استانادا اقىلى تۇراقتارعا قانشا ميلليارد جۇمسالادى، قانشا تابىس تۇسەدى؟
بۇل ماقساتقا 2 ميلليارد تەڭگەگە جۋىق قاراجات جۇمسالماق، دەپ حابارلايدى قازاقپارات «استانا اقشامى» گازەتىنە سىلتەمە جاساپ.
ەلوردادا اقىلى تۇراقتاردى ۇيىمداستىرۋ ءۇشىن جاڭادان «استانا اۆتوتۇراق كەڭىستىگى» ج ش س قۇرىلدى. تۇراقتار بويىنشا قازىرگى جاعداي مەن الداعى جوسپارلار تۋرالى كاسىپورىن ديرەكتورى ارداق تۇرعانقۇلوۆ ايتىپ بەردى.
ونىڭ ايتۋىنشا، اقىلى تۇراقتاردىڭ جوبالارىن جاساۋدىڭ ءوزى 200 ميلليون تەڭگەگە جۋىق قاراجاتتى قاجەت ەتەدى.
«قازىرگى مەزەتتە ينۆەستور اتالمىش جوبا ءۇشىن 400 ميلليون تەڭگەدەن ارتىق اقشا سالىپ، ءوزىنىڭ مىندەتتەمەلەرىن تولىق ورىندادى دەۋىمىزگە بولادى. ءبىزدىڭ ەسەبىمىز بويىنشا، استاناداعى 9700 تۇراق ورنى جوباسىنىڭ جالپى قۇنى 2 ميلليارد تەڭگەنىڭ شاماسىندا قارجى جاراتۋدى تالاپ ەتەدى. مۇندا جوبا جاساۋدىڭ وزىنە عانا 200 ميلليون تەڭگەگە جۋىق قاراجات جۇمسالادى»، - دەيدى ول.
اقىلى تۇراقتار سالىنعان قاراجاتتى كەمىندە 20 جىلدان كەيىن اقتاي باستايدى. ءبىراق اتاپ وتىلگەندەي، جوبانىڭ باستى مىندەتى - تۇراق ورىندارىنىڭ قولجەتىمدىلىگىن قامتاماسىز ەتۋ. ماشينالاردىڭ وفيس تەرەزەلەرى الدىندا ساعاتتاپ تۇرىپ قالماۋىنا مۇمكىندىكتەر جاساۋ.
«جوبا اۆتوتۇراق ورىندارىنىڭ ورتا ەسەپپەن 70 پايىزى تۇراقتى پايدالانىلىپ تۇرعان جاعدايدا، ىسكە قوسىلعان ءتورتىنشى جىلىندا تازا تابىس اكەلە باستايدى. ال ونىڭ ءوزىن- ءوزى اقتاۋ مەرزىمى ۇسىنىلعان تەحنولوگيالىق شەشىمنىڭ شەڭبەرىندە كەمىندە 20 جىل بولعان كەزدە عانا باستالادى. اتالمىش مەرزىمنىڭ قارجى مودەلىنە سايكەس، وسى ۋاقىت ىشىندە ولارداعى جابدىقتاردى تولىق اۋىستىرىپ شىعۋدى كوزدەيتىن 3 تەحنولوگيالىق رەنوۆاتسيا جۇرگىزۋ جوسپارلانىپ قويىلعان»، - دەدى ج ش س باسشىسى.
الدىن الا ەسەپتەۋلەر بويىنشا، اقىلى تۇراقتاردى پايدالانۋ كورسەتكىشى 100 پايىز بولعان جايدايدا، ولاردان ايىنا 12,5 ميلليون تەڭگەگە جۋىق اقشا ءتۇسىپ تۇرادى.
ارداق تۇرعانقۇلوۆ سونداي-اق 100 تەڭگە دەپ بەلگىلەنگەن تۇراقتاردىڭ قۇنىنا قانداي شىعىندار ەنگىزىلگەنىن ايتىپ بەردى.
«تۇراقتىڭ 1 ساعاتتىق باعاسى 100 تەڭگە تۇرادى. مۇنىڭ 12 تەڭگەسى - سالىققا، 9 تەڭگەسى تۇراق ايماعىن ۇستاپ تۇرۋعا ۇستالادى. تاعى 10 تەڭگەنى امورتيزاتسياعا بەرەمىز، 21 تەڭگەنى تۇراقتاردى پايدالانۋعا، تەحنيكالىق قىزمەت كورسەتۋگە، جوندەۋگە، باسقارۋ جۇيەسىنە تولەيمىز، 23 تەڭگە ينۆەستيتسيانى قايتارۋعا جۇمسالادى، 5 تەڭگە قىزمەتكەرلەردىڭ جالاقىسى بولسا، تاعى 5 تەڭگە تولەم اگەنتىنىڭ كوميسسياسىنا كەتەدى، 7 تەڭگە مەملەكەتتىك ارىپتەسكە ۇسىنىلادى، ال 8 تەڭگە جەكە ارىپتەستىڭ تازا تابىسى بولىپ تابىلادى»، - دەيدى ول.
الداعى تاياۋ ۋاقىتتا تاريفتى 100 تەڭگەدەن اسىرۋ كوزدەلمەگەن.
تۇراق ءۇشىن اقى تولەۋدەن باس تارتقان كولىك يەلەرىنە جاۋاپكەرشىلىك تە قاراستىرىلعان.
ەگەر بۇزۋشىلىق ءبىر جىلدا ەكىنشى رەت قايتالانسا، اكىمشىلىك قۇقىق بۇزۋشىلىق كودەكسىنە سايكەس، جالاقىنىڭ ەڭ تومەنگى مولشەرىنىڭ 5 ەسەلەنگەن كولەمىندە ايىپپۇل سالىنادى.
«ەلوردا ءۇشىن مۇنداي جوبانىڭ كەرەك ەكەنى ەش كۇمان تۋعىزبايدى. قازىرگى زامانعى مەگاپوليستەر ءۇشىن ول اۋاداي قاجەت نارسە. استانادا تەك كولىك يەلەرى عانا ەمەس، سونىمەن بىرگە جاياۋ جۇرگىنشىلەر دە تۇرادى. وسىعان وراي ءبىز ەكى جاقتىڭ دا مۇددەلەرىن ەسكەرۋىمىز كەرەك. ءبىراق قازىرگى تاڭداعى استانانىڭ ەڭ باستى پروبلەماسى كۇندەلىكتى بولىپ جاتاتىن قالا ورتالىعىنداعى كەپتەلىستەر مەن تەجەلىستەر بولىپ تۇر... جالپى جوباداعى 9700 تۇراقتىق ورىن جىلدىڭ سوڭىنا دەيىن تولىق دايىندالۋى ءتيىس»، - دەدى كاسىپورىن باسشىسى.
جوسپار بويىنشا، جاڭا اقىلى تۇراقتار بيىلعى جىلدىڭ ءبىرىنشى توقسانىندا قونايەۆ، سارايشىق، سىعاناق كوشەلەرىندە، ماڭگىلىك ەل، جانە قابانباي باتىر داڭعىلدارى اۋداندارىندا، ال جىلدىڭ سوڭىنا دەيىن ءۋاليحانوۆ، بارايەۆ كوشەلەرى مەن سارىارقا، بوگەنباي باتىر، رەسپۋبليكا داڭعىلدارى اۋماقتارىندا پايدا بولادى.
ەسكە سالايىق، اعىمداعى جىلدىڭ قاڭتار ايىندا «استانانىڭ كولىك تۇراعى كەڭىستىگىن باسقارۋ» جوباسىنىڭ العاشقى كەزەڭى اياسىندا «نۇرجول» جەلەك جولىندا اقىلى تۇراق جۇمىس ىستەي باستادى.
