باقىتجان ساعىنتايەۆ ءبىلىم رەفورمالارى جايلى: قوعام پىكىرىن ەسكەرۋ قاجەت
«مەملەكەت باسشىسى جاقىندا ەلىمىزدىڭ 2025 -جىلعا دەيىنگى ستراتەگيالىق دامۋ جوسپارىن بەكىتتى. وسى جوسپاردا ءبىلىم جۇيەسى ارقىلى ادامي كاپيتالدى دامىتۋعا ەرەكشە كوڭىل ءبولىنىپ وتىر. قازىر جاڭا باعدارلامالار دايىندالۋدا. وقۋلىقتار ازىرلەنۋدە. مۇعالىمدەردىڭ جالاقىسى ءوسىپ كەلەدى. مۇنىڭ بارلىعى ءبىلىم بەرۋ ساپاسىنا ىقپال ەتۋى ءتيىس. دەگەنمەن، ءبىلىم سالاسىندا اتقارىلىپ جاتقان پروتسەستەردىڭ بارلىعىنا قوعامدىق تۇسىنبەۋشىلىكتەر بار»، - دەيدى پرەمەر- مينيستر ۇكىمەت وتىرىسىندا.
باقىتجان ساعىنتايەۆتىڭ ايتۋىنشا، اتا-انالار، پارلامەنت دەپۋتاتتارى تاراپىنان بۇل باعىتتا سىندار ايتىلىپ جاتىر.
«ونى ەرلان كەنجەعالي ۇلى (ءبىلىم جانە عىلىمي ءمينيسترى - اۆت.) ءوزىڭىز دە ءبىلىپ وتىرسىز. بۇل جەردە اتقارىلىپ جاتقان جۇمىستار توڭىرەگىندە داۋ تۋعىزىپ وتىرعانى - رەفورمالاردىڭ ساپاسى. جىلدان جىلعا قايتالاناتىن ماسەلە - بۇل وقۋلىقتاردىڭ جەتكىلىكتى دەڭگەيدە ساپالى جاسالماۋى نەمەسە جەتكىزىلمەۋى. وسىعان اسا كوڭىل ءبولۋ قاجەت. بۇعان ەرلان كەنجەعالي ۇلى، جەكە ءوزىڭىز جاۋاپ بەرەسىز. جانە ءبىزدىڭ اتقارىپ جاتقان جۇمىستاردىڭ دەڭگەيىندەگى مۇعالىمدەردىڭ جانە قوعامنىڭ پىكىرىن ەسكەرۋىمىز قاجەت. ەگەر دە ءبىز قوعامدىق تالقىلاۋ جاسامايتىن بولساق، ۇنەمى وسىنداي تۇسىنبەۋشىلىككە تاپ بولامىز. سوندىقتان دا اقپاراتتىق ءتۇسىندىرۋ جۇمىستارىن كۇشەيتۋدى تاپسىرامىن»، - دەدى باقىتجان ساعىنتايەۆ.
