تەگەراندا جاۋلىعىن شەشكەن ايەلدى ەكى جىلعا سوتتادى
بۇل تۋرالى جەرگىلىكتى اقپارات قۇرالدارى حابارلادى. جارتىلاي رەسمي «تاسنيم» اقپارات اگەنتتىگى سارسەنبى كۇنى پروكۋرور ابباس جافاري دولاتاباديدىڭ الگى ايەلدى «قوعامدىق ورىندا حيدجابىن شەشىپ، جەمقورلىقتى قولداۋعا ارەكەت ەتكەن» دەپ ايىپتاعان ءسوزىن تاراتتى.
اگەنتتىك اقپاراتىندا اتى-ءجونى كورسەتىلمەگەن ايەلدىڭ سوت ۇكىمىنە كەلىسپەي شاعىم بەرمەكشى ەكەنى ايتىلعان.
كەي باسىلىمدار تۇرمە جازاسىنا كەسىلگەن ايەل - جاقىندا يراندا بولعان بەيبىت نارازىلىق اكسيالارى كەزىندە حيدجاب تاعۋعا ماجبۇرلەۋگە قارسىلىق تانىتقانى ءۇشىن تۇتقىندالعان 32 جاستاعى نارگيز حۋسسەيني دەپ حابارلادى. بۇرىندارى ەلدە حيدجاب تاقپاعانى ءۇشىن ۇستالعان ايەلدەردى كوز ۇزاماي قويا بەرەتىن نەمەسە از عانا مەرزىمگە قامايتىن بولماسا 25 دوللار شاماسىندا ايىپپۇل سالاتىن.
بۇعان دەيىن بيىل جىل باسىندا يران بيلىگى ەلدە ايەلدەرگە مىندەتتى سانالاتىن حيدجاب تاعۋعا نارازىلىق ءبىلدىرىپ باسىنداعى ورامالىن شەشكەن 29 ايەلدىڭ ۇستالعانى تۋرالى حابارلاعان. پوليتسيا ول ايەلدەر «شەتەلدە تۇراتىن يراندىقتاردىڭ ۇگىتتەۋىمەن اداسقان» دەپ مالىمدەگەن.
