ايمان مۇساقوجايەۆانىڭ الەمدى مويىنداتقان شاكىرتتەرى استانادا باس قوستى

«قازاق كونسەرت» مەملەكەتتىك ۇيىمىنىڭ «سوليستەر اكادەمياسى» مەملەكەتتىك وركەسترىنىڭ سۇيەمەلدەۋىمەن ءبىر كەزدەرى ۋنيۆەرسيتەتتى ءبىتىرىپ كەتكەن تۇلەكتەر بۇگىنگى كەشتە بار ونەرىن سالدى. وعان سەبەپ تە جوق ەمەس. بۇگىن دە الەمدى مويىنداتقان ونەرپازدارعا اينالعان سكريپكاشىلار ىرگەلى ۋنيۆەرسيتەتتىڭ 20 جىلدىعىنا وسىلاي قۇرمەتىن كورسەتىپ وتىر.

كونسەرتكە ا ق ش- تان ارنايى تانىمال ديريجەر ەدۋارد شميددەر شاقىرىلعان. ودان بولەك ۋنيۆەرسيتەتتىڭ تۇلەكتەرى ورالبەك دۇيسەن، ايشا دوسىموۆا، ەلدار ساپارايەۆ، پاۆەل رومانەنكو، مادينا كاپەۋ، انەل شاكىروۆا، اننا مەشەرياكوۆا، سەرگەي ۆاسيلەۆ سىندى شەتەلدە قازاقستاننىڭ ونەرىن تانىتىپ جۇرگەن ونەرپازدار جەكە تۋىندىلاردى ورىنداپ، كوپشىلىكتىڭ قوشەمەتىنە يە بولدى.

«بۇگىن قازاق ۇلتتىق ونەر ۋنيۆەرسيتەتىنىڭ 20 جىلدىعىنا ارنالعان كونسەرتتەردىڭ العاشقى سەرياسىن وتكىزىپ جاتىرمىز. وسى كونسەرتتە ءبىزدىڭ ۋنيۆەرسيتەتتىڭ قابىرعاسىنان تۇلەپ ۇشقان شاكىرتتەرىمىز، جۇلدىزدارىمىز ونەر كورسەتۋدە. شاكىرتتەرىمىز الەمنىڭ بارلىق ەلدەرىنەن ارنايى ات تەرلەتىپ كەلدى. البەتتە، وسىناۋ شارانى ۇيىمداستىرۋعا قولداۋ ءبىلدىرىپ وتىرعان ەلىمىزدىڭ پرەزيدەنتىنە زور العىسىمىزدى ايتقىم كەلەدى. 20 جىلدىڭ ىشىندە ءبىزدىڭ وقۋ ورنى - ەل مادەنيەتىنىڭ بەينەسىنە اينالدى دەسە دە بولادى. جىل بويى ۋنيۆەرسيتەتىمىزدىڭ جەتكەن بەلەستەرىن كورسەتۋگە بارىمىزدى سالامىز»، - دەيدى ايگىلى سكريپكاشى، قازاقستاننىڭ ەڭبەك ەرى، اتالعان ۋنيۆەرسيتەتتىڭ رەكتورى ايمان مۇساقوجايەۆا.

قازاق ۇلتتىق ونەر ۋنيۆەرسيتەتىنىڭ اتالعان شاكىرتتەرى بۇكىل الەمدە گاسترولدىك ساپارعا ءجيى شىعاتىن ونەرپازدار. ماسەلەن، وردابەك دۇيسەن مەن ايشا دوسىموۆا سىندى سكريپكاشىلار ەكى مىڭىنشى جىلداردىڭ باسىندا ا ق ش كوشىپ، سودان بەرى ونەرىن تۇلەتۋ ۇستىندە. وردابەك دۇيسەننىڭ ايگىلى نيككولو پاگانينيمەن ءبىر كونسەرتتە ونەر كورسەتكەن قازاقستاندىق تۇڭعىش سكريپكاشى ەكەنىن ايتا كەتۋ كەرەك.

ەكى بولىمگە سوزىلعان كونسەرتتە چايكوۆسكي مەن ۆيۆالديدىڭ، موتسارت پەن پياتسوللانىڭ تۋىندىلارى ورىندالدى. ساز اۋەننىڭ سيقىرىنا تەرەڭ بويلاتقان سكريپكاشىلار مەن ۆيولونچەل، فورتەپياو شەبەرلەرى ۇزاققا سوزىلعان قوشەمەتپەن حالىقتىڭ قۇرمەتىنە يە بولدى.

فوتو: mfa.gov.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى