اقتاۋلىق جاستاردىڭ كوبى اسكەرگە جارامسىز - قورعانىس ىستەرى جونىندەگى دەپارتامەنت
ولاردىڭ باسىم كوپشىلىگى مەديتسينالىق تەكسەرىستەن سۇرىنگەن. ماڭعىستاۋ وبلىسى قورعانىس ىستەرى جونىندەگى دەپارتامەنتى باستىعىنىڭ ورىنباسارى شىنبولات اقمۇراتوۆ وسىلاي دەپ مالىمدەدى، دەپ حابارلايدى قازاقپارات ءتىلشىسى ماڭعىستاۋدان.
بۇگىندە سارباز اتانۋ وڭاي ەمەس. قاتال ءتارتىپ، جوعارى تالاپ بار. الايدا، سوڭعى ۋاقىتتا شىدامدىلىقتى شىڭدايتىن ۇلكەن مەكتەپكە بارۋشىلار سانى ازايعان. وبلىس بويىنشا كوكتەمگى اسكەرگە شاقىرۋدى 3000 ازامات العان. ونىڭ 1300-گە جۋىعى تىركەۋدەن وتسە، ونىڭ 372- ءى عانا اسكەري تالاپقا ساي دەپ تانىلعان. مەديتسينالىق تەكسەرۋدەن وتپەگەندەر مايتابان، جۇرەك- قان تامىر اۋرۋى بولعاندىقتان سۇرىنگەن.
شىنبولات اقمۇراتوۆتىڭ ايتۋىنشا، تۇرعىلىقتى مەكەنىن اۋىستىرعان ازاماتتاردى تابۋ قيىنعا سوعىپ وتىرعان كورىنەدى.
«بيىل 1800-دەن استام ازاماتقا شاقىرتۋ تاراتىلسا، ونىڭ 872- ءسى عانا ءتيىستى مەكەن- جايعا جەتكەن. سوندىقتان تۇراقتى مەكەن- جاي تابۋ ءۇشىن كوشى- قون پوليتسياسى مەن جەرگىلىكتى پوليتسيا قىزمەتىنە سۇرانىس جولدانعان. بۇل كەمشىلىك جىلدا قايتالانادى»، - دەيدى ول.
ماسەلەن، اكىمدىكتە ارنايى اسكەري ەسەپ ماماندارى جوق. بۇدان بولەك، ىشكى ىستەر ورگاندارى شاقىرۋ قاعازدارى كەلمەگەن ازاماتتاردى ىزدەستىرىپ، اسكەري شاقىرۋ پۋنكتەرىنە جەتكىزبەيدى.
جالپى ماڭعىستاۋدان 36 مىڭنان استام ازامات اسكەري ەسەپكە تىركەلگەن. ونىڭ 397- ءسى عانا ىرىكتەلگەن.
جيىندا ايماق باسشىسىنىڭ ورىنباسارى بەلگىسىز سەبەپتەرمەن تىركەلۋدەن قاشىپ جۇرگەن جاستاردى انىقتاۋ ءۇشىن تاپسىرمالار جۇكتەدى.
«بيىل 710 ادام اسكەرگە بارۋ كەرەك ەكەن. بۇل 700000 حالىقتىڭ 1 پايىزىنا دا جەتپەيدى. سوندىقتان تاپسىرمانى 100 پايىز قامتاماسىز ەتۋدى قولعا الۋ كەرەك. بۇل ەلباسىنىڭ جارلىعى. سوندىقتان ءار اۋداننىڭ اسكەري ءبولىم باسشىلارىنا تاپسىرامىن. ءار جىگىتتى اسكەرگە بارۋعا شاقىرۋ ءۇشىن وتان الدىنداعى بورىشى مەن پارىزىن ايتىپ، جۇرەكتەرىن وياتۋ كەرەك. الداعى ۋاقىتتا جاستاردىڭ اسكەري- پاتريوتتىق تاربيەنى كۇشەيتۋگە، تۋعان جەرگە قىزمەت ەتۋگە ۇندەيتىن جۇمىستار كەرەك»، - دەيدى وبلىس اكىمىنىڭ ورىنباسارى ماقسات سقاقوۆ.
فوتو: newspile.ru
اۆتور: ايگەرىم اشىقبايەۆا
