ەۋرازيا مۇسىلمان عۇلامالارىنىڭ فورۋمى وتەدى

حالىقارالىق فورۋمعا ق ر پارلامەنتى سەناتىنىڭ ءتوراعاسى قاسىم- جومارت توقايەۆ، ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى وراز جانە پارلامەنت دەپۋتاتتارى قاتىسادى. سونداي- اق، جيىنعا ەۋروپا مەن ورتالىق ازيانىڭ 21 ەلىنەن 35-تەن استام دەلەگات، ەلىمىزدىڭ زيالى قاۋىم وكىلدەرى، جازۋشىلار، تەولوگ- عالىمدار، وبلىستىڭ باس يمامدارى دا قاتىسپاق.

 شەتەلدىك مەيماندار اراسىندا رەسەي مۇسىلماندارى ءدىني باسقارماسىنىڭ جانە مۇفتيلەر كەڭەسىنىڭ ءتوراعاسى راۆيل گاينۋتديننىڭ، تۇركيا رەسپۋبليكاسى ءدىن ىستەرى باسقارماسى ءتوراعاسىنىڭ ورىنباسارى سەليم ارگۋننىڭ، ليتۆا رەسپۋبليكاسى مۇسىلماندارى ءدىني باسقارماسىنىڭ ءتوراعاسى، ءمۇفتي روماس ياكۋباۋسكاستىڭ ارنايى باياندامالارى كۇتىلەدى.

 القالى جيىننىڭ ماقساتى جاڭا زامانداعى مۇسىلمان قاۋىمىنىڭ جاۋاپكەرشىلىگى مەن ءوزارا تۇسىنىگىن قالىپتاستىرۋ، الەمدەگى سىن- قاتەرلەرگە جاۋاپ بەرۋ، مۇسىلمان ۇمبەتىنىڭ ءدىني ەكسترەميزم مەن تەرروريزمگە قارسى يممۋنيتەتىن ارتتىرۋ بولىپ وتىر. بۇدان بولەك، جيىندا ورتاازيالىق تاريحي ءدىني مەكتەپتىڭ ءرولىن ارتتىرۋ، ەلباسىنىڭ «رۋحاني جاڭعىرۋ» باستاماسىنا وراي قازاق توپىراعىنان شىققان الەمگە تانىمال ءدىني تۇلعالاردىڭ ەڭبەگىن ناسيحاتتاۋ، ەۋرازيا ەلدەرىنىڭ ورتاق ءپاتۋالار بازاسىن قالىپتاستىرۋ سەكىلدى ماسەلەلەر دە قوزعالاتىن بولادى.

 قاتىسۋشىلار 2018 -جىلى قازاقستاندا وتەتىن الەمدىك جانە ءداستۇرلى دىندەر ليدەرلەرىنىڭ كەزەكتى سەزىنە ءۇن قوسىپ، الەمدىك ءدىني كەلىسىم مەن تاتۋلىقتىڭ قازاقستاندىق مودەلىن ناسيحاتتاۋعا نازار اۋدارادى. حالىقارالىق باسقوسۋدا «بۇگىنگى مۇسىلماننىڭ كەلبەتى» قۇجاتى قابىلدانىپ، فورۋمعا قاتىسۋشىلاردىڭ قارارى جاريالاناتىنى جوسپارلانعان.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى