ايدوس سارىم استانانى گازداندىرۋ جوباسىن ەكسپو كورمەسىنە تەڭەدى
«بۇل - ەلىمىزدە جانە الەمدە بولىپ جاتقان وقيعالارعا بەرىلگەن، ەڭ الدىمەن الەۋمەتتىك مازمۇنى بار كەشەندى جاۋاپ. قازاقستان جۇمىس ورىندارىن اشۋ مۇمكىندىگى كۇردەلى مەملەكەت. وسى جاعدايدا استانانى گازداندىرۋ مەن ونى ارى قاراي باسقا وڭىرلەرگە ۇزارتۋ «ەكسپو» كورمەسىنەن سالىستىرۋعا بولاتىنداي جوبالاردىڭ ءبىرى بولىپ تابىلادى. بۇل - جاڭا جۇمىس ورىندارى مەن جاڭا ينۆەستيتسيالار. گاز قۇبىرلارىنىڭ باعدارىنداعى كوپتەگەن تۇرعىلىقتى ەلدى مەكەندەر ءوزىنىڭ الەۋمەتتىك- ەكونوميكالىق كورسەتكىشتەرىن جاقسارتا الادى»، - دەپ پىكىرىن ءبىلدىردى ايدوس سارىم.
ساياسات تانۋشى ءوز سوزىندە گازداندىرۋ جوباسى ەلوردا تۇرعىندارى مەن استانانىڭ جالپى ەكونوميكاسى ءۇشىن اۋقىمدى ىلگەرىلەۋشىلىك بولاتىنىنا سەنىم ءبىلدىردى.
«قولجەتىمدى باسپانا تۋرالى ايتىلۋدىڭ ماڭىزى ودان كەم ەمەس. يپوتەكالىق باعالاردىڭ تومەندەۋى، ولاردىڭ ءبىر دەڭگەيدە بەلگىلەنۋى، ۇزارتىلۋى - وسى ۇسىنىس پاكەتتەرىنىڭ ىشىندەگى ەڭ ماڭىزدى قادام دەپ ايتۋعا بولادى. بۇل ايقىندىلىققا، جاڭادان ءومىر باستاپ كەلە جاتقان جاس وتباسىلارعا جوسپارلاي بىلۋگە جول اشادى»، - دەدى ساياساتتانۋشى.
ونىڭ ايتۋىنشا، پرەزيدەنتتىڭ باستامالارى ەكونوميكانى ساۋىقتىرۋعا باعىتتالعان.
«بۇل باستامالاردى جۇزەگە اسىرۋ ءۇشىن ۇكىمەت قارجىلاندىرۋدىڭ مەحانيزمدەرى مەن قاينار كوزدەرى بويىنشا جۇمىستى ايقىندايتىن بولادى. سول كەزدە تەرەڭىرەك ايتۋعا بولار. ءبىراق، جالپى بۇل باستامالار جۇزەگە اسىرىلسا، كەلەشەكتە ەل ەكونوميكاسىنىڭ وسىمىنە وڭ سەرپىن بەرەدى»، - دەپ ءتۇيدى ايدوس سارىم.
اۆتور: ايان بەكەن ۇلى
