اقتوبەلىك وقۋشى قىزدار شولپىسى سىلدىرلاپ ساباققا بارىپ ءجۇر
اقتوبە قالاسىنداعى №31 ورتا مەكتەپتىڭ قىزدارى مەرەكە كۇندەرى شولپى تاعادى. «شولپى» كلۋبىنىڭ مۇشەلەرى شاشقا تاعاتىن اشەكەيدى وزدەرى دايىنداپ العان.
«اقتوبە وبلىسىنداعى «شولپى» كلۋبى ءبىزدىڭ مەكتەپتەن دە اشىلدى. قازىر 500-گە جۋىق وقۋشى قىز وسى كلۋبتىڭ مۇشەسى. ولار ءۇشىن ارنايى بولمە بەرىلدى. قىزدار بوس ۋاقىتىندا قولونەر بۇيىمدارىن دايىندايدى، كەيبىرى ونى ساتادى. الداعى ۋاقىتتا تۇلەكتەرىمىزدىڭ بيزنەسىنە اينالادى دەگەن سەنىم بار. ءارى بۇل ۇلتتىق سالت- ءداستۇرىمىزدى جاڭعىرتۋعا ارنالعان جۇمىس»، - دەدى مەكتەپ مۇعالىمى ورىنگۇل ىدىرىسوۆا.
№31 ورتا مەكتەپتە بارلىعى 1500-گە جۋىق وقۋشى بار. ولاردىڭ 800-دەن استامى قىزدار. ۇستاز ورىنگۇل ىدىرىسوۆانىڭ ايتۋىنشا، قىزداردىڭ 80 پايىزدان استامى بۇرىمدى. ءبىر- ءبىرىنىڭ شاشىن ءورىپ، ۇلگى كورسەتەتىن قىزدار قالاداعى قىز سىنىنا ءجيى قاتىسىپ تۇرادى.
«وقۋشى قىزدار ۇنەمشىل، كىشىپەيىل. ولار تۋعان كۇنىنە بەرىلگەن مونشاقتاردى، اناسىنا قاجەت بولماعان اشەكەيدى اكەلىپ، جاڭا بۇيىم دايىندايدى. قىزدار وزدەرى تاعىپ جۇرگەن شولپىنىڭ جاسالۋىن اقتوبەلىك شەبەر بولات اتراۋبايەۆتان دا ۇيرەندى. سونىمەن قاتار، تاريحي- ولكەتانۋ مۇراجايىنا بارىپ، اشەكەيلەردىڭ شىعۋ تاريحىمەن تانىستى. ءقازىر ولار شولپى مەن وڭىرجيەك جاسايدى. ءبارى ونىڭ شىعۋ تاريحىن ءبىلىپ، شولپى تاعۋعا ۇمتىلادى»، - دەدى ورىنگۇل ءىدىرىسوۆا.
ايتا كەتەيىك، قازىرگى كەزدە №31 ورتا مەكتەپتىڭ بۇل تاجىريبەسىن وزگە ءبىلىم وردالارى ۇلگى ەتىپ، تاربيەلىك ادىستەمە رەتىندە قولدانىسقا ەنگىزىپ جاتىر.
اۆتور: التىناي ساعىندىقوۆا
