ايازدى كۇندەرى اقتاۋداعى اققۋلار تەڭىز جاعاسىنا شىعىپ قالعان - فوتو

«ادەتتە تەڭىزدە ءجۇزىپ جۇرەتىن اققۋلار كەشەلى بەرى جاعادا جاتىر. كوك مۇزعا باۋىرىن توسەگەن اققۋلارعا الاڭداعان ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسفەكتسياسى وكىلدەرىمەن بىرگە ءبىزدىڭ ۇجىم دا اققۋلاردىڭ جاعدايىن بىلمەككە جاعالاۋعا بارىپ كەلدى. اقتاۋ قالاسى، 1 شاعىن اۋداندا 7 اققۋ جاعاداعى مۇزدا جاتىر ەكەن. ولاردىڭ بەسەۋى - اققۋدىڭ كوگىلدىرلەرى»، دەلىنگەن ماقالادا.

جاعاعا شىعىپ قالۋىنا كۇننىڭ سۋىعى مەن ازىقتانا الماۋى سەبەپ بولۋى مۇمكىن دەيدى ماماندار. سەبەبى دەنەلەرىندە ەشقانداي جاراقات ىزدەرى بايقالمادى.

«كەشە وسىنداي جاعداي بولىپ، ءبىر اققۋدى قاراكول كولىنە اپاردىق. وندا قازىرگى تاڭدا 500 گە جۋىق اققۋ بار. كورىپ تۇرعاندارىڭىزداي، بۇلار - اققۋدىڭ بىلتىرعى بالاپاندارى. قورەك بولماعان سوڭ مۇزدىڭ ۇستىنە شىعىپ قالىپ وتىر. اققۋدىڭ نەگىزگى ازىعى تايىز جەردە بولادى. ۇساق بالىقتارمەن، شاباقتارمەن، ءشوپتىڭ تامىرلارى، شاياندارمەن قورەكتەنەدى. سەبەبى ولار تەڭىزدىڭ تايىز جەرىندە بولادى. ەگەر تەرەڭگە كەتسە، اققۋلار ازىعىن الا المايدى»، - دەيدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى باسشىسىنىڭ ورىنباسارى عابباس دوساتوۆ.

مۇز ۇستىندەگى اققۋلاردىڭ بۇل جاعدايىنا الاڭداعان اۋماقتىق ينسپەكتسيا ماماندارى ولاردى ءوز باقىلاۋلارىنا الدى. جاعدايلارى ناشارلاپ، اشىق تەڭىزگە شىعىپ كەتپەسە، قاراكول كولىنە اپارۋ شارالارىن قاراستىراتىنىن دا جەتكىزدى. دەگەنمەن تاماقتانىپ، ءال جيناعان قۇستار كوپ ۇزاماي ايدىنعا قايتا ورالدى.

ايتا كەتەيىك، سوڭعى ەكى جىلدا ەشقانداي اققۋ ءولىمى تىركەلمەگەن. 2016 -جىلى تابيعي جاعدايلارعا بايلانىستى (السىزدىكتەن، اۋرۋ سالدارىنان) ەكى اققۋدىڭ ءولىمى تىركەلگەن.

فوتو/7292info.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى