قىزىلجاردا باۋىرساق كۇنى ءوتتى
باۋىرساق كۇنىنە 800 دەن استام ادام قاتىستى. مۇنداي مەرەكە پەتروپاۆلدا العاش رەت ۇيىمداستىرىلدى. مەكتەپ اۋلاسى قازاق اۋىلىنا اينالعانداي. ۇيىمداستىرۋشىلار بۇل شارا ارقىلى قازاق حالقىنىڭ دارحاندىعىن كورسەتپەك بولعاندىعىن ايتادى.
«قازاق - پەيىلىنىڭ كەڭدىگىمەن، قوناقجايلىعىمەن اتى شىققان حالىق. اتا- بابالارىمىز ءاربىر مەيماندى ەرەكشە قارسى العان. سول ءداستۇرىمىزدى ەسكە الايىق، بالالارعا تاربيە بەرەيىك دەگەن ماقساتتا وسىنداي شارا ۇيىمداستىردىق. باستىسى - وقۋشىلارعا بۇگىنگى توي ۇنادى» ، - دەيدى پەتروپاۆل قالاسىنداعى نازاربايەۆ زياتكەرلىك مەكتەبى ديرەكتورىنىڭ ورىنباسارى باۋىرجان تولەنوۆ.
كۇننىڭ سۋىعىنا قاراماستان حالىق كوپ جينالدى. مەرەكە بارىسىندا وقۋشىلار ءان ايتىپ، بي بيلەپ، ارقان تارتىس ويىنىنا قاتىستى. يگى ىسكە اتسالىسقانداردىڭ اراسىندا مەكتەپ ءمۇعالىمى ەلميرا ەسەنبايەۆا دا بار. ول ۇلتتىق تاعامدى جاساۋدىڭ قىر- سىرىمەن ءبولىستى.
«باۋىرساق كوتەرىلىپ، جاقسى ءپىسۋ ءۇشىن قامىردى ىقىلاسپەن يلەۋ كەرەك. ءوزىمنىڭ قامىر يلەۋ ءتاسىلىم جايىندا ايتار بولسام، ءسۇت، سۋ، اشىتقى قوسامىن. نان جۇمساق بولۋ ءۇشىن سارى مايدى دا پايدالاندىم. ءبىر قاراعاندا باۋىرساق ءپىسىرۋ وڭاي كورىنگەنمەن، تاعام ءدامدى بولۋ ءۇشىن ونى كادىمگىدەي باپتاۋ كەرەك» ، - دەيدى ول.
بۇل كۇنى باۋىرساقتىڭ ءتۇر- ءتۇرى ازىرلەندى. مەرەكەگە كەلگەن مەيماندارعا باۋىرساق بەرىلدى.
«باۋىرساق مەرەكەسى جوعارى دەڭگەيدە ءوتتى. ءبىزدىڭ مەكتەپ وبلىس بويىنشا باۋىرساق كۇنىن العاشقى بولىپ ۇيىمداستىردى. باۋىرساق - قازاق حالقىنىڭ ەڭ تانىمال تاعامدارىنىڭ ءبىرى. سوندىقتان ۇستازدارىمىزبەن بىرگە وسىنداي مەرەكە ۇيىمداستىرۋدى ءجون سانادىق» ، - دەيدى پەتروپاۆل قالاسىنداعى نازاربايەۆ زياتكەرلىك مەكتەبىنىڭ وقۋشىسى ارمانگۇل ەربول.
مەكتەپ ۇجىمى باۋىرساق كۇنىن ۇيىمسداستىرۋ بولاشاقتا داستۇرگە اينالاتىنىن ايتتى.
Baq.kz
