ينتەرنەتتى شۋلاتقان اناكوندا كاتونقاراعايدا بار ما؟
وسى ورايدا قازاقپارات ءتىلشىسى كاتونقاراعاي مەملەكەتتىك ۇلتتىق تابيعي پاركىنىڭ ماماندارىمەن حابارلاسىپ كوردى.
قىتاي مەن رەسەيدىڭ شەكاراسىنا ءتيىپ جاتقان اتالمىش اۋداننىڭ ەڭ تۇكپىرىندەگى «ارشاتى اۋىلىنان اناكوندا تابىلدى» دەگەن مالىمەت الدىمەن «WhatsАрp» ارقىلى تارادى. كوپ ۇزاماي بارلىق الەۋمەتتىك جەلىدە تالقىلانا باستادى. بارىس-كەلىسى كۇردەلى، ۇيالى بايلانىسى ءالسىز ەلدى مەكەن بۇقتىرما سۋ قويماسىنىڭ جاعاسىندا جاتىر. الىپ جىلان وسى بۇقتىرمانىڭ مۇزىنا كەپتەلىپ قالعان- مىس.
كاتونقاراعاي مەملەكەتتىك ۇلتتىق تابيعي پاركىنىڭ جانۋارلار الەمى ءبولىمىنىڭ باسشىسى ازامات مۇباراكوۆ بۇقتىرمانىڭ اعىسى قاتتى بولعاندىقتان، وندا سۋ جىلاندارى كەزدەسپەيتىنىن ايتادى.
«بىزدە الىپ جىلاندار مۇلدە كەزدەسپەيدى. ەڭ كوپ تاراعاندارىنىڭ تۇرقى 35-40 سانتيمەتر كەلەدى. ەڭ ۇزىندارى 80 سانتيمەترگە جەتەدى. سۋرەتتەگى جىلان بەلقاراعاي، شىڭعىستاي، ارشاتى اۋىلدارىنان تابىلىپتى دەگەن حابار جەلدەي ەسكەنىمەن، وعان سەنگەن ەشكىم جوق. مۇلدە قيسىنعا كەلمەيدى» - دەيدى جانۋارتانۋشى مامان.
كوزى قاراقتى ينتەرنەت پايدالانۋشىلار سۋرەتتەگى تابيعات كورىنىسى دە كاتونقاراعاي اۋدانىنىڭ تابيعاتىنا مۇلدەم ۇقسامايتىنىن اڭعارۋدا.
اۆتور: ەسىمجان ناقتىباي
