دەرتتى بەت پەن قولعا قاراپ تا بىلۋگە بولادى
تومەندە جازىلعان جايلاردى نازارىڭىزدا ۇستاي ءجۇرىڭىز! ەگەر وزىڭىزدەن سول بەلگىلەردىڭ ءبىرىن بايقاساڭىز، تەز ارادا دارىگەرگە قارالۋعا كەڭەس بەرەمىز.
شەكەڭىزدىڭ تەرىسى قىزارا بورتسە، ونى ىشەك قىزمەتىنىڭ بۇزىلعاندىعى دەپ ءبىلىڭىز. ماڭدايىڭىز قىزارىڭقىراپ تۇرسا، وندا ءسىز تۇتىناتىن تاعامداردىڭ قۇرامىندا تۇز كوپ بولعانى. تۇز بۇيرەكتىڭ جۇمىسىنا كەدەرگى كەلتىرەدى. ال ماڭدايىڭىز بوزارىڭقى تارتسا، تاتتىگە اسا قۇمار جاننىڭ ءبىرىسىز. ءتاتتىنى شەكتەن تىس جەۋ اعزاعا زارداپ تيگىزەدى.
ەكى قاسىڭىزدىڭ اراسىنداعى اجىمدەردىڭ سىزىعى كولدەنەڭ بولسا، باۋىردىڭ قىزمەتى ناشارلادى دەگەن ءسوز. ماڭدايداعى ءتۇزۋ جانە كولدەنەڭ تارتقان ءاجىم بەلگىلەرىنىڭ كوپتەپ كەزدەسۋى - قۇرامىندا اقۋىزى مول تاعامداردى اسا كوپ پايدالانۋدىڭ سالدارى.
قوس جانارىڭىزدىڭ استىڭعى جانە ۇستىڭگى جاعى قوشقىلدانىپ، قاتپارلانىپ كەتسە، بۇيرەكتىڭ اۋىراتىنى ءشۇباسىز.
بەتتىڭ ۇشى مەن تاناۋدىڭ اينالاسىنداعى تەرى قاباتتارىنىڭ قىزارىپ كەتۋى بۇل ىشەك- قارىن اۋرۋلارىنىڭ تۋىنداعانىن ۇقتىرادى. ال تاناۋ ۇشىنداعى تامىرلار كولەمى كەڭەيىپ كەتسە، ءسوز جوق جۇرەك- قان تامىرلارى جۇيەسىنىڭ قالىپتى جاعدايدان اۋىتقىعانى.
بەت ۇشى مەن ەرىننىڭ اراسىنداعى بولىكتە اق نەمەسە قارا بورتپەلەر بولسا، ءسىز قانت پەن ءسۇت تاعامدارىن مولىنان تۇتىناتىن ادامسىز. سونداي-اق برونحيت اۋرۋىنىڭ بەلگىلەرى دە بەتتىڭ وسى بولىگىندە اڭعارىلادى.
يەك پەن جاق تەرىلەرىندەگى اۋىتقۋشىلىقتار جىنىستىق قاتىناستىڭ سەبەپ-سالدارىنان حابار بەرەدى. ايەلدىڭ يەك تەرىسى قىزارا بورتسە، مەنسترۋالدى كەزەڭنىڭ باستالعانى. ال سول بورتپەلەر اعارىڭقى ءتۇستى، ءارى قاتتىراق بولسا، ول ايەلدەردىڭ جىنىس مۇشەسىندەگى ساڭىراۋقۇلاقتى ينفەكسيامەن بايلانىستى.
قولىڭىز قىسى- جازى جىلىمايتىن بولسا، وندا اياق-قولداعى قان اينالىمىنىڭ بۇزىلعانى. ال الاقانىڭىز ۇنەمى قىزىپ جۇرسە، باۋىردىڭ ۋىتقا قارسى «قايراتىنىڭ» كەمي باستاعانى.
الاقانىڭىز تەرشىپ، دىمدانىپ نەمەسە قۇرعاپ، بوزارىپ جۇرسە، قالقانشا بەز جۇمىسىنداعى اقاۋدىڭ سالدارى. قولىڭىزدىڭ تەرىسى اقجارعاقتانىپ، سىدىرىلىپ تۇسە باستاسا، تانىڭىزدە ا، د دارۋمەندەرى تاپشى.
شىناشاعىڭىز اۋىق-اۋىق جانسىزدانىپ قالعانداي سەزىلەتىن بولسا، جۇرەك-قان تامىرلارى جۇيەسىندە اقاۋ بار. ەگەر جانسىزدانۋ ۇلكەن ساۋساقتارىڭىزدان بايقالسا، ول - تىنىس جولىنداعى كەسەلدىڭ حابارشىسى.
ساۋساقتىڭ ەڭ تومەنگى، ياعني الاقانعا ۇشتاسقان تۇسىنداعى بۋىنعا تەرەڭ، كولبەۋ اجىمدەر تۇسسە، سۋسامىرعا شالدىعۋىڭىز عاجاپ ەمەس. ساۋساقتارىڭىزدىڭ ۇشى قان قىزىل تۇسكە ەنسە، اس قورىتۋ جۇيەسىندەگى اقاۋدى، قوڭىر- قىزىل تۇسكە ەنسە، باۋىر مەن بۇيرەكتەگى كەسەلدى اڭعارتادى.
وڭ قولداعى سۇق ساۋساق ۇشىنىڭ ەكى قاپتالى دۋىلداپ قىشي بەرسە، توق ىشەگىڭىزدى ءبىر تەكسەرتىپ الىڭىز. سۇق ساۋساقتىڭ ىشكى جاعى اقجارعاقتانىپ، تەرىسى تۇلەي بەرسە، وندا ول ءوت قالتاسى جۇمىسى بۇزىلعانىنىڭ بەلگىسى.
دەرەككوزى: zamana.kz
