وڭتۇستىك كورەيانىڭ پحەنچحان قالاسىنداعى قىسقى وليمپيادا ويىندارى اياقتالدى - فوتو
اتالعان حالىقارالىق سپورت مەرەكەسىنىڭ سالتاناتتى جابىلۋ ءراسىمى ءوتتى، دەپ حابارلايدى قازاقپارات ءتىلشىسى.
وليمپيادانىڭ جابىلۋ سالتاناتى دا اشىلۋى سياقتى قىزىقتى ءارى اسەرلى ءوتتى. كورەيالىقتار جارىق تەxنولوگيالارىن شەبەر كولدانا ءبىلدى. تريبۋنادا ورناتىلعان شاعىن LED قۇرىلعىلار ارقىلى الەم ەلدەرىنىڭ تۋلارى، وليمپيادانىڭ قۋانىشتى ساتتەرى جانە تاعى باسقا ايشىقتى كورىنىستەر بەرىلدى. ال ستاديوننىڭ قاق ورتاسىنداعى ساحنادا ارتىستەر تاماشا شوۋ باعدارلامانى كورسەتتى. ۇيىمداستىرۋشىلار كارىس حالقىنىڭ ۇلتتىق سالت-ءداستۇرىن، ۋاقىتتىڭ ەشكىمگە باعىنبايتىن كۇشىن، دوستىق پەن بىرلىكتى شەبەر جەتكىزە ءبىلدى. پحەنچحان وليمپياداسىنىڭ تاليسمانى - سۋحوران اتتى جولبارىستىڭ بەينەسىن دە دروندار ارقىلى ادەمى كورسەتتى.
سالتاناتتى شارا بارىسىندا حالىقارالىق وليمپيادا كوميتەتىنىڭ ءتوراعاسى توماس باح ايەلدەر اراسىنداعى 30 شاقىرىمدىق ماسس-ستارتتا جەڭىمپاز اتانعان ماريت بورگەنگە التىن مەدالدى تابىستادى. نورۆەگيالىق سپورتشى وسىمەن وليمپيدانىڭ سەگىز دۇركىن چەمپيونى اتانىپ وتىر. پحەنچحاندا ول ەكى التىن، ءبىر كۇمىس جانە ەكى قولا ۇتىپ الدى. ەرلەر اراسىنداعى ماسس- ستارتتا فين سپورتشىسى جەڭىسكە جەتتى. ال رەسەيدىڭ ەكى شاڭعىشىسى كۇمىس پەن قولانى قاناعات تۇتتى. ولاردى دا حوك باسشىسى قۇتتىقتاپ، مەدال تاپسىردى.
«بيىلعى اق وليمپيادادا وڭتۇستىك كورەيا مەن سولتۇستىك كورەيانىڭ سپورتشىلارى بىرگە شىعىپ، تاتۋلىق پەن دوستىقتى پاش ەتتى. وليمپيادا قوزعالىسىنىڭ نەگىزگى ماقساتى دا سول، سپورت ارقىلى بىرلىكتى كۇشەيتۋ، حالىقتار دوستىعىن نىعايتۋ. بۇگىن وليمپيادانىڭ الاۋى سونسە دە، ءبىزدىڭ دوستىقتى كۇشەيتۋ جولىنداعى قىزمەتىمىز جالعاسا بەرەدى»، - دەدى ت. باح.
كەلەسى ولميپيادا ويىندارى 2022 -جىلى قىتايدىڭ بەيجىڭ قالاسىندا وتەدى.
ايتا كەتەيىك، وڭتۇستىك كورەيادا وتكەن XXIII قىسقى وليمپيادا ويىندارىندا قازاقستان قۇراماسى ءبىر عانا جۇلدە - قولا مەدالدى جەڭىپ الدى. ونى ەل قورجىنىنا فريستايلشى يۋليا گالىشەۆا سالعان بولاتىن.
جالپى، وسى جولعى وليمپيادا ويىندارىندا قازاقستاننان 46 سپورتشى سپورتتىڭ 9 تۇرىنەن ەل نامىسىن قورعادى. اتاپ ايتقاندا، بياتلونشىلار ۆاسيلي پودكورىتوۆ، ماكسيم براۋن، ۆلاديسلاۆ ۆيتەنكو، تيمۋر حاميتگاتين، رومان ەرەمين، الينا رايكوۆا، داريا كليمينا، گالينا ۆيشنەۆسكايا، ولگا پولتورانينا جانە ەليزاۆەتا بەلچەنكو سپرينت، ىزگە ءتۇسۋ، جەكەلەي سايىس، ماسس- ستارت، ارالاس ەستافەتا جانە ەستافەتادا ونەر كورسەتتى.
فريستايلدا 9 سپورتشىمىز بولدى. موگۋلدا - دميتري رەيحەرد، پاۆەل كولماكوۆ، يۋليا گالىشەۆا جانە اياۋلىم امرەنوۆا، اكروباتيكادا جارىسىندا - مارجان اقجىگىت، جانبوتا الدابەرگەنوۆا، ايانا جولداس، اقمارجان قالمۇرزايەۆا جانە يلدار بادرۋتدينوۆ، شاڭعى جارىسىندا - الەكسەي پولتورانين، دەنيس ۆولوتكا، ەۆگەني ۆەليچكو، ۆيتالي پۋحكالو، ۆالەريا تيۋلەنيەۆا، اننا شيەۆچەنكو مەن ەلەنا كولومينا، شورت- ترەكتە - نۇربەرگەن جۇماعازيەۆ، ابزال اجىعاليەۆ، دەنيس نيكيشا، ەركەبۇلان شامۇحانوۆ، مەرسايد جاقسىبايەۆ، اناستاسيا كرەستوۆا مەن ا يونگ كيم، ال كونكي تەبۋدە - رومان كرەچ (500، 1000 م)، ستانيسلاۆ پالكين (500، 1000، 1500 م)، ارتەم كريكۋنوۆ (500 م)، فەدور مەزەنسەۆ (1000، 1500 م، ماسس- ستارت)، دەنيس كۋزين (1000، 1500 م) جانە ەكاتەرينا ايدوۆا (500، 1000، 1500 م)، تاۋ شاڭعىسىندا - يگور زاكۋردايەۆ پەن ماريا گريگوريەۆا، ال نيكيتا كوپىرەنكو شانا سپورتىنان سىنعا تۇسسە، سەرگەي تكاچەنكو ترامپليننەن سەكىرۋدەن باق سىنادى.
وسى جولى مانەرلەپ سىرعاناۋدا العاش رەت ءۇش بىردەي سپورتشىمىز ونەر كورسەتتى. ولار - دەنيس تەن، ەليزابەت تۇرسىنبايەۆا جانە ايزا مامبەك. الايدا بىردە-بىرەۋى جۇلدەگە ىلىگە المادى. وسىلايشا، قازاقستان قۇراماسى وسىدان ءتورت جىل بۇرىن رەسەيدىڭ سوچي قالاسىندا وتكەن وليمپيادانىڭ جەتىستىگىن قايتالادى. ول مەدالدى دەنيس تەن جەڭىپ العان بولاتىن.
پحەنچحاندا ءبىر قازاق قىزىنىڭ وليمپيادا چەمپيونى اتانعانىن دا ەرەكشە اتاپ وتكەن ءجون. دينارا الىمبەكوۆا بەلارۋس قۇراماسىنىڭ ساپىندا بياتلوننان 4x6 شاقىرىم ەستافەتالىق جارىستىڭ جەڭىپازى بولدى. دينارا 1996 -جىلى 5 -قاڭتاردا قاراعاندى وبلىسى اباي اۋدانىندا دۇنيەگە كەلگەن. 3 جاسىندا وتباسىمەن بەلارۋستىڭ چاۋسى قالاسىنا قونىس اۋدارعان. ونىڭ اكەسى - قازاق، اناسى - بەلارۋس. وزىنەن كەيىن ەۆگەني اتتى ءىنىسى بار.
العاشىندا دينارا شاڭعى سپورتىمەن اينالىسقان. 2008 -جىلى بياتلونعا اۋىسادى. سول جىلى رەسپۋبليكالىق «سنەجنىي سنايپەر» جارىسىندا جەڭىمپاز اتانعان. شاڭعى جارىسى بويىنشا بەلارۋس بىرىنشىلىگىندە، حالىقارالىق سايىستاردا (2009) جانە جازعى بياتلون بويىنشا رەسپۋبليكالىق سپارتاكيادادا (2011) چەمپيون اتانعان. ال پحەنچحان وليمپياداسىنداعى جەڭىستەن كەيىن بەلارۋس پرەزيدەنتى الەكساندر لۋكاشەنكو دينارا الىمبەكوۆانى ارنايى ناگرادامەن ماراپاتتادى.
ايتا كەتكەن ءجون، بيىلعى وليمپيادادا رەكوردتار كوپ بولدى. ال نورۆەگيا قۇراماسى مەدال سانى جاعىنان جاڭا رەكورد ورناتتى. اتالعان ەلدىڭ قۇراماسى بارلىعى 39 مەدالدى جەڭىپ الدى. قازاقستان ءبىر قولا مەدالمەن جالپى كوماندالىق ەسەپتە 28-ورىندا جايعاستى.
فوتو: دانيار مايلىبايەۆ
اۆتورى كۇنسۇلتان وتارباي
