ەشكىمنەن كەم بولمايمىن: ەركە ەسماحان كينو تۇسىرەتىنىن مالىمدەدى
بىلتىر قايرات نۇرتاسپەن قاتار ءانشى بۇركىت تىرناقالدى تۋىندىسىن ۇسىنىپ، ءوزىن رەجيسسەر رەتىندە تانىستىرعان بولاتىن. قايراتتىڭ فيلمىن كوپشىلىك جوعارى باعالاعانىمەن، ونىڭ بۇل تابىسىن بۇركىت قايتالاي المادى.
ەندى اتى اتالعان ارىپتەستەرىنىڭ قاتارىنا ەركە ەسماحان دا قوسىلماق نيەتتە. بۇل تۋرالى ەركە Tengrinews.kz سايتىنىڭ «The ەفير» جوباسىنا بەرگەن سۇحباتىندا ايتتى.
«كينو تۇسىرەتىنىم راس. سىنعا دايىنمىن، مەنى كورەرمەندەر جاقسى كورەدى، قولدايدى دەگەن ويدامىن. ءوزىم دە كورەرمەننىڭ ءۇمىتىن اقتايمىن دەگەن ويدامىن. بۇل دا ءبىر بەلەس. ءانشى رەتىندە اياعىما تۇرىپ، ەڭسەمدى كوتەرىپ، ءبىر دارەجەگە جەتكەن كەزدە ادامدا ءارى قاراي تالپىنىس بولۋ كەرەك. تولدىم، ءبىتتى، ەندى مەن مەن كۇشتىمىن دەگەن بولمايدى. سوندىقتان دا ءبىر نارسەنى باسىنان باستاۋ كەرەك بولادى. مىنە، ەندى ءتاي-ءتايلاپ قادام باسايىن دەپ تۇرعانىم - بۇل كينو الەمى»، - دەيدى ەركە اعىنان جارىلىپ.
ءانشى كينو ءتۇسىرۋ ءۇشىن ارنايى كوماندا جاساقتاپ، تالماي-تىنباي ەڭبەكتەنىپ جاتقان كورىنەدى. جاڭالىقتىڭ شەتىن شىعارعانىمەن، ەركە ناقتى قانداي كينو تۇسىرەتىنىن قۇپيادا قالدىردى.
«ءبىر باستان ەكى باس، ەكى باستان ءۇش باس جاقسى دەيدى. بۇل كينونىڭ ارتىندا ۇلكەن ۇجىم تۇر، قانشاما باس تۇر. مەن كينو سالاسىنىڭ دامىپ كەلە جاتقانىنا وتە قۋانامىن. قازىر انشىلەر دە، اكتريسالار دا، جەكە كاسىبى بار ادامدار دا كينو ءتۇسىرىپ جاتىر. مەن ويلايمىن، باسەكە بار جەردە ساپا بار. ساپا بار جەردە ول حالىققا تاربيە بەرەدى، ۇيرەتەدى. حالىق ەرتەڭ ءوزى تۇسىنەتىن بولادى، قايسىسى ساپالى، قايسىسى ساپاسىز»، - دەيدى ەركە.
ەسماحاننىڭ ەركەسى سىنعا قازىردەن باستاپ ءوزىن دايىنداپ جاتقانىن ايتادى. ول انشىلەردىڭ دە ساپالى كينو تۇسىرە الاتىنىن العا تارتىپ، سىنشىلارعا الدىن الا جاۋاپ بەردى.
«وقۋىن وقىپ، كينونىڭ تۇبىنە جەتكەن سىنشىلار بار. ولار «انشىلەر كينو ءتۇسىرىپ، باسىمىزعا بالە بولدى عوي» دەپ ايتاتىن شىعار. ءبىراق ەندى سۇرانىس بار. وعان نۇرلان قويانبايەۆ، نۇرتاس ادامباي، اسەل ءسادۋاقاسوۆا، قۇرالاي اناربەكوۆا، قايرات نۇرتاس دالەل. نەگە مەن دە كەلمەسكە؟ مەنىڭ دە سەناريىم كەم بولمايدى. وسى ءبىرىنشى كينودان كەيىن تۇسىنەتىن بولامىز»، - دەيدى ەركە ەسماحان.
