سولتۇستىك كورەيا يادرولىق قارۋدان باس تارتپاق
اق ءۇيدىڭ رەسمي وكىلى ا ق ش پرەزيدەنتىنىڭ بىردەن كەلىسىمگە بارا سالمايتىنىن ايتتى. وعان دەيىن سولتۇستىك كورەيا سەنىمگە كىرە الاتىنداي ءىس- ارەكەت جاساۋى ءتيىس دەپ وتىر.
«دەنۋكلەاريزاتسيا باعىتىنا قاراي تولىق شەشىم شىعارعانشا، سەنىمگە كىرە العان جاعدايدا عانا، ءبىز بۇل مەملەكەتپەن كەلىسىمشارتتار جاساسامىز» دەدى شەنەۋنىك. پرەزيدەنت اكىمشىلىگىنىڭ وكىلى سولتۇستىك كورەياعا تەك يادرولىق سىناقتاردى توقتاتۋ نەمەسە بالليستيكالىق زىمىرانداردى سىناۋدى دوعارۋ جەتكىلىكسىز ەكەنىن ءبىلدىردى.
«ەگەر سولتۇستىك كورەيا تەك ۋاقىت ۇتۋ ءۇشىن وزدەرىنىڭ «اق نيەتىن» ءبىلدىرىپ جاتسا، بىزگە كوزبوياۋشىلىق تانىتسا، وندا مۇنىڭ عۇمىرى ۇزاققا بارمايدى. بۇل «فيلمدى» ءبىز بۇرىن دا كورگەنبىز، سوندىقتان ناتيجەنىڭ وڭ بولاتىنىنا كوزىمىز جەتكەندە عانا ا ق ش كەلىسىمگە كەلەدى»، - دەدى.
ال پرەزيدەنت دونالد ترامپ تا ءوز پىكىرىن ءبىلدىردى.
«مەنىڭ ويىمشا، سولتۇستىك كورەيانىڭ يادرولىق سىناقتان تۇبەگەيلى باس تارتۋ تۋرالى ويلارى - وتە پوزيتيۆتى شەشىم. بۇل بۇكىل الەم مۇددەسى ءۇشىن پايدالى بولماق. ال ناتيجەسىن كورەرمىز»، - دەدى ول.
سونداي- اق ترامپ پحەنيان جەرىندەگى قارۋدى تالقانداۋ ىسىندە كەش قالعانىن ايتادى، ياعني بۇل قارۋلاردىڭ كوزىن جويۋ وزىنەن بۇرىنعى پرەزيدەنتتىڭ كەزىندە شەشىلۋى ءتيىس بولاتىن دەگەن ويىن قايتالاپ ايتىپ ءوتتى. ال سولتۇستىك كورەيانىڭ ەل قاتارلى وليمپيادا ويىندارىنا قاتىسۋىن قۇپتادى.
سولتۇستىك كورەيا باسشىسى كيم چەن ىن يادرولىق جانە زىمىران سىناقتارىن دوعارۋعا كەلىسىپ وتىر. بۇل ماسەلەنى پحەنيان سەۋل تاراپىمەن دە تالقىلاعان. وڭتۇستىك كورەيا ۇلتتىق قاۋىپسىزدىك كوميتەتىنىڭ باسشىسى چۋن يۋ ەن وسى اپتادا ا ق ش- قا ساپار شەگىپ، اعايىندى مەملەكەتپەن ارا- قاتىناسىن رەتتەۋدە ا ق ۇيدەن كومەك سۇراماق.
ال ا ق ش تاراپى وسىعان دەيىن 27 جىل بويى سولتۇستىك كورەيانىڭ تالاي كەلىسىم جاساپ، ارتىنان باس تارتىپ كەتكەنىن اتاپ ءوتتى. ياعني، سەنىمنەن شىققان ەلدىڭ بۇل جولعى شەشىمىنە دە كۇمانمەن قارايتىن ساياساتكەرلەر كوپ.
Baq.kz
