شىعىس قازاقستان ءوڭىرىنىڭ اڭىزدارى مەن ەرتەگىلەرى ءبىر كىتاپقا جيناقتالدى
اتالمىش كىتاپتا وبلىستاعى 15 كيەلى ورىن جايلى اڭىزدار جيناقتالىپتى: ەرتىس وزەنى، قيىن كەرىش شاتقالى، مارقاكول كولى، راحمان قاينارلارى، مۇزتاۋ، قوڭىر اۋليە، قاسيەتتى بۇلاق، ىرعىزباي اتا كەسەنەسى، بەرەل قورعاندارى، شىلىكتى قورىمى، ەڭلىك-كەبەك كەسەنەسى، قوزى كورپەش-بايان سۇلۋ مازارى، كۇشىكباي، ابلايكيت بەكىنىسى، اقباۋىر. اڭىز-ەرتەگى تۇرىندە جازىلعان تۋىندى بالالار اۋديتورياسىنا ارنالعان ەكەن.
وبلىستىڭ اڭىزدارى مەن ەرتەگىلەرى نەگىزىندە كىتاپ شىعارۋ يدەياسى وتكەن جىلى پايدا بولعان. مۇنداعى نەگىزگى ماقسات - ءوڭىردىڭ قاسيەتتى ورىندارىن كەڭىنەن ناسيحاتتاۋ، جاس ۇرپاقتى ءوز ولكەسىنىڭ تاريحىن بىلۋگە باۋلۋ ارقىلى كوركەم ادەبيەت وقۋعا قىزىعۋشىلىعىن ارتتىرۋ. ال ونىڭ ەلەكتروندى نۇسقادا شىعارىلۋى باسىلىمدى بارىنشا قولجەتىمدى ەتۋگە باعىتتالعان ەكەن.
كىتاپتا باستى ەكى كەيىپكەر بار: سانجار ەسىمدى بالا مەن ونىڭ اتاسى. ەكەۋى شىعىس قازاقستاندى ارالاپ، ساياحاتقا شىعادى. ولاردىڭ ءجۇرىپ وتكەن جولدارى كىتاپتىڭ باس بەتتەرىندەگى كارتادا كورسەتىلگەن. ءار اڭىز- ەرتەگىگە «دارىن» ورتالىعىنىڭ، وسكەمەن قالاسىنىڭ بالالار كوركەمونەر مەكتەبىنىڭ جانە وقۋشىلار شىعارماشىلىق سارايىنىڭ سۋرەت بايقاۋلارىنداعى جەڭىمپازداردىڭ سۋرەتتەرى ارقىلى يلليۋستراتسيا جاسالعان. كىتاپ مۇقاباسى بەرەل قورىمىندا تابىلعان ارتەفاكتىلەردىڭ نەگىزىندە جاسالعان ويۋ-ورنەكتەرمەن كوركەمدەلىپ، ۇزىن اق ساقالدى قاريا بەيلەنەگەن. ول وتكەن زامانمەن مەن وسى كۇندى بايلانىستىرىپ، وقىرماندارعا سول ارالىقتا جيناقتالعان دانالىقتى جەتكىزىپ وتىرعانداي. سونىمەن قاتار، مۇندا وبلىس اۋماعىن مەكەندەيتىن ءتۇرلى حالىقتاردىڭ ماقال-ماتەلدەرى دە قولدانىلعان.
«ءبىز ازىرشە ەل اۋزىنداعى 15 كيەلى ورىندى عانا بەرىپ وتىرمىز. ءبىراق بۇل جوبانىڭ تەك باستاماسى عانا. الداعى ۋاقىتتا توپتامانى تولىقتىرۋدى جوسپارلاپ وتىرمىز - دەدى تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەبايەۆ.
اتالمىش باسىلىم تۋريزم باسقارماسىنىڭ toureast.kz رەسمي سايتىندا جاريالانىپ، كەز كەلگەن وقىرمانعا قولجەتىمدى بولماق.
