ماسكەۋ ماڭىندا قۇلاعان ۇشاقتىڭ ىقتيمال سەبەپتەرى ايتىلدى
بۇل تۋرالى رەسەيدىڭ مەملەكەتارالىق اۆياتسيالىق كوميتەت (م ا ك) بورتتىق پارامەترلىك جازۋ قۇرىلعىسىنداعى دەرەكتەردى اشقان سوڭ مالىمدەدى، دەپ جازدى تاسس اگەنتتىگى.
«جازۋ قۇرالىنداعى وزگە ۇشۋلاردا (15 ۇشۋ) تولىق قىسىمدى قابىلداعىش ۇشۋ الدىندا قوسىلىپ كەلگەن»، - دەلىنگەن م ا ك حابارلاماسىندا.
كوككە كوتەرىلگەن ان-148 التى مينۋتتان سوڭ اپاتقا ۇشىراعان. م ا ك 130-150 مەتر بيىكتىكتە اۆتوپيلوتتىڭ قوسۋلى بولعانىن اتاپ ءوتتى. شامامەن 2 مينۋت 30 سەكۋندتان سوڭ، 1300 مەتر بيىكتىكتە جانە 465-470 ك م/ساعات جىلدامدىقتا بورتتا ەرەكشە جاعداي ورىن العان. ان-148 وزدىگىنەن جازۋ قۇرالدارى جىلدامدىق داتچيكتەرىنىڭ كورسەتكىشتەرى اراسىنداعى الشاقتىقتاردى تىركەگەن. تاعى 30 سەكۋندتان كەيىن اراداعى ايىرماشىلىق 30 ك م/ساعاتقا جەتكەن جانە ەكيپاجعا «پريبورنايا - سراۆني» كومانداسى بەرىلگەن. كوماندا 2000 مەتر بيىكتىكتە تاعى قايتالانعان، بۇل جولى داتچيكتەردىڭ كورسەتكىشتەرى اراسىنداعى ايىرماشىلىق ۇلعايا تۇسكەن.
ەكىنشى «پريبورنايا - سراۆني» كومانداسىنان كەيىن ەكيپاج اۆتوپيلوتتى وشىرگەن. ءارى قاراي ۇشۋ قولمەن باسقارۋ رەجيمىندە جۇرگىزىلگەن. جىلدامدىق كورسەتكىشتەرى كۇرت الشاقتاپ كەتكەن: ءبىر تەتىك 0 ك م/ساعاتتى، ەكىنشىسى - 540-560 ك م/ساعاتتى كورسەتكەن. سودان كەيىن جىلدامدىق كورسەتكىشتەرى تومەندەگەن (200 ك م/ساعاتقا دەيىن جانە تومەن)، ۇشاق 30-35 گرادۋس بۇرىشتىق قوزعالىسپەن قارقىندى تومەندەۋگە اۋىستىرىلدى. جەرمەن سوقتىعىسار كەزدە مودۋلدەردىڭ بىرىندەگى جىلدامدىق كورسەتكىشتەرى ءنولدى، ەكىنشىسى 800 ك م/ساعاتتى كورسەتكەن.
«سوقتىعىسۋدان 4-5 سەكۋند بۇرىن ۇشاق وڭ جاققا 25 گرادۋسقا اۋعان»، - دەپ حابارلادى م ا ك.
الىنعان مالىمەتتەرگە ساراپتاما جۇمىستارى ءالى دە جالعاسادى.
بۇعان دەيىن حابارلاعانىمىزداي، ماسكەۋدىڭ دومودەدوۆو اۋەجايىنان كوككە كوتەرىلگەن ان-148 جولاۋشىلار ۇشاعى كوپ ۇزاماي راداردان جوعالىپ كەتتى. كەيىن ۇشاق قالدىقتارى ماسكەۋ وبلىسىنىڭ رامەنسك اۋدانىندا تابىلعانى ءمالىم ەتىلدى.
«ساراتوۆ اۋە جەلىلەرى» كومپانياسىنا تيەسىلى ۇشاقتىڭ بورتىندا 65 جولاۋشى مەن 6 ەكيپاج مۇشەسى بولدى. ولاردىڭ بارلىعى اجال قۇشتى.
