قازاقستاندا باتىرحان شۇكەنوۆكە ەسكەرتكىش ورناتىلادى - فوتو
«قازاقپارات» ءتىلشىسى اتالعان ءمۇسىننىڭ اۆتورىمەن حابارلاسىپ، ەسكەرتكىشتىڭ قايدا ورناتىلاتىنىن ءبىلدى.
ايتا كەتەرلىگى، بۇگىنگى كۇنى ءانشىنىڭ ءمۇسىنى استانا قالاسىنداعى «كازارتسيستەم» جاۋاپكەرشىلىگى شەكتەۋلى سەرىكتەستىگىنىڭ مۇسىنشىلەر شەبەرحاناسىندا جاسالىپ جاتىر. ەسكەرتكىشتىڭ بيىكتىگى 2,5 مەتر. قازىرگى كەزدە ساز جۇمىستارى اياقتالىپ قالعان. ەندى قولاعا اۋدارۋ جۇمىستارى باستالماق.
«ءمۇسىندى جاساپ جاتقانىمىزعا ەكى ايداي ۋاقىت بولدى. وتكەن جىلى وتكىزىلگەن كونكۋرسقا قاتىسىپ، جەتى-سەگىز جۇمىستىڭ ىشىنەن مەنىڭ جوبامدى تاڭداپ العان بولاتىن. ەسكەرتكىش قىزىلوردا اكىمدىگىنىڭ تاپسىرىسىمەن جاسالدى. اشىلۋى مامىر ايىنا جوسپارلانعان. مارقۇمنىڭ اعاسى باۋىرجان كەلىپ، جۇمىستاردى كورىپ تۇرادى. قولىنا تەنور-ساكسافوندى ۇستاتتىق» - دەيدى ءمۇسىن اۆتورى، قازاقستان سۋرەتشىلەر قاۋىمداستىعىنىڭ مۇشەسى، قازاقستان رەسپۋبليكاسىنىڭ ونەر اكادەمياسىنىڭ اكادەميگى مۇرات مانسۇروۆ.
ايتا كەتەيىك، اتاقتى ءمۇسىنشى مۇرات امانگەلدى ۇلى استانا قالاسىنداعى «قازاق ەلى»، «كەرەي مەن جانىبەك»، «ماڭگىلىك ەل»، «قازاق حاندىعىنا - 550 جىل» جانە تاعى باسقا دا كوپتەگەن مونۋمەنتتەردىڭ اۆتورى.
