ورالدا تار جولمەن تايعاق كەشكەن ءۇش ابىسىننىڭ عۇمىرى تۋرالى كىتاپ شىقتى - فوتو
بۇرىن داريعا مۇشتانوۆانى رەسپۋبليكا جۇرتشىلىعى ايتىسكەر اقىن رەتىندە جاقسى بىلەتىن. ودان كەيىن ءار جىلدارى «ادامنىڭ جانى - ءبىر جۇمباق»، «ءومىر- ارنا»، «قوس قانات» اتتى جىر كىتاپتارى جارىققا شىعىپ، جازبا اقىندىعىمەن تانىلدى. بۇل جولى اۆتور «اڭىز بولعان ابىسىنداردى» قارا سوزبەن جازعان.
قاسيەتتى نارىن قۇمىندا ءومىر سۇرگەن، قازاق جەرى پوليگونعا اينالعاننان كەيىن تاعدىردىڭ ايداۋىمەن قازتالوۆ اۋدانى قاراوبا اۋىلىنا قونىس تەپكەن ساقىپجامال، ءدىلدا، ساقىپ سىندى ءۇش ابىسىننىڭ اڭىزعا بەرگىسىز ءومىرى كوركەم تىلمەن ورىلگەن كىتاپتا. وتكەن عاسىرداعى اشتىقتى، قۋعىن- سۇرگىندى، سوعىس سالعان اۋىرتپالىقتى بەلشەسىنەن كەشە ءجۇرىپ، ۇرپاعىن امان ساقتاپ قالعان ءۇش انانىڭ تاعدىرى ايتىلعان. نەبىر «اقتابان شۇبىرىندى، القاكول سۇلامانى» باستان كەشىرگەن حالىقتىڭ ءبىر ازاپتى كەزەڭى سۋرەتتەلگەن. مۇندا ءومىر ءۇشىن ارپالىس، ۇلكەننىڭ الدىنان كەسە وتپەۋ، ابىسىندار اراسىنداعى كەرەمەت سىيلاستىق، ورلىك پەن باتىرلىق، جەڭگە مەن قاينى اراسىنداعى ءازىل-قالجىڭ - ءبارى-ءبارى كورىنىس تاپقان.
بەلگىلى جازۋشى ءسابيت دوسانوۆتىڭ كىتاپتىڭ العى سوزىندە: «داريعا مۇشتانوۆانىڭ «اڭىز بولعان ابىسىندار» اتتى شىعارماسى - تىڭ تاقىرىپقا تۇڭعىش تۇرەن سالعان، ايتارى انىق، بوياۋى قانىق، شۇرايلى شىعارما، وقۋشىنىڭ ويىنا وي قوساتىن تۇلعالى تۋىندى. ادامداردىڭ ءبىر- بىرىنە دەگەن مەيىرىمى، ماحابباتى قاراسوزبەن جىرلانعان پوەما»، دەگەنىندەي، بۇل كىتاپتىڭ، اسىرەسە، كەيىنگى جاستار ءۇشىن تاربيەلىك ءمانى زور.
شارا بارىسىندا ب ق و مادەنيەت، ارحيۆتەر جانە قۇجاتتاما باسقارماسىنىڭ باسشىسى قادىربولات مۇساعاليەۆ، جۋرناليستيكا ارداگەرى تيحون ءالىپقالي، ايتىسكەر اقىن، قازاقستاننىڭ ەڭبەك سىڭىرگەن مادەنيەت قىزمەتكەرى، «قۇرمەت» وردەنىنىڭ يەگەرى شولپان قىدىرنيازوۆا، اقىن، قازاقستان جازۋشىلار وداعىنىڭ مۇشەسى امانكەلدى شاحين جانە باسقالار جاڭا كىتاپتىڭ جۇپ- جۇمىر، ءتىلى جەڭىل دە كەلىستى، وقيعالارى اسەرلى دە ءورىستى ەكەندىگىن ايتىپ، جىلى پىكىرلەرىن ءبىلدىردى.
اتاپ وتەر جايت، كىتاپتىڭ كەيىپكەرلەرى - ومىردە بولعان ادامدار. سوندىقتان ولاردىڭ ۇرپاقتارى بولۋى دا زاڭدىلىق. سولاردىڭ ءبىرى، تاريحشى- ۇستاز ىرىستى قايساعاليەۆا وسى كىتاپتىڭ جازىلۋىنا باستاماشى بولسا، شاراعا قىزىلوردا وبلىسى سىرداريا اۋدانىنان ارنايى كەلگەن شىنتەمىر ايسين شىنايى ريزاشىلىعىن جەتكىزدى.
«ءبىز اكەلەرىمىزدىڭ قانىمەن، سول ءۇش انادان وربىگەن ۇرپاقپىز. ءوزىم، انامىز قۇدايدان سۇراپ العان ەگىز بالانىڭ ءبىرىمىن. بۇگىنگى كۇنگە دە جەتكىزگەن سول انالارىمىزدىڭ اق تىلەگى. قازىرگى تاڭدا قايساعاليەۆتەر، قيزاعاليەۆتەر جانە ايسيندەر اۋلەتتەرى تامىر جايىپ، دەنى باتىس قازاقستاندا ۇرپاق ءوربىتىپ وتىر. ەندەشە، ەگەمەن ەلىمىزدىڭ ەڭسەسى كوتەرىڭكى، رۋحى بيىك بولا بەرسىن ءاردايىم!»، دەدى اعىنان جارىلعان ش. ايسين.
كەشتى جۇرگىزگەن ح. بوكەيەۆا اتىنداعى وبلىستىق قازاق دراما تەاترىنىڭ اكتريساسى، ق ر مادەنيەت سالاسىنىڭ ۇزدىگى نۇرگۇل جۇباتوۆا جاڭا تۋىندىدان ءۇزىندى وقىپ بەرسە، بەلگىلى ونەرپازدار ساۋلە تاۋدايەۆا، ەركىن وتەگەنوۆتەر انمەن كوركەمدەدى. سونداي-اق تەاتردىڭ بەلدى اكتريسالارى گۇلجيان شىنتەمىر، اسەل مامبەتوۆا جانە بيبىگۇل يساليەۆانىڭ ءۇش ابىسىندى بەينەلەۋى دە اسەرلى شىقتى.
