگە ۇناي ما؟
- ارينە، وتە ۇنايدى. تۇسىرىلىمگە ارناپ ماعان كيىمنىڭ بىرنەشە ۇلگىسى دايىندالدى. كوستيۋمدەردىڭ ەرەكشەلىگى تاڭداندىرماي قويمايدى، ولاردىڭ بارلىعى تابيعي بىلعارىدان نەمەسە ماقتادان جاسالعان. وسى كيىمدەردى كيگەن كەزدە، سول داۋىرگە تۇسكەندەي اسەر الاسىڭ. اتاپ وتكەنىمدەي، بۇل كوستيۋمدەر وبرازعا كىرۋگە شىنىمەن دە كومەكتەسەدى. جالپى، سۋرەتشىلەردىڭ جۇمىسىنا، ونەرىنە ءسۇيسىنىپ وتىرمىن. كيىمدەگى ءاربىر ەلەمەنت بەلگىلى ءبىر ءمان-ماڭىزعا يە. مىسالى، مەندەگى بەلدىك پەن سىرعالار ناقتى سەبەپتەرمەن ىرىكتەلىپ تاعىلدى. وسىنداي كوستيۋممەن جۇرگەن كەزدە جاۋىنگەر قىز بولۋ 30-40 پايىزعا جەڭىلدەي تۇسەدى.
- ءوزىنىڭ سۇحباتتارىنىڭ بىرىندە رەجيسسەر اقان ساتايەۆ كينو تۇسىرىلىمىنە دايىندىق بىرنەشە اي بويى جۇرگىزىلگەنىن ءسوز ەتتى. سىزگە قاتىستى دايىندىقتار قالاي ءجۇردى؟
- باستاپقىدا، باسقالارعا سەكىلدى مەن ءۇشىن دە كاستينگتەن كىم وتكەنى تۇسىنىكسىزدەۋ بولدى. ءۇش- ءتورت اي وسىنداي كەلىسىلمەگەن كۇيدە بولدى. رولگە ناقتى بەكىتكەننەن كەيىن عانا تىڭعىلىقتى دايىندىققا كىرىستىم. سول جەردە ەكى اي بويى جاتتىعۋ شارالارىمەن اينالىستىم. العاش رەت سالت اتپەن ءجۇرۋدى ۇيرەندىم. سونىمەن قاتار ءتۇرلى تريۋكتەردى مەڭگەردىم. ايتا كەتەيىن، ءبىزدى جاتتىقتىرۋشىلار ايامادى. بارلىق ءىس- قيمىلدار اسكەردەگىدەي بولدى. مەندە كينوداعى تاجىريبەم بولماعاندىقتان، اكتەرلىك شەبەرلىكتەن ساباق الدىم.
- ءتۇسىرىلىم ءۇشىن كونە تۇركى ديالەكتىلەردىڭ ءبىرى جاڭعىرتىلدى. سىزگە ءتىلدى مەڭگەرۋ قيىن بولمادى ما؟
- شىنىن ايتقاندا، ءتىلدى مەڭگەرۋ قيىنداۋ بولدى. مەنىڭ ويىمشا، ول سونشالىقتى قازاق تىلىنە ۇقساس ەمەس. ياعني ونى ءوزىم بىلەتىن تىلدەردىڭ ەشبىرىمەن سالىستىرا المايمىن. ءتۇسىرىلىم كەزىندە ءتىل سىندىرۋعا تۋرا كەلىپ وتىر. ءبىراق تا باسقا امال جوق، ۇيرەنىپ جاتىرمىن.
- سوڭعى ساۋال. وسى كارتينا بۇقاراعا كورسەتىلگەننەن كەيىن، سىزگە باسقا فيلمدەرگە ءتۇسۋ تۋرالى ۇسىنىستار كوپ بولادى دەگەن ويدامىز. وسىعان دايىنسىز با؟
- ۇسىنىستارعا قاراي شەشىم جاسايتىن بولامىن. جاڭا جوبالارعا ءتۇسۋ تۋرالى ۇسىناستار قازىردىڭ وزىندە دە بار. ەڭ باستىسى، وسى ءبىرىنشى فيلم بويىنشا جۇمىستاردى لايىقتى دەڭگەيدە اتقارىپ شىعۋ، ويتكەنى بۇل تۋىندى مەن ءۇشىن اۋقىمدى جوبا. كەيىننەن باسقا جوبالاردى كورە جاتارمىز.
- اڭگىمەڭىزگە راحمەت!
اۆتور: مايا تەڭىزبايەۆا
