تابىس سالىعى مەن زەينەتاقى جارناسىنا جالاقىنىڭ قانشا پايىزى ۇستالادى؟
وسى ەكەۋى شەگەرىلگەننەن كەيىن قالعان اقشانى قولىڭىزعا الاسىز. بۇل جالپىلاما ەرەجە. ال شىن مانىندە جەكە تابىس سالىعىن ەسەپتەۋدە ەسكەرىلەتىن ەرەجەلەر، جەڭىلدىكتەر كوپ. بىلە جۇرگەنىڭىز وزىڭىزگە جاقسى.
مىسال ءۇشىن ايلىعىڭىز (وكلاد) 170 مىڭ بولسا ونىڭ 10 پايىزى، ياعني، 17 مىڭ اي سايىنعى مىندەتتى زەينەتاقى جارناسىنا اۋدارىلادى. بۇدان 153 مىڭ تەڭگە قالادى. ەندى جەكە تابىس سالىعىن ەسەپتەۋ ءۇشىن جاڭاعى زەينەتاقى جارناسىن شەگەرگەننەن كەيىن قالعان قاراجاتتان ەلىمىزدەگى ەڭ تومەنگى ەڭبەكاقى مولشەرى شەگەرىلەدى. بيىلعى ەڭ تومەنگى ەڭبەكاقى مولشەرى ەلىمىزدە 28284 تەڭگە بولىپ بەكىتىلدى.
ءبىراق جوعارىدا شەگەرگەن 28284 تەڭگەنى ايلىقپەن بىرگە قولىڭىزعا الاسىز. تەك بۇل سوماعا سالىق سالىنبايدى. ياعني جالپى ايلىقتىڭ (وكلاد) زەينەتاقى جارناسىنا كەتەتىن 10 پايىزى مەن ەڭ تومەنگى ەڭبەكاقى سوماسىنا تابىس سالىعى سالىنبايدى. سوندا قولىڭىزعا الاتىن 140528 تەڭگە بولادى. مىنە بۇل ءسىزدىڭ اي سايىن قولىڭىزعا الاتىن ايلىعىڭىز.
بۇل ارادا تاعى ءبىر ماسەلە بار. مۇگەدەكتەر، ون سەگىز جاسقا تولماعان بالا اسىراپ العاندارعا جەكە تابىس سالىعىنا قاتىستى جەڭىلدىك كوپ. ولاردىڭ قولىنا الاتىن ايلىعى باسقالارعا قاراعاندا كوبىرەك بولادى. بۇلار ءار ادامنىڭ جاعدايىنا بايلانىستى جەكە ەسەپتەلەدى. سونداي- اق تۇرعىن ءۇي قۇرىلىس جيناق بانكى ارقىلى ءۇي العاندار ءۇشىن دە جەكە تابىس سالىعىندا جەڭىلدىك بار. اي سايىن بانىككە تولەپ جاتقان نەسيەڭىزدەگى سىياقى سوماسىن سالىق سالىناتىن ەڭبەكاقىڭىزدان شەگەرتىپ، تابىس سالىعىن ازايتا الاسىز. ول ءۇشىن جۇمىس ورنىنا بانكپەن جاساسقان كەلىسىمشارت پەن نەسيەنى وتەۋ كەستەسىن اپارۋىڭىز كەرەك. بۇنىڭ ءبارىن بانكتەگىلەردىڭ دە، بۋحالتەرياداعىلاردىڭ دا ايتىپ وتىرۋعا ۋاقىتى بولا بەرمەيدى. سوندىقتان بۋحالتەرياعا ءوزىڭىز بارىپ، ەسەپتەتكەن ابزال. اقپارات بەرۋگە ولار مىندەتتى.
