استانادا ايىپپۇلدار كولىك يەلەرىنىڭ ناقتى تۇراتىن جەرىنە جىبەرىلەدى
بۇل تۋرالى ق ر باس پروكۋراتۋراسىنىڭ رەسمي وكىلى وكسانا لوسكۋتوۆا ءمالىم ەتتى، دەپ حابارلايدى قازاقپارات.
«وتكەن جىلدان بەرى «سەرگەك» بەينەباقىلاۋ جۇيەسى ىسكە قوسىلدى. ءتارتىپ بۇزۋشىلىقتار تاۋلىك بويى انىقتالادى، الايدا كوپ ادام ايىپپۇلى بار ەكەنىن بىلە بەرمەيدى. باس پروكۋراتۋرا ىشكى ىستەر ورگاندارىن سيفرلاندىرۋ بويىنشا ماقسات قويدى. بۇل تۇرعىدا مەملەكەتتىك باعدارلاماعا ەنگەن «اكىمشىلىك ءوندىرىسىنىڭ ءبىرىڭعاي رەەسترى» جاسالدى. وسىنىڭ وزىندە استانا، الماتى، تاراز جانە تاعى ءبىرقاتار قالالاردا پوليتسەيلەر حاتتامالاردى پلانشەت ارقىلى تولتىرادى»، - دەپ اتاپ ءوتتى و. لوسكۋتوۆا.
ونىڭ ايتۋىنشا، اقپارات اۆتوماتتى تۇردە ورتالىقتاندىرىلعان مالىمەتتەر قورىنا تۇسەدى. قازىرگى تاڭدا 937 ەكيپاج پلانشەتپەن جۇمىس ىستەيدى جانە وسى كۇنگە دەيىن 60 مىڭنان استام حاتتاما تولتىرىلدى.
«جول-كولىك ەرەجەلەرىن بۇزۋ ارەكەتتەرى فوتو جانە بەينەباقىلاۋ جۇيەلەرىمەن دە بىرىكتىرىلۋدە. ونداي جۇيەلەر بارلىق وڭىرلەردە ورناتىلعان. الايدا بىرەگەي بازا جوق. ايىپپۇل تۋرالى حابارلاما كولىك يەسىنە تىركەلۋ بارىسىندا كورسەتىلگەن مەكەنجايعا جىبەرىلەدى. وكىنىشكە قاراي، ادامنىڭ تۇرعىلىقتى جەرى قاتە كورسەتىلگەن جايتتار جەتەرلىك. سونىڭ سالدارىنان ايىپپۇل تۋرالى ەسكەرتۋ قاعازدارى كولىك يەلەرىنە ۋاقىتىلى جەتپەيدى. ولار ايىپپۇلدىڭ بار ەكەنىنەن بەيحابار بولىپ شىعادى. ناتيجەسىندە، ايىپپۇلدى 50 پايىز جەڭىلدىكپەن وتەۋ قۇقىعىنان ايىرىلادى. ونىڭ ۇستىنە، قازىرگى زاڭ بويىنشا ايىپپۇل تۋرالى ەسكەرتۋ تەك قاعاز تۇرىندە جاسالادى. سول سەبەپتى ونى جەتىلدىرۋ جولدارى قاراستىرىلۋدا. بۇل ماسەلەنىڭ تۇيتكىلىن تابۋ ماقساتىمەن باس پروكۋراتۋرانىڭ قۇقىقتىق ستاتيستيكا كوميتەتى ءوز بازاسىن «سەرگەك» (استاناداعى) بەينەباقىلاۋ جۇيەسىمەن بىرىكتىردى. ەندى ايىپپۇلدار پوشتا ارقىلى كولىك يەلەرىنىڭ قازىرگى تۇراتىن جەرىنە جىبەرىلەدى»، - دەدى وكسانا لوسكۋتوۆا.
سونىمەن بىرگە، نۇسقامانا س م س- حابارلاما نەمەسە ەلەكتروندى پوشتاعا جەتكىزۋ ءۇشىن اكىمشىلىك كودەكسكە وزگەرىس ەنگىزۋ كوزدەلدى. ونىمەن قوسا، جول ەرەجەسىن بۇزۋعا قاتىستى اقپاراتپەن qamqor.gov.kz ينتەرنەت قورىنداعى «ايىپپۇلدار تۋرالى مالىمەت» بولىمىنەن تانىسۋعا بولادى. بۇل اقپاراتتى حابارلاما رەتىندە نازارعا الىپ، قاعاز تۇرىندەگى نۇسقاماسىن كۇتپەي، ايىپپۇلدى ءتيىستى جەڭىلدىكپەن وتەۋگە بولادى.
