نازاربايەۆ جاستار تاربيەسىندەگى نەگىزگى ۇستانىمدى اتادى

 «تابىسىمىزدى ەسەلەپ، تاۋەلسىزدىگىمىزدى باياندى ەتە ءتۇسۋ ءۇشىن بىزگە بالتالاسا دا بۇزىلمايتىن بەرىك اۋىزبىرشىلىك كەرەك. بەرەكە- بىرلىگىمىزدى كوزدىڭ قاراشىعىنداي ساقتاي الساق، مەرەكەلى تىرلىگىمىزگە تونەتىن قاۋىپ جوق»، - دەدى مەملەكەت باسشىسى بۇگىن پارلامەنت پالاتالارىنىڭ بىرلەسكەن وتىرىسىندا.

پرەزيدەنتتىڭ ايتۋىنشا، قازىرگى اۋمالى- توكپەلى زاماندا حالىقتىڭ اۋىزبىرلىگى بەرىك بولۋى قاجەت. وسى ورايدا ن. نازاربايەۆ اتا- بابالارىمىزدىڭ ەكى يمپەريانىڭ ورتاسىندا ءومىر ءسۇرىپ، نەشە ءتۇرلى قيامەتتى باستان كەشىرگەنىن دە ەسكە الدى.

 «ماسەلە حالىقتىڭ كوپتىگىندە، ازدىعىندا ەمەس. ماسەلە ادامنىڭ قۋاتتىلىعىندا، ساۋاتتىلىعىندا ەمەس، ماسەلە - رۋحاني بىرلىكتە. جان اياماي، «نە تاۋەلسىزدىك، نە ءومىر جوق» دەگەن قاعيدامەن ءومىر ءسۇرۋىمىز كەرەك. جاستاردى سولاي تاربيەلەگەن ءجون. وسى جەردە ولقىلىقتار بار. ەل مەن جەردىڭ يەسى رەتىندە قازاقستانداعى جاقسى مەن جاماننىڭ بارىنە قازاق جاۋاپتى. وسى ۇلى جاۋاپكەرشىلىكتى سەزىنىپ، بارشا ۇلىستىڭ ۇيىتقىسى بولىپ، وزگەگە ونەگە كورسەتە بىلەيىك، اعايىن»، - دەپ اتاپ كورسەتتى پرەزيدەنت.

 ايتا كەتەيىك، پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازاربايەۆ بىرنەشە باستامانى جاريالادى. اتاپ ايتقاندا، پرەزيدەنت قازاقستاندىقتاردى باسپانامەن قامتاماسىز ەتۋگە باعىتتالعان جاڭا باعدارلامانى جاريالادى.

 بۇدان بولەك، جالاقىسى تومەن قازاقستاندىقتارعا سالىق 1 پروتسەنتكە دەيىن تومەندەيدى. شاعىن نەسيەلەردىڭ كولەمى دە ارتاتىن بولدى. سونداي- اق، مەملەكەت باسشىسى استانانى گازداندىرۋ ماسەلەسىن 1,5 جىلدا شەشۋدى تاپسىردى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى