تىكۇشاقتى تىزگىندەگەن قازاق قىزى قايسارلىعىمەن كوپشىلىكتى ءتانتى ەتتى
سولاردىڭ ءبىرى - اقەركە شوپاتايەۆا. ول تىكۇشاقتى تىزگىندەپ قانا قويماي، قۇتقارۋشى قىزمەتىن دە اتقارادى.
بۇل تۋرالى حابار-24 اقپارات كوزى حابارلادى.
ەسىمدەرى ەل ەسىندە قالعان قازاقتىڭ قايسار قىزدارى از ەمەس. ەر ازاماتقا ءتان اۋىر جۇكتى ارقالاپ جۇرگەن ارۋلارىمىز ءقازىر دە بارشىلىق. ماسەلەن، اۆياتسيا سالاسىندا مي-8 تىك ۇشاعىن تىزگىندەگەن جالعىز ايەل بار دەيتىن بولساق، ول - اقەركە شوپاتايەۆا. اتا-اناسىنىڭ ىقپالىمەن ۇشقىش ماماندىعىن تاڭداعان اقەركە ەڭ العاش اۋەگە كوتەرىلگەن ءساتىن ەسىنەن شىعارمايدى.
«تىكۇشاقپەن ءبىرىنشى رەت كوككە كوتەرىلگەن كەزدە قانداي كۇيدە بولعانىمدى اۋىزبەن ايتىپ جەتكىزۋ مۇمكىن ەمەس. ارينە، ءبىرىنشى كەزەكتە قوبالجۋ باسىم بولدى. ويتكەنى جاۋاپكەرشىلىك وتە جوعارى. قوس قاناتى جوق تىك ۇشاقتى اۋەگە كوتەرۋ سەنىڭ موينىڭدا. بۇل - قاتەلىكتى كەشىرمەيتىن ماماندىق»، - دەيدى اقەركە شوپاتايەۆا.
ەر ازاماتتاردىڭ ءوزى جۇرەكسىنەتىن سالادا 12 جىل بويى قىزمەت ىستەپ جۇرگەن اقەركە شوپاتايەۆا - 500 ساعاتتان اسا كوك اسپاندا قالىقتاعان قايسار قىز. ول سونداي-اق كوپتەگەن قۇتقارۋ وپەراتسيالارىنا قاتىسىپ، تالاي ادامداردىڭ العىسىن العان جان.
«مەن ەڭ الدىمەن كاسىبي شەبەرلىگىمدى شىڭداي تۇسسەم دەيمىن. سودان كەيىن بارىپ قانا قىزمەتتىك شەن جانە اۋەدەگى ۋاقىت كورسەتكىشىن ويلاۋعا بولادى. ادام 3000 نەمەسە 5000 ساعاتتان ارتىق ۇشۋى مۇمكىن. ءبىراق، ءوز كاسىبىن تولىق تۇسىنبەي جاتاتىندار بار. اۋەدەگى ۋاقىت كورسەتكىشى از بولعانىمەن، ءوز ءىسىن جەتىك بىلەتىندەر كەز كەلگەن ساتتە ماڭىزدى شەشىم قابىلداي الادى»، - دەيدى ۇشقىش اقەركە شوپاتايەۆا.
تابىستان نامىستى بيىك قوياتىن اقەركە شوپاتايەۆا ەڭبەكسۇيگۇشتىگىنىڭ ارقاسىندا ارىپتەستەرىنىڭ اراسىندا بەدەلى جوعارى.
«ول ءوز قىزمەتىنە اسا جاۋاپكەرشىلىكپەن قارايدى. قاي ۋاقىتتا بولماسىن، اۋەگە كوتەرىلۋ ءۇشىن تىڭعىلىقتى دايىندىق جۇرگىزەدى. ءوز ماماندىعىن جەتىك بىلەدى. بىزدەر ونى ءارقاشان قۇرمەت تۇتامىز»، - دەيدى «قازاۆياقۇتقارۋ» ا ق كا-32 اۆياكومپانياسىنىڭ كومانديرى داۋلەت قاناتوۆ.
اقەركە شوپاتايەۆا - وتباسىنىڭ ۇيىتقىسى، ءۇش بالانىڭ اناسى. اۋىر جۇمىستان شارشاپ كەلگەندە الدىنان قۇشاق جايا قارسى الاتىن، ارقا سۇيەر ازاماتىنا العىسى شەكسىز.
