جامبىل وبلىسىنداعى ەڭ لاس ايماق بەلگىلى بولدى

«وسىعان قاراي قازىر جاعدايدا باقىلاۋعا الۋ ءۇشىن كەشەندى شارالار اتقارىلۋدا. جامبىل وبلىسىنىڭ اۋماعىندا وڭىردەگى ەكولوگيالىق جاعدايعا مونيتورينگ جۇرگىزىپ وتىراتىن 9 ستانسا بار»، - دەيدى جامبىل وبلىسىنىڭ باس ەكولوگيالىق ينسپەكتورى ەرلان قويشىبايەۆ.

ونىڭ سوزىنشە، 2017-جىلى جۇرگىزىلگەن زەرتتەۋلەردىڭ ناتيجەسى بويىنشا، جامبىل وبلىسىنداعى ەڭ لاس قالا قاراتاۋ ەكەنى بەلگىلى بولدى. اتالمىش ايماقتا لاستانۋ يندەكسى 7,39 دى قۇراعان. ال تارازدا بۇل كورسەتكىش بۇدان تومەندەۋ - 5,37. دەگەنمەن بۇل از ەمەس.

قاراتاۋ تالاس اۋدانىنىڭ اكىمشىلىك ورتالىعى. ونەركاسىپ كاسىپورىندارى شوعىرلانعان بۇل قالا قاراتاۋ-جاڭاتاس فوسفور باسسەينىنىڭ ورنىنا سالىنعان. 90-جىلدارى بۇل ءوڭىر توقىراۋعا ۇشىرادى. ال قازىر ايماقتا ونەركاسىپ قارقىندى دامىپ، ينفراقۇرىلىمى جاڭارىپ كەلەدى.

ەرلان قويشىبايەۆتىڭ سوزىنشە، 2003-جىلدان باستاپ، ونەركاسىپ ءونىمىنىڭ كولەمى ايماقتا قاراتاۋدى قوسا العاندا 2,5 ەسەگە ارتقان.

«مۇندا شامامەن 50 گە جۋىق ونەركاسىپ جانە قايتا وڭدەۋ كاسىپورىندارى اشىلدى. وسىعان بايلانىستى اۋاعا لاستاۋشى زاتتاردىڭ دا تاستالۋى ۇدەدى. 10 جىل بۇرىن زياندى زاتتاردىڭ اۋقىمى وبلىس بويىنشا، 20 مىڭ توننانى قۇراسا، بۇگىن بۇل كورسەتكىش 70 كە جەتكەن. بۇل رەتتە كولىكتەردەن بولىنەتىن زياندى گازدار دا قورشاعان ورتانىڭ لاستانۋىنا ايتىرلاقتاي ىقپال ەتىپ وتىرعاندىعىن ايتا كەتكەن ءجون. 2007-جىلى تارازدا 90 مىڭنان استام كولىك بولعان بولسا، بۇگىنگى ولاردىڭ سانى ءۇش ەسەگە ارتقان. سوعان قاراي اۋادا ازوت وكسيدى مەن كومىرقىشقىل وكسيدى كوبەيگەن. مۇنىڭ ءبارى ارينە، ادامداردىڭ دەنساۋلىعىنا زيان»، - دەدى ەرلان قويشىبايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى